Xüsusi təyinatlıların əfsanəsi

"Dostlar, həqiqətən bəzi şeylər var ki, bizim əlimizdə deyil. Amma mən sidq ürəklə deyirəm, hər zaman, hər an xalqım üçün, torpağım üçün, Vətənim üçün canımdan, qanımdan keçməyə hazıram. Həmişə özümə arzu etmişəm ki, Vətənim üçün şəhid olum, tabutum Azərbaycan Respublikasının üçrəngli, ay-ulduzlu bayrağına bükülüb dəfn olunmağa aparılsın".

Bu fikirləri 24 mart 1981-ci ildə Astara rayonunun Əzərüd kəndində dünyaya göz açan, 2016-cı ilin Aprel döyüşlərində qana susamış düşmənə qan qusduran, xüsusi təyinatlıların adı dillərdən düşməyən əfsanəsi, gizir Pəncəli Teymurov hələ 2013-cü ildə öz toy günündə demişdi. Qəhrəman Vətən sevdalısı üç il sonra, ömrünün 35-ci baharında arzusuna çatdı. Şanlı Zəfərimizin başlanğıcı olan Aprel döyüşlərinin üçüncü günündə son damla qanına qədər vuruşaraq qəhrəmancasına əbədiyyətə qovuşdu. Ölümsüz həyatı ilə milyonların qəlbinə köç edən Astaranın igid oğlu dövlətimiz tərəfindən "İgidliyə görə", "Vətən uğrunda" medalları ilə təltif edildi.

Vətənin müqəddəsliyinə tapınan, qəlbən onun torpağına, daşına bağlanan Pəncəli Teymurov 1992-ci ildə baş vermiş Xocalı soyqırımının kadrlarını izləyəndə hərbçi olmağa və yağıdan qisas almağa söz verir. Orta məktəbi başa vurub, ürəyində Vətənə məhəbbət, düşmənə nifrət 1999-cu ildə ordu sıralarına yola düşür. Xidmət zamanı kəşfiyyatçı peşəsinə yiyələnir və hərbi hissənin ən mahir kəşfiyyatçılarından olur. Mübarizə meydanında düşmənə qalib gəlmək üçün son dərəcə mərd, cəsur, ağıllı gənc verilən bütün tapşırıqları layiqincə yerinə yetirir, ən çətin təlimlərdə xüsusi fərqlənir, əsgərlərin, zabitlərin sevimlisinə çevrilir.

Pəncəli Teymurov hərbi xidmətini başa vurduqdan sonra könüllü olaraq xidmətini yenicə yaradılan Azərbaycan Xüsusi Təyinatlı Qüvvələrinin kəşfiyyatçı-diversant taborunda davam etməyə qərar verir. Vətən naminə göstərdiyi qəhrəmanlıqlar bir-birini əvəz edir.

Gizir Pəncəli Teymurov 17 il Azərbaycan ordusunun sıralarında öz doğma Vətənini göz-bəbəyi kimi qoruyur, 2016-cı ilin Aprel döyüşlərində ona olan sonuncu borcunu şərəflə yerinə yetirir və Şəhidlik zirvəsinə ucalır.

Allah rəhmət eləsin!

Zəfər ORUCOĞLU

525-ci qəzet.- 2024.- 2 may,№76.-S.13.