Pis vərdiş

Rahat ömrə o qədər zərbə vurur

pis vərdiş.

Adamın vayına vaxtsız oturur

pis vərdiş.

Ona aludə olanlar itirir növrağın,

Əyləyib atlarını yolda, yorur pis vərdiş.

Gah olur ailənin düşməni, gah danlağı,

Dağıdır gözgörəsi, ev uçurur pis vərdiş.

Yoluxur hər cürə insana cəmiyyət içrə

Çoxuna hiylə gəlib tor da qurur pis vərdiş.

Döndərir zorla cinayətkara çox oğlanı,

Qanırıb qollarını, dalda burur pis vərdiş.

Onu tərgitməsən hərgah, sürəcək dövranın,

Yalını artıq edərkən qudurur pis vərdiş.

İşləyir qana zəhər tək aparır canları,

Çevrilir bir zəliyə, qan da sorur pis vərdiş.

Zakir israrla uzaq olsa da bəd vərdişdən,

Min təəssüf ki, cəmiyyətdə durur pis vərdiş.

Cavanlıq

Ömrün təməli, təptəzə dövrandı cavanlıq,

Meydanda həyat eşqinə cövlandı cavanlıq.

Tarix boyu minlərlə bəşər nəsli içində

Çılqın, dəlisov, bir igid oğlandı cavanlıq.

Həm güclü, cəsarətli vəhəm elmə həvəskar,

Qurmaqla, yaratmaqla ötən andı cavanlıq.

Daim çalışıb zəhmət ilə açdığı yolda,

Xoş arzu-məram, eşq dolu karvandı cavanlıq.

Sağlamdı, təravətlidi, coşqundu həyatı,

Bəzən də həyat qatili, “qan-qan”dı cavanlıq.

Yollar arayır qaçmağa hər an qocalıqdan,

Tər güllər açan gəncliyə heyrandı cavanlıq.

Səyyadıdır eşqin, dolaşar dağı-aranı,

Ovlar cüyürü, ceyranı - tərlandı cavanlıq.

Zakir, əbədi, ardı kəsilməz ola kaş ki,

Haqdan yazılan bir ulu fərmandı cavanlıq.

Söz

İnsanın könlün açır, qəm dağıdır baməzə söz.

Vay o gündən, arada bəd fikir ilə gəzə söz.

Söhbətə başlamamış, aqil olanlar düşünür,

Boş yerə söyləməyir qanmaza, dilbilməzə söz.

Dünyada çox danışan, gop danışan var nə qədər,

Danışırlar gecə-gündüz, calayırlar sözə söz.

Gah olur gövhər-zər, gah düzülür inci kimi,

Gah dönür zəhrimara, fayda gətirmir bizə söz.

Ehtiyatsızlıq edib boş buraxarkən önünü,

Dolaşır dağı-aranı, yayılır həm düzə söz.

Xoşa gəlsin deyə, vallah, nə qədər incələsək,

Nə səbəbdənsə sevilmir deyilərkən üzə söz.

Olmayır çıxdığı yerdən geri qaytarmaq onu,

Çırpılır dil-dodağa, az qalır ağzı əzə söz.

İşlədərkən onu sərraf, daha qiymətli olur,

Yox, əgər xırdalasaq, onda çətin ki, dözə söz.

İstəyirsən biləsən sən də sözün hikmətini,

Zakiri bir yol oxu, gör nə gözəldir təzə söz.

Zakir BAYRAMLI

Şair-publisist, Azərbaycan Yazıçılar və Jurnalistlər birliklərinin üzvü

525-ci qəzet .- 2024.- 6 iyun,№99.-S.15.