“Tələbələrimizə “Qarabağ Universitetinə xoş gəlmisiniz” deyəcəyimiz anı səbirsizliklə gözləyirik”

“Dünyanı dəyişdirmək üçün istifadə edə biləcəyimiz ən güclü silah təhsildir”. Bu sözlərin müəllifi Nelson Mandeladır və bunu xatırlamaq bugünkü yazıda tam yerinə düşər. Çünki ilin-günün bu vədəsində, hamının diqqəti-nəzəri hazırda qəbul imtahanlarına yönəlib. Zamanın bütün mərhələlərində təhsil almaq, bir sənət sahibi olmaq, elm yolu ilə addımlamaq həmişə arzuolunan, maraq və istək dairəsində olub. Hər dövrün özünəməxsus qayda və prinsipləri olsa da, təhsil vacib bir sahə kimi cəmiyyətin əsas sütunu olaraq qalıb. Böyük kəşflərdən, ixtiralardan keçən bəşəriyyət artıq XXI əsrin dörddə bir hissəsini geridə qoyub və texnologiya üzərində yürüyən təhsil də böyük imkanlarla cəmiyyəti inkişafa doğru sürətlə apara bilir.

“Təhsil millətin gələcəyidir”. Bunu isə Ulu öndər Heydər Əliyev deyib. Hələ sovet Azərbaycanına rəhbərlik etdiyi zamanlarda Vətənin gələcəyi üçün yerli kadrların hazırlanmasında, onların ölkədən kənarda təhsil almasına hərtərəfli şərait yaradan bu şəxsiyyətin yürütdüyü siyasətin davamı olaraq, bu gün dünyanın istənilən nöqtəsində təhsil almaq gənclərimiz üçün heç də çətin deyil. Təhsili isə həmişə, hər zaman almaq olar, təki istək və arzu olsun.

Biz 30 il çox ağır bir sınaq dövrü yaşadıq. Bu 30 ildə görmədiyimiz, yaşamadığımız bir çətinlik olmadı ki, onunla üz-üzə qalmayaq. Lakin bəlli müddətdən sonra bir göz qırpımında hər şey öz yerinə oturdu və dünya gördü ki, Qarabağ Azərbaycandır. Bu 30 il özündən sonra azad olduğu qədər də, viran qalan bir Qarabağla üz-üzə qoydu bizi. Və vur-tut 4 ildə Qarabağda nələr baş vermədi ki... Əgər bu gün dirçələn Qarabağda həyat canlanıbsa, köç karvanları ard-arda düzülübsə, deməli, torpaq artıq öz sahibinin əlindədir. Həyatın davam və inkişafa doğru getdiyi yerdə isə başlanğıc nöqtə təhsildir. Ötən ilin noyabr ayında ölkə başçısının sərəncamı ilə Qarabağ Universitetinin yaradılması haqqında qərar verildi. Ötən ay isə Prezident İlham Əliyevin sərəncamı ilə təhsil sahəsində mükəmməl təcrübəyə malik, iqtisad üzrə fəlsəfə doktoru Şahin Bayramov Qarabağ Universitetinin rektoru təyin edildi. Bir neçə aydan sonra universitet ilk tələbələrini qəbul edəcək. Elə bu ərəfədə də universitetin rektoru şənbə müsahibəmizin qonağı oldu.

- “Böyük qayıdış” dövlət proqramı çərçivəsində Qarabağ Universitetinin rolu heç də kiçik görünmür...

- Möhtərəm Prezidentimiz tərəfindən yaradılan Qarabağ Universiteti işğaldan azad olunmuş ərazilərimizdə fəaliyyətə başlayan ilk ali təhsil ocağımızdır. Bu universitet doğma Qarabağda tarixən mövcud olmuş ali təhsil ənənələrinin bərpasını həyata keçirəcək. Məlumdur ki, Xankəndi şəhərində ilk ali təhsil ocağı 1969-cu ildə Azərbaycan Pedaqoji İnstitutunun filialı kimi qurulub. 1973-1988-ci illər arasında ali təhsil müəssisəsi kimi fəaliyyət göstərən fllial, ərazilərimizin işğalından sonra bağlanıb. Lakin indi ali təhsil Qarabağ Universitetinin timsalında yenidən öz doğma məkanına qayıdır. Gözləntimiz ondan ibarətdir ki, bu universitet Qarabağda elmin, təhsilin, mədəniyyətin inkişafında fəal iştirak etsin, bununla da azad olunmuş torpaqlarımızda həyata keçirilən irimiqyaslı quruculuq və məskunlaşma prosesinə öz töhfəsini versin.

- Artıq ali məktəblər yeni tədris ili üçün tələbə qəbulu mərhələsini yaşayır və onların arasında Qarabağ Universiteti diqqət mərkəzindədir...

- Yeni tədris ilində Qarabağ Universiteti 6 fakültədə 27 ixtisas üzrə kadr hazırlığına başlayacaq. Universitet yeni yarandığı üçün hazırda təbliğat işlərinə start verilib. Abituriyentlərlə görüşlər keçirir, universitet barədə, burada yaradılacaq infrastruktur haqqında məlumatlar verilir, hədəflərimizi açıqlayırıq. Gənclərin mükəmməl təhsil alması, zəruri tədqiqat bacarıqlarına yiyələnməsi, onların müasir tələblərə cavab verən peşəkar mütəxəssis, Vətəninə, xalqına, dövlətinə sadiq vətəndaş kimi yetişmələri üçün universitetdə yaradılan imkanlar haqqında abituriyentlərə və valideynlərə ətraflı məlumatlar çatdırılır. Təbii ki, onların çoxsaylı sualları cavablandırılır, rəy və təklifləri qeydə alınır. İlkin mərhələdə gənclərimizin Qarabağ Universitetinə göstərdiyi böyük maraq bizi çox qürurlandırır. Cari ilin 15 sentyabrında tələbələrimizə: “Qarabağ Universitetinə xoş gəlmisiniz” deyəcəyimiz anı səbirsizliklə gözləyirik.

- Yeni universitetin üstünlükləri də olmamış deyil...

- Qarabağ Universiteti öz tələbələrinə zəruri nəzəri biliklər və praktiki bacarıqlar qazandırmağı hədəfləyən yeni akademik məzmun təqdim edəcək. Burada dünyanın qabaqcıl universitetlərinin müsbət təcrübəsi əsasında qurulan ən müasir ali təhsil modeli tətbiq olunacaq. Müasir gənclərin arzu və istəklərinə, yeni dövrün tələblərinə, əmək bazar, real sektorun əsas trendlərinə uyğun universitet modeli qurmağa çalışırıq. İnanırıq ki, bu yanaşma yüksək ixtisaslı mütəxəssis hazırlığını həyata keçirməkdə bizə imkan verəcək. Eyni zamanda universitetdə tədqiqat sahəsinə də xüsusi diqqət yetiriləcək. Həyata keçiriləcək tədqiqatların əsas nəticələrilə Azərbaycanın növbəti mərhələdə inkişafına real töhfələr verməyə çalışacağıq. 2024-2025-ci tədris ili üçün Qarabağ Universitetinə yalnız dövlət sifarişli yerlər üzrə tələbə qəbulu həyata keçiriləcək. Bu o deməkdir ki, bütün tələbələr təqaüd alacaq. Tələbələrimiz əlavə təqaüd almaq imkanına da malik ola biləcəklər. Bütün tələbələr ödənişsiz əsaslarla mənzil tipli yataqxana ilə təmin olunacaq, hər birinə hədiyyə olaraq kompüter veriləcək. Qarabağ Universitetində həm tələbələrə, həm əməkdaşlara maraqlı və məzmunlu sosial həyat vəd edirik.

- Qarabağ Universitetinin müəllim heyəti...

- Hazırda universitet komandasının formalaşdırılması prosesi gedir. Həm akademik, həm də inzibati heyətin seçimi aparılır. Əməkdaşların seçilməsi prosesi şəffaf şəkildə keçirilir. Elm və Təhsil Nazirliyinin internet resursları üzərindən cəmiyyətə mövcud vakansiyalar haqqında elanlar verilir, hər bir vakansiya üçün irəli sürülən tələblər açıqlanır. İnanırıq ki, Qarabağ Universiteti doğma Azərbaycanın adına layiq bir ali təhsil ocağı olacaq, yeni nəsil gənclərinə xidmət edəcək, ölkəmizdə elm və təhsilin inkişafına mühüm töhfələr qazandıracaq.

- İlk qəbul ilindən gözləntiləriniz...

- Əsas gözləntimiz odur ki, Qarabağ Universiteti müzəffər Ali Baş Komandanımızın və rəşadətli Silahlı Qüvvələrimizin sayəsində düşmən işğalından azad edilən tarixi torpaqlarımızda ali təhsil ənənələrini bərpa edəcək. Şəhid qardaşlarımızın qanı tökülən müqəddəs torpaqlarda fəaliyyət göstərən Qarabağ Universitetinin milli ali təhsilimizə yeni məzmun qazandıracağına inanırıq. Peşəkar mütəxəssislərdən ibarət komanda formalaşdırmaq, akademik proqramların məzmunu hazırlamaq və parlaq düşüncəli gəncləri tələbələrimiz sırasına cəlb etmək ilk tədris ili öncəsi reallaşdırmağa çalışdığımız əsas istiqamətlərdir. Qarşıya qoyulan strateji hədəflərə çatmaq yolunda ilk tədris ilinin çox mühüm əhəmiyyət kəsb edəcəyinə inanırıq.

- Bu dönəmə çatmaq üçün hamımız 44 gün adlı eyni gerçəkliyi yaşadıq...

- 44 günlük Vətən savaşı hər birimizə qürur yaşatdı, bizlərə sonsuz fəxarət hissi bəxş etdi. Fürsətdən istifadə edib tarixi zəfərimizin memarı olan Ali Baş Komandana, möhtərəm Prezidentimizə bir vətəndaş kimi sonsuz təşəkkürümü bildirmək istərdim. Qalib sərkərdənin rəhbərliyi altında yenilməz ordumuz düşmənə gücünü göstərdi. Bu yolda canını fəda edən bütün şəhidlərimizə Allahdan rəhmət diləyir, Vətən yolunda sağlamlığını itirən qazilərimizə, bütün əsgər və zabitlərimizə minnətdarlığımı bildirirəm. Bu gün hər birimiz ərazi bütövlüyü bərpa olunmuş güclü Azərbaycanın vətəndaşı olduğumuz üçün sonsuz qürur yaşayırıq. Nə gözəl ki, bu gün Qarabağ Universiteti haqqında söhbət etmək imkanımız var.

- Elə biz də fürsətdən istifadə edib sizi bir qədər yaxından tanıyaq. Narahat dünyamızda hamının əhvalı eyni deyil...

- Hər şey qaydasındadır. Qarabağ Universitetinin quruculuğu ilə məşğul olan insanlar olaraq, qürurluyuq. Şərəfli bir işlə məşğuluq. Bu fürsəti bizə qazandırdığı üçün möhtərəm Prezidentimizə sonsuz təşəkkürümüzü bildiririk. Gözəl bir missiya ilə yola çıxmışıq və bu istiqamətdə bizə dövlətimizin, cəmiyyətin ciddi dəstəyi var.

- Oxucular Şahin Bayramovu öz dediklərindən tanısın...

- Deyəcək çox şey yoxdur. Mingəçevir şəhərində anadan olmuşam. Mingəçevir şəhər Təbiət-riyaziyyat-humanitar təmayüllü liseyin məzunuyam. Bakalavriat, magistratura və doktorantura səviyyələri üzrə təhsilimi Azərbaycan Dövlət İqtisad Universitetində başa vurmuşam. Əvvəl iqtisadiyyat, daha sonra ali təhsilin idarə edilməsi üzrə iki dəfə ABŞ-da təhsil almışam. Azərbaycan Dövlət İqtisad Universitetində laborantlıqdan başlayıb müəllim, dosent, şöbə müdiri, beynəlxalq əlaqələr və proqramlar üzrə prorektor vəzifəsinədək yüksəlmişəm. Daha sonra fəaliyyətim Elm və Təhsil Nazirliyində “Elm, ali və orta ixtisas” şöbəsində davam edib. Beş ilə yaxın Mingəçevir Dövlət Universitetinin rektoru vəzifəsində çalışmışam.

- Sizi yetişdirən ailə...

- Sadə, zəhmətkeş ailədə böyümüşəm. Atam sürücü, anam evdar xanım olub. Ailəmlə hər zaman fəxr etmişəm. Çox yaxşı təhsil almışam. Özümü şanslı biri hesab edirəm ki, çox güclü orta və ali təhsilə yiyələnə bilmişəm. Hər zaman qarşıma təhsilə önəm və dəstək verən insanlar çıxıb. Fürsətdən istifadə edib valideynlərimə və müəllimlərimə təşəkkürümü bildirirəm.

- Seçiminiz iqtisadiyyat oldu. Yəqin ki, dövrün tələbinə uyğun seçim etmisiniz...

- Birmənalı fikir söyləmək asan deyil. Orta məktəbdə riyaziyyatı çox yaxşı oxumuşam. Bəlkə də ixtisas seçimində riyaziyyatın təsiri mühüm olub.

- Fəaliyyətiniz boyu uğur sizi tərk etməyib...

- Bu barədə fikir bildirməyimiz düzgün olmazdı. Ətrafımızda baş verənlər onu deməyə əsas verir ki, uğur qazanmağın ən mühüm və həlledici amili uğura inanmaqdır. Təcrübə onu göstərir ki, bilik, bacarıq və zəhmət hər bir gəncin uğur qazanmasına kömək edə bilər.

- İxtisasca iqtisadçısınız, lakin təhsil sahəsinə daha çox bağlı olduğunuz bir həqiqətdir...

- Əmək fəaliyyətimin əsas hissəsi ali təhsil müəssisələrinin payına düşür... Düşünürəm ki, milli ali təhsilimiz və müasir dünya ali təhsili haqqında məlumatımız, təcrübəmiz nə qədər çox olsa, Azərbaycanda ali təhsil müəssisələrinin fəaliyyətinə bir o qədər fayda qazandırmağa imkanımız ola bilər. Milli təhsilimizin uğurları üçün çalışan peşəkarlardan çox şey öyrənmək fürsətimiz olub

- İşiniz sırf gənclərlə bağlı olduğundan, onlardan danışaq...

- Azərbaycanın bugünkü gənci müasir düşüncəlidir, yenilikçidir, innovatordur. Gənclərimizin müasir dünyaya baxışı fərqlidir. Onlarla eyni dildə danışmağı bacarsaq, həmin gənclər Azərbaycanın parlaq gələcəyini çiyinlərində aparmağa qadir olacaqlar. Öyünməyə dəyər ki, kifayət qədər böyük uğurları olan, açıqfikirli gəncliyimiz var. Səmimi deyim ki, həm gənclərimizlə qürur duyuruq, həm də onlardan öyrənirik.

- Amma bu gəncliyin istəyi də çoxdur...

- Düşünmürəm ki, gənclərimizin istəyi çoxdur. Zənnimcə, bugünkü gənclik xoşbəxt olmaq istəyir. Bu da onun haqqı və təbii istəyidir.

- Xankəndiyə ilk gəlişiniz...

- Sonsuz qürur hissi yaşadım. Doğma Qarabağın təhsil quruculuğunda iştirak etmək fürsətinin yarandığı şərəf və məsuliyyətin əsl mahiyyətini dərk etdim. Azərbaycanlı olmaq böyük bir fəxrir.

- Mediaya demək istədiyiniz...

- Media cəmiyyətin güzgüsüdür, onun inkişafında xüsusi rolu olan sahədir. Bu sahədə çalışan peşəkarlara strateji önəm kəsb edən fəaliyyətlərində uğurlar arzulayıram. Doğma Qarabağda həyata keçirilən kompleks quruculuq işlərinin işıqlandırılmasında və Qarabağ Universitetinin təbliğatında mediamızı daima fəal olmağa çağırırıq.

Tamilla M-zadə

525-ci qəzet.- 2024.- 22 iyun,№108.-S.9.