"Keçmiş tələbələrimiz bu gün auditoriyaya müəllim kimi daxil olurlar"

Vüqar Zifəroğlu: "BDU-nun jurnalistika fakültəsi ənənəsi olan fakültədir və bizim borcumuz müəllimlərimizin, ustadlarımızın bu yolunu davam etdirməkdir"

Bakı Dövlət Universitetinin (BDU) Jurnalistika fakültəsi öz ab-havası, fərqli mühitilə başqa təhsil ocaqlarından həmişə seçilib. Əvvəllər bu barədə bir vaxtlar bu fakültədə təhsil almış, indi ölkənin adlı-sanlı qələm sahibləri olan jurnalistlərin yazdıqlarından, dediklərindən oxuyur, eşidirdik, artıq indi tələbə kimi deyilənlərin əyani şahidi oluruq. Və yəqin ki, bu fəqliliyin səbəbi bir deyil, çoxdur. Yoxsa ki, tək bir məqamla bu ənənəni illər uzunu qoruyub saxlamaq mümkün olmazdı.

Bəs BDU-nun Jurnalistika fakültəsinin əldə etdiyi bu uğurlu nəticələrin arxasında hansı məqamlar dayanır? Bu suallara cavab tapmaq istəyilə fakültənin dekanı Vüqar Zifəroğluya müraciət etdik.

- Vüqar müəllim, ötən illərlə müqayisədə fakültədə hansı dəyişikliklər olub?

- Birincisi, bizim tədris korpusumuz tam şəkildə təmir edilib. Son dərəcə keyfiyyətli təmirlə yanaşı, yeni auditoriyalarımız texniki avadanlıqlarla təmin olunub. Şübhəsiz ki, bu amillər tədrisə müsbət təsir göstərir. Yaradılan bu şəraitə görə universitet rəhbərliyinə təşəkkürümü bildirirəm.

Fakültəyə gəlincə, yeniliklərə imza atmağa çalışırıq. Son beş-altı ildə biz maksimum dərəcədə dərs saatlarından əlavə, praktik təlimlərə də üstünlük veririk. Peşəkar jurnalistlərimizlə, ictimai-siyasi xadimlərlə görüşlər keçirilir, sahə jurnalistikasıyla bağlı ayrı-ayrı təlimlər təşkil olunur. Medianın İnkişaf Agentliyi ilə, Mətbuat Şurası ilə, Audivizual Şura ilə çox sıx münasibətlərimiz var. Həm bu münasibətlər, həm də universitet rəhbərliyinin yaratdığı şərait bizi daha yeni və maraqlı layihələrə imza atmağa ürəkləndirir. Yeni tədris ili başlayandan fakültəmizdə iki otağın açılışı oldu. Bunlardan biri Mətbuat Şurasının otağıdır. Məqsəd Mətbuat Şurasının xətti ilə müxtəlif media kapitanları, Mətbuat Şurası İdarə Heyətinin üzvü olan peşəkar jurnalistlərimizlə tələbələrimizin görüşünü təşkil etməkdir. Bir məqsədimiz də Mətbuat Şurasının Şikayətlər Komissiyasının və Etika Komissiyasının toplantılarını fakültəmizdə keçirməkdir. Artıq Şikayətlər üzrə Komissiyanın 2 toplantısı tələbələrimizin iştirakı ilə fakültəmizdə keçirilib. Tələbələrimiz bu toplantılarda iştirak etməklə Azərbaycan media mühitindəki mövcud çatışmazlıqlarla tanış olurlar ki, gələcək fəaliyyətlərində oxşar hüquq pozuntularına yol verməsinlər. İkinci otağımız isə Cənubi Qafqazda ilk xəbər kanalı olan ARB 24 kanalının otağıdır. Ümumiyyətlə, ARB 24 kanalı ilə universitetimizin sıx əməkdaşlığı mövcuddur. BDU ilə ARB24 kanalı arasında əməkdaşlıq müqaviləsi var. Kanal artıq üç ildir, fakültəmizlə birlikdə "NewsLab" təlim layihəsini həyata keçirir. Bu təlimlərdən müvəffəqiyyətlə keçən tələbələrimiz birbaşa işə götürülür. Xeyli tələbəmiz artıq işlə təmin olunub.

Xüsusi vurğulamaq istəyirəm ki, artıq ARB 24 bizim fakültəmizdən müxtəlif verilişlərində, xəbərlərində bir neçə canlı yayım edib. Hətta universitet əməkdaşları olan ekspertlərin bir neçəsi bizim fakültəmizə gələrək, ARB 24-ün verilişlərinə canlı olaraq qoşulurlar. Təbii ki, başqa planlarımız da var. Bu tədris ilinin sonuna qədər daha iki böyük layihəyə imza atmaq niyyətindəyik.

- Gələcəkdə hansı layihələr nəzərdə tutulur?

- Birincisi ilə bağlı artıq konkret işlər gedir. Media İnkişaf Agentliyinin xətti ilə fakültəmizdə ən yeni avadanlıqlarla, xüsusi texnika ilə təchiz edilmiş 50 nəfərlik təlim otağı açılacaq və Media İnkişaf Agentliyi öz təlimlərinin bir qismini fakültədə həyata keçirəcək. Bu, Media İnkişaf Agentliyi ilə BDU arasında bağlanmış əməkdaşlıq barədə müqaviləsi çərçivəsində həyata keçiriləcək. Bizim fakültə jurnalistika təhsili verən, qocaman fakültə olmaqla yanaşı, ən çox tələbə sayına görə də seçilən fakültədir və agentliyin təlimlərinin əksəriyyətində bizim könüllülər böyük həvəslə iştirak edirlər. İkinci böyük layihə yenə də bir spesifik otağın açılmasıdır. İyul ayının sonuna qədər xüsusi debat otağının açmağı düşünürük. Mənə elə gəlir ki, ali məktəblərin heç birində xüsusi dizayn edilmiş debat otağı yoxdur və belə bir ilkə imza atmaq, məncə, olduqca səmərəli olar. Bu məsələdə "Xalq qəzeti"nin, qəzetin baş redaktoru Əflatun Amaşovun dəstəyini vurğulamaq istərdim. Paralel olaraq fakültəmizdə üç təlim prosesinə start verilib. Oktyabr ayından Audiovizual Şuranın tələbələrimiz üçün ayda bir dəfə olmaqla təlimləri keçirilir. Həmin təlimlərdə audiovizual media quruluşlarının hüquqi tənzimlənməsindən tutmuş, məsələn, reytinqlərin hesablanmasına qədər bir çox məsələlər barədə hazır nümunələr əsasında məlumatlar verilir. Həmçinin aprel ayından Mətbuat Şurası, "525-ci qəzet" və fakültəmizin mədəniyyət sahəsindən yazmağa marağı olan tələbələr üçün xüsusi təlim prosesinə start vermişik. Artıq üç təlim baş tutub və sözün həqiqi mənasında imza sahibi dəyərli həmkarlarımız fakültəmizdə təlimlər keçiblər. Bunlarla yanaşı, fakültəmizin tədris-teleradio studiyasında tələbələr üçün professional montaj təliminə start vermişik. Təqribən 60-dan yuxarı müraciət olub və tələbələr həvəslə bu təlimə qoşulurlar.

Bu otaqların açılması həm cümhuriyyətimizin yadigarı olan universitetimizin - elm məbədgahının 105 illik yubileyinə, həm Jurnalistika fakültəsinin 55 illiyinə, həm də unudulmaz ustadımız Şirməmməd Hüseynovun 100 illiyinə anlamlı hədiyyədir. Bu yubileylər ilində Jurnalistika fakültəsi olaraq maksimum dərəcədə yaddaqalan işlərə imza atmaq istəyirik. Təbii ki, bütün bunlara görə universitet rəhbərliyinə, həmçinin hər zaman yanımızda olan Mətbuat Şurasına, Medianın İnkişafı Agentliyinə, Audiovizual Şuraya, eləcə də hər zaman dəstəklərini hiss etdiyimiz dəyərli həmkarlarımıza öz dərin təşəkkürümü bildirirəm.

- Dediniz ki, fakültəyə qonaqlar dəvət olunur. Sonuncu qonaqlardan biri Xarici İşlər Nazirliyinin Mətbuat Xidmətinin rəhbəri Ayxan Hacızadə olub. Həmin şəxslərin tələbələrlə görüşünün əhəmiyyətləri nələrdir? Bundan sonra kimlərin dəvət olunması nəzərdə tutulur?

- Fakültədə hər həftə ən azı dörd-beş belə tədbir keçirilir. Hətta elə vaxt olur ki, gündə iki tədbirimiz olur. Gələnlərin də hamısı seçkin, sayğılı, eyni zamanda öz sahəsi üzrə peşəkarlığını təsdiq etmiş dəyərli insanlardır. Ayxan müəllimlə görüş də, hesab edirəm ki, tələbələrimiz üçün unudulmaz, yaddaqalan bir görüş oldu. Xarici İşlər Nazirliyi ilə belə bir praktikamız əvvəl də olmuşdu. 2018-ci ildə biz "Beynəlxalq jurnalistika məktəbi" adlı təlim proqramına start vermişdik və iki ay davam edən bu proqram çərçivəsində XİN-in mətbuat xidmətinin o zamanki rəhbəri, Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyevlə görüş keçirmişdik. Ümumiyyətlə, belə görüşlər tələbələrin peşəkar kimi yetişmələri üçün çox əhəmiyyətlidir. Ayxan müəllimlə keçirilən görüşdə də, o, əsasən praktik məsləhətlər verməklə əslində tələbələr üçün həm də bir peşəkarın iş təcrübəsini bölüşmüş oldu. Tələbələrimiz tədbirdə çox aktiv iştirak etdilər, geosiyasi proseslər, regionda baş verən hadisələrlə əlaqəli çox maraqlı suallar verdilər. Bizim Mətbuat Şurasının otağında da media kapitanları ilə görüşlərimiz keçirilir, artıq bir neçə görüş olub və bu görüşlər çox maraqlı keçib.

- Fakültədə bakalavr üzrə SABAH qruplarının açılması gözlənilirmi?

- Magistraturada artıq SABAH qrupu var. Bu il ikinci dəfədir ki, qəbul həyata keçirilir. Məqsəd bakalavr üzrə jurnalistika təhsili olmayan, lakin bu sahəyə marağı olan gəncləri Jurnalistika üzrə təhsilə cəlb etməkdir. Çox maraqlı ideyadır. Təkliflər var, proses hələ "bişməlidir". Mən inanıram ki, bu təkliflər dinləniləcək və qəbul ediləcək. Bu gün bizim qarşımıza qoyduğumuz məqsəd daha çox "ictimaiyyətlə əlaqələr'' ixtisasının açılmasıdır. Bu gün hər birimiz bu və ya başqa dərəcədə mətbuat xidmətlərinin ictimaiyyətlə əlaqələr sektorlarının fəaliyyətini ya təqdir edirik, ya tənqid edirik, yəni birmənalı münasibət yoxdur. Hesab edirəm ki, bu sahədə peşəkar kadrların hazırlanmasına ehtiyac var. Bir çox ölkədə jurnalistika ilə bağlı fakültələrin hamısında bu sahəylə bağlı ali təhsil verən ixtisas var. Məzunlar olur ki, magistratura pilləsində sırf bu təhsili almaq üçün Türkiyə və ya Qərbi Avropa ölkələrinə müraciət edirlər. Niyə bu sahə bizdə də olmasın? Bizim bu təklifimizə dəstək verənlər çoxdur. İnanıram ki, yaxın zamanlarda bu məqsədimizə nail olacağıq.

- Keçmiş məzunların müəllim kimi fakülətdə qaldığı hallar da var. Bu zaman hansı kriteriyalara önəm verilir?

- BDU-nun Jurnalistika fakültəsi öz ənənəsi olan fakültədir. Jurnalistika fakültəsi hər zaman öz dəyərləri, prinsipləri ilə seçilən fakültə olub. Bizim borcumuz müəllimlərimizdən, ustadlarımızdan gördüyümüz bu yolu davam etdirməkdir. Mən də tələbə olmuşam, müəllimlərim mənə belə bir imkan yaradıblar. Biz öz müəllimlərimizdən belə görmüşük ki, nəsillər arasında rabitə qırılmasın. Buna hər zaman çalışmışıq və çalışırıq. Həmin tələbələr də bizim öz yetişdirdiyimiz tələbələrimiz, övladlarımızdır. Özünü təsdiq edən, müsbət mənada o sınaqlardan çıxan tələbələrimizi biz müəllim kimi fakültədə saxlayırıq. Fakültəmizdə özünü doğruldan xeyli sayda keçmiş tələbəmiz var və onlar artıq müəllim kimi auditoriyaya daxil olurlar. Mənə elə gəlir ki, bu, çox gözəl ənənədir və bundan sonra da davam etdirilməlidir.

Sevinc YARMƏMMƏDOVA

BDU-nun Jurnalistika fakültəsinin birinci kurs tələbəsi

525-ci qəzet.- 2024.- 8 may,№80.- S.8.