Ön sıraya çıxdıq, Ustad!

"Mübarizə bu gün də var, yarın da,

Mən də onun ən ön sıralarında".

Xalq şairi Rəsul Rza

Xəbər çatdırım Sizə,

Sizin ardınızca ön sıraya

çıxdıq, ustad!

Qondarma sərhədləri,

Səngərləri həmlə-həmlə

yıxdıq, ustad!..

Doğma yurdun havasında

Babaların nəfəsini duya-duya

Elə o nəfəslə, o sevgiylə

Qalxdıq sıldırımları,

Qovuşduq ucalığa - Şuşaya!..

Çıxdıq Zəngiyə, Laçına, Kəlbəcərə,

Sonra da Xankəndiyə...

İmkan vermədik

yurdumuza köçürülən haylar

Xaçlarını yamaya

Qədim Alban xaçına...

Yol açılmalıdı Naxçıvana!..

Neçə doğma məkana yol açılmalıdı:

İradə var, məram var!..

O yurdlarda yollara baxan,

əlləri qoynunda neçə-neçə anam var!..

Aydınlıq gətirdik, ustad,

Tarixin qarışıq yoluna, izinə.

Vüqarla, açıq alınla baxdıq

Üfüqlərin, səhərlərin üzünə!..

Uğurlar aldıq Qaf dağından.

Qorxmadıq mühitin, zamanın

Qaralığından, qaranlığından...

Şəhidsiz, qazisiz

olmaz ki zəfər, bildik!

Birliyimiz olsun,

şərin yolunu kəsər, bildik!..

Ön sıradayıq, ustad,

Mübarizə meydanında!..

Bəlli, görüləcək çox iş var

Məqamında, zamanında...

Durulacaq axarlarımız -

Yaranacaq yaşıl həyat...

Mübarizənin ön sırası

Bəzən öz yanınızdan keçir, ustad...

Biz də çalışdıq ata kimi,

yazar kimi,

Ön sıraya çıxdı

Yetirməmiz - neçə-neçə igid oğul...

Eldost, Sahib, Mənsur, Toğrul!..

Bu gün də ön sırada

Vətənin xeyir-duası ılə

Alnı xınalı Vətən oğulları var!..

Vətənin yolunda

Yanan işıqlardı

Vətən uğrunda döyüşə atılan oğullar!..

Hələ neçə-neçə ön sıraya...

Neçə-neçə qələbəyə acıq...

O işıqların altından keçirik, keçəcəyik

Üzüağ, alnıaçıq!..

lll

Ustad, o ön sıraya

Bütöv bir xalq yürüdü.

Dedik, əzilmişik, qalxaq,

Kükrədi haqq, yürüdü!..

Bizi haqlı bilənlər,

Yaxın, uzaq yürüdü...

Hamı döndü özünə -

Azərbaycan sözünə!..

Uğur güldü üzünə,

Bir şanlı çağ, yürüdü...

Nida-bayraq bir Ərdə,

O Ər - Ulu sərkərdə!..

Sərkərdə neçə yerdə

Asdı bayraq, yürüdü...

Ərlər tarixdən yenə,

Keçib gəldi bu günə!..

Neçə ulu ərənə,

Çatdı soraq, yürüdü...

Bəy oğullar özləndi,

Ad-san ilə süsləndi!..

Zəfər kənd-kənd səsləndi,

Ocaq-ocaq yürüdu...

Şəhid, qazi - şan bizə,

Yolumuz - mübarizə!..

Bir tarix üstümüzə,

Açdı qucaq, yürüdü!..

Musa ASLANXANLI

525-ci qəzet.- 2024.- 9 may,№81.- S.14.