Çiskinli günün yağmur duası

“Qəfil yağışlar qəfil ömrümüzə gələn insanlar kimidir. Qəfil hisslər çulğalayar adamı. Heç özün də bilməzsən, bu qəfil yağışlar neçə yol taleyini başdan yazar”.

Mən Güneli bir axşamın qəribliyində tanıdım. Və o gündən bu günə qərib ruhların kədərində sehrləndim. Onun fikirlərini, düşüncələrini, dünyaya baxışını sevdim. Və o gündən bu günə Günel Natiqin incə ruhunu, incə ruhunun qəribliyindəki sehrli kədərini sevdim...

Günel mənə kədəri sevdirib. Onun kədəri incədir, həzindir. Gözlərindəki sehrli kədərin dərinliyindəki parıltı gözqamaşdırır. Böyük əsərlər yazmır. Kiçik hekayələr yazır. Əlahəzrət vaxtı kiçik hekayələrinə sığdırır. Kiçik epizodik parıltılarla göz qamaşdırmağı bacarır.

Çiskinli günün yağmur duasında payızı yağdırmağı bacarır. Heç payız da yağarmı?

“Yağış belə yağmır axı. Bu, payızdır yağan. Səssiz küçələrə, üz-gözündən payız yağan qarı üçün qəribsəmiş küçə itlərinin, sahibsiz pişiklərin sığındığı karton qutuların üstünə payız yağırdı... Yağış belə yağmır axı.

Görmədiyim yerlərin, tanımadığım adamların xiffəti bürüyür məni belə vaxtlarda. Qürbət ağrısı gəlib qonur ruhuma, bir damlaya çevrilib öz torpağıma, vətənimə yağmaq və elə ona qovuşub qalmaq istəyirəm.

Yağış belə yağmır axı”.

Bir yağış damlasına, su damcısına çevrilib oz torpağına, vətəninə, yağmaq və elə ona qovuşmaq istəyir Günel Natiq. Su damlası kimi saf, təmiz, dupduru... Axı su başlanğıcdır, həyatdır, su işıqdır.

Çiskinli gündür. Bahar yağır ömrümüzə...

“Elə bu vaxt yağış yağdı. Onda yağış təsəlli kimi yağdı ruhumuza”.

Ömrünün baharında payızın boyunu sevir Günel Natiq.

“Mənim də payızım var. Hər mövsümdə içimdə, gözümdə, saçlarımda hiss etdiyim payızım. Öz yolunu gözləyən payızım. Bu payızın da öz payızı var bəlkə də”.

Bu yağan bahardır. Bu yağan çiçəkdir. Baharın yağmur duası sənin üçün yağır. İçindən keçəcək, ağrılarını sərinlədəcək bu bahar. Ömrün çiçəklənəcək bu baharda. Bütün varlığımla və bütün ruhumla inanıram bu duaya.

Uca Tanrı yar və yardımçın olsun, Günelim.

Aynur Aydınqızı

525-ci qəzet . 2024.- 12 mart,№46.-S.14.