"Hələ də
parlaq Zəfərimizə layiq bir irihəcmli səhnə əsəri yazılmayıb"
Xalq artisti Firəngiz Əlizadə: "Marşlar,
mahnılar çox yazılıb, lakin hələ də qələbəyə
layiq bir musiqi əsəri görməmişəm"
"
Müsahibimiz Azərbaycan Bəstəkarlar İttifaqının
sədri, bəstəkar, Xalq artisti Firəngiz Əlizadədir.
- Firəngiz xanım, yaxınlarda gənc bəstəkarların
yaradıcılığına həsr olunmuş plenum tədbirlər
keçiriləcək. Söhbətimizə də elə bu məsələdən
başlayaq.
- Biz belə plenum tədbirləri müntəzəm
şəkildə keçiririk. Böyük bir layihəmiz
gerçəkləşəcək, tədbirdə 40
yaşına qədər yazıb-yaradan bəstəkarların
musiqiləri ifa olunacaq. Çalışırıq daha
çox yeni əsərlərə yer verək. Tədbirlər
mayın 15-də başlayıb 20-i başa çatacaq. May
ayının 16-da isə elmi
konfransımız olacaq, bir sıra mövzular ətrafında
müzakirələr aparılacaq. Tədbirlərimizin zirvəsi
kimi ayın 17-də filarmoniyada simfonik orkestrin ifasında bəstəkarların
əsərləri ifa olunacaq. Tədbirin son günündə
- ayın 20-də isə dəyirmi masamız olacaq, bu günlərdə
səsləndirilən əsərlərin müzakirəsi
aparılacaq. Artıq bununla bağlı hazırlıq işləri
görürük.
- Firəngiz xanım, Siz xaricdə
yaşayırdınız. Bəs necə oldu Azərbaycana
qayıtdınız?
- Azərbaycan Bəstəkarlar İttifaqının
8-ci qurultayı keçirildi.
Orada 105 əsər səsləndirildi. Xarici ölkədən
qonaqlar dəvət etdik və orada səsçoxluğu ilə
sədr seçildim.
- Yəni siz qayıtmasaydınız, sədrliyə
layiq başqa kimsə tapılmayacaqdı?
- Heç nə deyə bilmərəm, vəziyyət
belə yarandı. Mən özümü heç kəsdən
yuxarı aparmaq istəmirəm.
- Bu gün ölkəmizdəki gənc bəstəkarların
fəaliyyəti sizi qane edirmi?
- Sevindirici haldır ki, gənc istedadlı bəstəkarlarımız
var. Musiqi baxmından çox zəngin bir ölkədə
yaşayırıq. Yazıb-yaratmaq böyük zəhmət,
yüksək peşəkarlıq tələb edir. Çox
adam ad çəkmək istəmir, amma mən Tural Məmmədli,
İlahə Qismət, Vəfa Bağırzadə, Vüqar Məmmədzadə
kimi seçilən gənc bəstəkarların
adlarını qeyd etmək istəyərdim.
- Bəs orkestr ifaları necə?
- Böyük ümodlə gözləyirik ki, yeni
musiqi əsərləri səsləndiriləcək. Ümid
edirəm, ifaçılarımız bu musiqiləri layiqincə
müşayiət edəcəklər.
- Necə düşünürsünüz, bəstəkarla
ifaçı arasında bağ necə qurulmalıdır?
- Hər dəfə qeyd edirəm, bəstəkar əsər
yazanda öz ifaçısını tanımalı və
daima onunla təmasda olmalıdır ki, musiqi layiqincə səsləndirilsin.
- Bəstələriniz bir çox ölkələrdə
ifa olunur, YUNESKO adınızı ən nüfuzlu bəstəkarlar
siyahısına daxil edib. Səhv etmirəmsə, orada
keçmiş Sovetlər İttifaqından olan və ölkəmizi
təmsil edən yeganə nümayəndə siz olmusunuz. Bəs
öz ölkədə fəaliyyətiniz necə
qarşılanır?
- Bizdə elə insanlar var ki, bir faiz işləyib 99
faiz reklam olunurlar. Mən
yazıb-yaradıram. Kimin istəyi necədirsə, elə də
hərəkət edir. Düşünürəm ki, qalan
işləri
musiqişünaslarımız, mediamız görməlidir.
Hazırda Amsterdamda səslənəcək yeni bir əsər
üzərində çalışıram.
- Sizcə, ölkəmizdə klassik musiqiyə maraq qənaətbəxşdirmi?
- Üzeyir Hacıbəyli çox
üzülürdü ki, ölkəmizdə opera, simfonik
musiqi yoxdur. Üzeyir bəy bütün həyatını
buna həsr elədi. Hazırda ölkəmizdəki
musiqiçilər eyni anda bir çox yerdə işləyirlər.
Dəfələrlə təklif eləmişəm ki,
uzunmüddətli məşqlər edib, bir əsər ortaya
qoyaq. Amma musiqiçilərin vaxt məhdudluğu ucbatından
bunu edə bilmirik.
- Bəlkə onlar maddi ehtiyaclarına görə bir
neçə yerdə fəaliyyət göstərirlər?
- Heç nə deyə bilmərəm.
Şükür Allaha, digər dövlətlərə
baxanda bizim ölkəmizdə vəziyyəti
qat-qat yaxşıdır. Onu qeyd edim ki, hələ də Vətən
müharibəsindəki parlaq Zəfərimizə layiq bir irihəcmli
səhnə əsəri yazılmayıb. Bəstəkarlarımız
marşlar, mahnılar çox yazıblar, lakin hələ də
qələbəyə layiq bir musiqi əsəri görməmişəm.
- Təcrübəli bəstəkarlardan biri də
sizsiniz. Bu mövzuda siz özünüz hansısa bir əsər
yazmısınız?
- Yazmağı düşünürəm.
Son olaraq da qeyd etmək istəyirəm ki, sizləri gənc
bəstəkarların plenum tədbirlərinə dəvət
edirəm. İnanıram ki, hər dinləyici konsertlərdə
maraqlı kəşflər edəcəklər.
Havar ŞƏFİYEVA