Belə-belə işlər...

"Molla Nəsrəddin XXI əsrdə" silsiləsindən

MOLLANIN EKSPERTLİYİ

Bir gün hansısa televiziya kanalının çəkiliş qrupu gəlib çıxır Mollanın yaşadığı kəndə və biləndə ki, Molla evindədir, kəsdirir qapısının ağzını ki, gərək sizdən müdrik ekspert kimi kanalımız üçün müsahibə alaq. Molla nə qədər nəm-nüm eləsə də, əl çəkmirlər, kameranı-filanı quraşdırıb kişini darta-darta gətirirlər obyektivin qabağına.

Telejurnalist - gənc, göyçək, amma təcrübəsiz qız əzilib büzülə-büzülə soruşur:

- Molla Nəsrəddin dayı, siz müdrik, dünyagörmüş ağsaqqalsınız. Bizim hal-hazırkı durumumuzu necə xarakterizə edərdiniz?

Molla saqqalını tumarlaya-tumarlaya bir az fikirləşib cavab verir:

- Bala, iqtisadçı alimlərimizin dediklərinə inansaq, biz hələ keçid dövrünü yaşayırıq, yəni bir ayağımız orda - arxada, bir ayağımız da bu tərəfdə - irəlidə.

- Fikrinizi obrazlı şəkildə necə ifadə edərdiz, Molla dayı?

- Qızım, bir tamaşa var ey, bax orda deyildiyi kimi, hələ ki haça-paça qalmışıq da. Nə geriyə qayıda bilirik, nə də irəli gedirik.

Qız əl çəkmir, növbəti sualı verir:

- Bəs bunun sonu necə olacaq, Molla dayı?

Molla deyir:

- Necə olasıdır ki, qızım? Sən də məni bağışla, o qədər bu vəziyyətdə qalacağıq ki, axırda şalvarımız partlayacaq və ...day sonrasını özün bilirsən də.

Qız qır saqqız olub yenə soruşur:

- Yaxşı, bəs bütün bu həngamənin axırı nə ilə qurtara bilər, ağsaqqal?

Molla əsəbiləşir:

- A bala, orası tay hamıya məlumdur da! Tamaşaçıların diqqətini cəlb edib reytinq qazanmaq üçün niyə məni - ağsaqqal kişini provakasiyaya çəkirsən?

BEŞİ ON ELƏYƏK...

Mağazalarda ərzaq məhsullarının qeybə çəkildiyi, qiymətlərin kəllə-çarxa qalxdığı vaxtlarda Molla bərk xəstələnir və üstünə həkim çağırırlar. Həkim Mollanı müayinə edib deyir:

- Vəziyyətin yaxşı deyil. Gərək bir müddət ciddi pəhriz saxlayasan. Yumurtaya isə gözünün ucu ilə də baxmamalısan - sənin birinci düşmənin yumurtadır.

Həkim gedəndən sonra arvadı televizoru işə salır ki, Molla düşük şoulardan birinə baxıb başını qatsın, fikri dağılsın. Molla görür ki, televizorda "Aktual ekran" verilişi gedir, aparıcı qız məşhur bir iqtisadçı akademik ilə əhalinin sosial vəziyyətini müzakirə edir. Aparıcının bu sahədəki proqnozlara dair verdiyi suala iqtisadçı akademik belə cavab verir:

- Hər şey yaxşılığa doğrudur, hər şey əla olacaq. Əhalini muştuluqlamaq istəyirəm - bu gün səhərdən yumurtanın qiyməti 1 qəpik ucuzlaşıb. Təbii ki, bu, əhalinin real gəlirlərinin artımına səbəb olacaq.

Molla bunu eşidən kimi "uraa" qışqırıb yorğanı üstündən atır, şalvar-köynəyini geyib ildırım sürətilə evdən çıxır. Təxminən 10 dəqiqə sonra əlində selofan torba, içində də 5 dənə yumurta qayıdır və arvadına deyir:

- Arvad, tez elə, sal bunları yağa, qayğanaq elə, yeyim.

Arvadı hirslə deyir:

- A kişi, nə danışırsan? Həkim demədi ki, sənə yumurta yemək olmaz?

Molla gülə-gülə cavab verir:

- Həkim qələt eləyir. Deyirsən yumurtanın qiyməti ucuzlaşsın, mən bu xoşbəxtlikdən dadmamış o dünyaya nisgilli gedim? Səs eləmə arvad, üstəlik, 5 qəpik də qabağa düşmüşük.

Arvadı bir az fikirləşib sevincək deyir:

- Biy, ay kişi, day 5 niyə? Qayıt, beş yumurta da mənimçün al ki, beş qəpiyi on eləyək...

MOLLANIN YUXU YOZMAQLIĞI

Bir kişi Mollanın yanına gəlib deyir:

- Molla, məsləhətinə ehtiyacım var. Son vaxtlar yuxumda tez-tez cəhənnəmi görürəm. Görürəm, inkir-minkir qır qazanının yanında dayanıb dişlərini ağarda-ağarda məni gözləyir. Bu yuxunu necə yozarsan?

Molla deyir:

- Balam, mən bilən sən dindar adamsan, məntiqlə yuxunda cənnəti görməliydin axı!

Kişi deyir:

- Elə məni də təəccübləndirən budur da, ay Molla. Bax, hər gün namazlarımı vaxtlı-vaxtında qılıram, canım sənə desin, hər il oruc tuturam, qurban kəsirəm. Bu yuxu nədir, baş açmıram. Sən bilən öləndə cəhənnəmə düşəcəm?

Molla bir az fikirləşib deyir:

- Əgər suallarıma kişi kimi düz cavab versən, yuxunu yozaram.

Kişi Qurana and içir ki, düz cavab verəcək. Molla soruşur:

- De görüm, şərab-zad içməmisən ki?

Kişi əvvəlcə duruxub qalır. Sonra yavaşdan deyir:

- Bilmirəm bilirsən, ya yox, mən təbi gələndə şeir də yazıram axı. Yazmazdan əvvəl bir yüz vurmadın, daha onun harası şeir oldu ki?

- Yaxşı, qumarla aran necədir?

- Ay Molla, bir gündən bir millət oturub televizorun qabağında lotoreya adı ilə qumar oynamırmı? İndi mən toydan-toya uzkiy kruqda kart sıxsam, dünya dağılar

- Yaxşı, bəs sol getmək-filan?

Kişi o yan-bu yana baxıb Mollanın qulağına pıçıldayır:

- Ay Molla, kişi deyilik bəyəm? İndi deyirsən adımıza şəbədə qoşsunlar. Olur da hərdən-birdən.

Molla deyir:

- Yaxşı, balam, sən bu boyda zıppıltıdan sonra cənnətə düşmək istəyirsən?

Kişi cəld cavab verir:

- Molla hər dəfə qələt eləyəndən sonra səhəri gün tövbə eləyirəm də. Bəs bilmirsən, tövbə qapısı həmişə açıqdır?

Molla gülüb deyir:

- Deməli, bir gün mömin olursan, o bir gün də o söz, sonra yenə mömin, ardınca yenə o söz... İşin fırıqdır, dost, amma düzələr. Sən belə elə. İndidən cənnətə və cəhənnəmə eyni sayda bilet sifariş ver. O dünyada sən bir gün cənnətdə olacaqsan, bir gün də cəhənnəmdə. Elə ki, cənnətə çatdın, axşam olanda kef eləməyə macal tapmamış elədiyin qələtlərə görə dalından bir təpik vurub göndərəcəklər cəhənnəmə, deyəcəklər, buranın havasını uddun, bəsdir, indi get elədiyin qələtlərin cəzasını çək, sonra gələrsən...

- Ay Molla, qır qazanından sağ çıxacam ki, geri - cənnətə də qayıdım? - deyə kişi təəccüblə soruşur.

Molla deyir:

- Əşi, bu fərasət ki, səndə var, inkir-minkirnən də dil taparsan. Gördün o yan-bu yan edirlər, ciblərinə beşdən-ondan basarsan, ocağın odunu bir az azaltsınlar ki, bişməyəsən. Deyərsən, hələ cənnətə komandirovkam qalıb. Amma yadında saxla - o dünyada yalandan tövbə edib mələklərlə qumar oynamaq keçmir ha!

MOLLANIN KREATİV MƏSLƏHƏTİ

Bir gün Molla qəzetdə oxuyur ki, filan ünvanda yerləşən "Kreativ məsləhətlər" firması biri 100 manata gözəl məsləhətlər satır və kim onlardan alsa, özünə yaxşı gün-güzəran, dolanışıq qura bilər.

Molla nə qədər əlləşsə də, "kreativ" sözünün mənasını tapa bilmir, xeyli fikirləşəndən sonra sonuncu pullarını cibinə qoyub üz tutur həmin ünvana. Gəlib görür ki, içərisinə bahalı mebellər düzülmüş geniş bir otaqda orta yaşlarında kök və daz bir kişi oturub. Yaxınlaşıb soruşur:

- Burda məsləhət satan kimdir?

Kişi deyir:

- Mənəm, ay Molla dayı.

Molla yenə soruşur:

- Əvvəlcə məni başa sal görüm kreativ nəmənə şeydir.

Kişi dərhal deyir:

- O şeydir ki, sən onun quyruğundan tutub başına çıxsan, olursan işdə-gücdə uğurlu adam - pul xəzəl kimi yağır başına.

Molla deyir:

- Onda birini de, gəlsin.

Kişi üzünə ciddi görkəm verib deyir:

- Molla, kim sənə desə ki, qatıq qaradır - inanma.

Molla təəccüblə soruşur:

- Sənin satdığın məsləhət budur? Bunun nəyi kreativ oldu ki?

Kişi sırtıq-sırtıq gülərək barmağını yuxarı qaldırıb deyir:

- Ay sağ ol! Bunu bilmək üçün gərək ikinci məsləhəti də alasan.

Molla artıq işin nə yerdə olduğunu başa düşür. Amma dişi bağırsağını kəssə də, işin sonuna çatmaq üçün özünü ələ alıb deyir:

- Yaxşı, onu da de gəlsin.

Kişi deyir:

- Ona görə inanma ki, bunu harda desən, heç kim sənə inanmaz.

Bunu deyib qarşısındakı böyük stəkana çay süzür, heç Mollaya təklif eləmədən başlayır horta-hortnan içməyə. Molla onun daz başını, bərəlmiş gözlərini ani olaraq süzərək qapıya tərəf dönür ki, çıxıb getsin. Kişi arxadan qışqırır:

- Ay Molla, hara? Bəs pullar?

Molla dübarə dönüb geri qayıdır və deyir:

- Sənə 200 manat verməliyəm də... Gəl belə danışaq - indi mən sənə 300 manatlıq bir məsləhət verəcəm, özü də havayı. Adını qoyarsan "Molla Nəsrəddinin super kreativ məsləhəti". İnan mənə, 400 manata kimə gəldi rahatca sırıyacaq, 200 manat da qabağa düşəcəksən.

Kişi bir az fikirləşib soruşur:

- Denən, özüm ölüm aldatmıram.

- Sən öl, aldatmıram.

- Onda xırdala gəlsin.

Molla görür ki, kişi çayını içib qurtardı. Stəkanı onun əlindən alıb daz kəlləsinin ortasına necə çırpırsa, kişinin başı dəymiş qarpız kimi guppuldayıb partlayır, stəkan da çilik-çilik olub səpələnir yerə. Üz- gözünü qan basan kişi başını tutub bağırır:

- A kişi, neynirsən?

Molla deyir:

- Kreativ məsləhət xırdalayıram da. Bax, məndən sonra kim otağa girib desə ki, bu stəkan sənin başında sınmayıb və sənin daz kəlləndə salamat yer qalıb - inanma!

MOLLANIN CAVABI

İş elə gətirir ki, Molla Nəsrəddin Avropa ölkələrinin birinə turist səfərinə gedir. Ölkənin paytaxtının görməli yerlərini gəzərkən ekskursiya rəhbəri turistləri abad bir şəhərciyə gətirərək sıra ilə yanbayan düzülmüş yaraşıqlı evləri göstərərək deyir:

- Bax, gördüyünüz bu evlər bizim fəhlələrə məxsusdur. Hamısını özləri tikdiriblər və içində şad-xürrəm yaşayırlar

Molla soruşur:

- Bilmək olar bu evləri hansı pullarla tikdiriblər?

- Necə yəni hansı pullarla? - deyə ekskursiya rəhbəri təəccüblə deyir. - Əlbəttə, öz halal zəhmətləri və əmək haqları ilə. Onlar sadə, amma bacarıqlı insanlardır.

Molla təəccüblə soruşur:

- Onlar ayda nə qədər əmək haqqı alırlar ki?

- Orta hesabla ayda 3-5 min avro, - deyə ekskursiya rəhbəri fəxrlə cavab verir.

Mollanı gülmək tutur:

- Siz buna bacarıq deyirsiniz? İnşallah, Bakıya gəlin, sizi elə yerə aparacam ki, ordakı villaların yanında bu evlər toyuq hininə oxşayacaq. Özü də onların sahibləri ayda 3-5 min yox, olsa-olsa 3-5 yüz avro qazanırlar. İndi özünüz deyin - sizin adamlar bacarıqlıdır, yoxsa bizimkilər?

Əlisəfdər HÜSEYNOV

525-ci qəzet .- 2024.-26 iyul,№(131).-S.10.