"Tanrıma sığınıram"

PROFESSOR FƏQAN ƏLİYEVİN EYNİADLI KİTABI İŞIQ ÜZÜ GÖRÜB

Beynəlxalq Ekoenergetika Akademiyasının prezidenti, Birləşmiş Oksford Akademiyasının fəxri professoru, texnika elmləri doktoru Fəqan Əliyevin "Tanrıma sığınıram" adlı kitabı çapdan çıxıb. Müəllif kitabı Azərbaycan Prezidenti cənab İlham Əliyevə və Qarabağın azadlığı uğrundan mübarizə aparanlara ithaf edib.

Kitabda insan övladının qürurlu, daxilən sadə, görünüş etibarı ilə möhtəşəmliyi, həyatının məzmununun əməksevərlik, xeyirxahlıq, yaradıcılıq, mərhəmət, halal qazanc, heç kəsin haqqına girməmək, lovğalıqdan uzaq olması kimi dəyərlərin zəruriliyi vurğulanır. Oxuculara təqdim olunan yeni nəşrdə müəllifin bir-birindən maraqlı yazıları - "Azərbaycanın şanlı bayram günü", "Şəhidlərimiz unudulmamalıdır", "Ağrılı və acılı zəmanəmiz", "Mənim elim, obam, məhəlləm və universitetim", "Görə bildiklərim və görə bilmədiklərim", "Xoşbəxtliyin yolu düzgünlük və dürüstlükdür. Bədbəxtçilik isə yalançılıq və əyrilikdir", "Zamanı dəyişən sürətdir. Zamanın yiyəsi Uca Tanrıdır", "Kiçik xalqın böyük alimi olmaqdansa, böyük xalqın kiçik alimi olasan", "Dəyişən insanlar və dəyişməyən əxlaq", "Dünyanı elm xilas edəcək", "Özümüzü dərk edək", "Xocalı bəşəriyyətə utanc verən bir tragediyadır", "Heç kimdən uman, küsən yerimiz yox", "Mədəniyyətimiz tərbiyəmizdir", "Yaxşı olmaq üçün güclü olmaq lazımdır" kimi hekayə və məqalələri yer alır.

"Şəhidlərımız unudulmamalıdır" adlı məqalədə müəllif qeyd edir ki, qəhrəman şəhidlərimiz yaddaşlardan heç vaxt silinməməli və daim ehtiramla yad edilməlidirlər. Onlar xalqımızın şanlı, qanlı və qürurlu tarixidirlər: "Onlar bizim qürur yerimizdir".

Kitabdakı "Ulu babamız Nizamı Gəncəviyə məktubum" adlı yazı xüsusilə diqqət çəkir. Müəllif yazır ki, böyük Nizaminin şərəfinə nə qədər heykəllər ucaldılsa da, təəssüf ki, bütün bunlar onun zəngin yaradıcılığını öyrənmək, dərk etmək, cəhalət yarasını sağaltmaq üçün kifayət deyil: "Nizami irsini tədqiqatlar aparmaqla öyrənməliyik. Nizami Gəncəvinin yaradıcılığına həsr olunmuş sənət əsərləri vardır. Təəssüf olsun ki, Nizaminin davamçıları olmuş Füzuli, Nəsimi, Xəqani, Nəsrəddin Tusi kimi söz nəhəglərimiz belə xalqımız tərəfindən kütləviliklə öyrənilmir. Ulu babamız, bizlərdən inciməyə böyük haqqın var. Ancaq bilirəm babalar balalarından incimir, küsmür. Sevgili Babamız, Allah dərgahındasan. Duaların Allahımız tərəfindən eşidilir. Xalqımıza dua et ki, qəddar düşmənlərdən və onların arxasında duran köpəklərdən Allah bizi qorusun. Türk millətlərinə birlik versin, cəhalətdən onları qorusun, tamahkarlıqdan, əyrilikdən düz yola gəlsinlər".

"Kapitalizm, imperializm və quldarlıq quruluşu - forması dəyişsə də, mahiyyəti eynidir" başlıqlı məqalədə müəllif qeyd edir ki, bəşəriyyət yaranandan insanların qarşılaşdığı istismar, zülm, vəhşilik fauna və florada gedən proseslərlə oxşarlıq yaradır - vəhşi heyvanlar bir-biri ilə qəddar davranır, heç bir ədalət haqqı olmadan dağıdır, məhv edir. Dünyanın super güclü dövlətləri baş verən müharibələrə, keçirilən nüvə sınaqlarına, hərbi istiqamətdə aparılan elmi-tədqiqat işlərinə, təcrübələrə, hərbi sahəyə böyük kapital qoyur. Bu pullar hesabına təbiəti dağıdan, məhv edən proseslər yaranır, nüvə silahlarının sınağı planetimizi yararsız hala salır.

"Nizami Gəncəvinin elmi-fəlsəfi yaradıcılığı" başlıqlı məqaləsində isə müəllif bildirir ki, Nizami nöqtə, xətt, müstəvi və cisimləri təsvir edərək nöqtənin iki xəttin kəsişmə yeri olduğunu vurğulayır: "Sonra nöqtəni hərəkət etdirərək düz xətt alır. Əyri xətt alınması ehtimalını aradan çıxarmaq üçün nöqtənin hərəkətindən əmələ gələn xətti Nizami ərəb əlifbasının birinci hərfi kimi "əlif" adlandırır. Xətt anlayışından sonra o, yenidən iki xətt götürür və onların bir-birindən uzaqlaşmasından "bəsit" əmələ gətirir. Görünür ki, Nizami "bəsit" istilahını həm müstəvi, həm də səthi mənasında işlətmək istəyir".

Kitabdakı "Tikmədim özüm qalam, tikdim ki, izim qala", "Qarabağda çalışan memar və inşaatçılara məsləhətim", "Akademiyamız xalqımızın milli qürurudur", "Hər nə varsa, insan və insanlıq üçün", "Xəzərin giləvarı, xəzrisi gözəldir, Daş karxanalarının tozu xəstəlik", "Biganəlik", "Böyük hədəflər möhtəşəm qələbələrin açarıdır", "Vətənimiz çox gözəldir", "Sözdə yox, əməldə" başlıqlı yazılar da oxunaqlılığı ilə diqqət çəkir.

Müəllifin kitabla eyni adı daşıyan "Tanrıma sığınıram" başlıqlı məqaləsində qeyd olunur ki, Qarabağımızın azadlığı, Xankəndidə keçirilən hərbi parad, Xankəndidə Azərbaycan bayrağının dalğalanması, xalqımızın qələbəsi xalqımızın qəhrəman oğullarının hesabınadır. I Qarabağ və II Qarabağ müharibəsində itirdiklərimizi, tökülən qanları, qollarını, ayaqlarını itirmiş övladlarımızı, övladlarını itirmiş gənc qadınlarımızı xatırlayandan insanlıqla döyünən ürəklərə deyirəm: "Qoy, o günlər bir də gəlməsin. Xalqımız əmin-amanlıq içərisində yaşasın, millətimiz inkişaf etsin, elmin tərəqqisi, ümumxalq inkişafı olsun, mədəniyyətimiz, musiqimiz, rəssamlıq, heykəltaraşlıq sahəsində yeni inkişaf mərhələsi yaşayaq".

Qeyd edək ki, Fəqan Əliyev Amerika Birləşmiş Ştatları, Böyük Britaniya, Fransa, Finlandiya, Türkiyə, İran, Rusiya, Pakistan və bir sıra MDB ölkələrində keçirilən forumlarda konfranslar verib. Azərbaycan və xarici alimləri cəlb etmək üçün Fəqan Əliyev 15 beynəlxalq Bakı konqresi təşkil edib. Fəqan Əliyev Azərbaycan, ABŞ, Finlandiya, Böyük Britaniya və Rusiyada nəşr edilən məqalələrin, çoxsaylı ixtiraların, dərslik və monoqrafiyanın müəllifi, "Enerji, ekologiya, iqtisadiyyat" və "Kainat" elmi-populyar jurnallarının təsisçisi və baş redaktorudur. "Ekoenergetika və biologiya" jurnalının elmi redaksiya heyətinin üzvü Fəqan Əliyev akademik Yu tərəfindən təltif edilib. O həmçinin Y.Məmmədəliyev və V.Boguslavski medallarına layiq görülüb.

Hər bir insan öz taleyini yaşayır deyir Fəqan Əliyev: "Təhsil alır, işləməyə başlayır, ona qismət olan həyatını yaşayır, yaradır və ömrünün bir dövründə yaratdıqlarına baxır, özünü aydın görür. Mənim həyatımın xoşbəxtliyinin kökündə gördüyüm işlər, yazdığım elmi əsərlər durur. Kiminsə taleyində xoş bir rolum olubsa, bu, mənim sevincimdir".

SEVİNC

525-ci qəzet .- 2024.-26 iyul,№(131).-S.15