Qələmsiz
yazılanlar
status-esselər
"Dünyada Üzeyir bəyin musiqisindən gözəl
musiqi yoxdur. Sizin Şuşa uğrunda, Qarabağ uğrunda, Azərbaycanın
ərazi bütövlüyü uğrunda apardığınız
mübarizəni yalnız Üzeyir bəyin musiqisi ilə
müqayisə etmək olar: gözəl, təntənəli,
möhtəşəm və əbədi! Bütün bunlara
görə çox sağ olun".
Mayın 10-da Prezident İlham Əliyev və birinci
xanım Mehriban Əliyeva Şuşada birinci
yaşayış kompleksinin açılışında
iştirak etdi və şəhərə
köçmüş ilk sakinlərlə
görüşdülər. Dövlətimizin
başçısı və birinci xanım mənzillərin
açarlarını sakinlərə təqdim etdilər.
Sakinlər Prezident İlham Əliyevə və birinci xanım
Mehriban Əliyevaya minnətdarlıqlarını bildirdilər.
Şuşaya ilk köçən sakinlər
sırasında həmkarımız,
yazıçı-jurnalist Kərim Kərimli və ailəsi də
vardı. Kərimin yerinə çox sevindim, VII
"Xarıbülbül" Beynəlxalq Musiqi
Festivalının açılışında onu
bağrıma basıb, təbrik etdim. İşğal illərində
Şuşa haqqında onlarla məqalənin, neçə-neçə
kitabın müəllifi və redaktoru olan dostumuz Kərimi təbrik
etməkdən, onu belə xoşbəxt görməkdən
üstün nə ola bilərdi ki? Deyir, 4 otaqlı evimin birini
dostlarım, qonaqlarım üçün saxlayacağam, gələrsiniz,
kəkotulu çayımı içərsiniz.
İstedadlı qələm dostumuz Kərimin
yaşayış kompleksinin açılış mərasimindəki
çıxışından yuxarıda sitat gətirdiyim, cənab
Prezidentə ünvanladığı minnətdarlıq
duyğusuyla dolu bu fikirləri isə söz-söz
yaddaşıma həkk olundu.
Əminəm ki, Kərim Şuşada
ömrünün ən qayğısız, xoşbəxt illərini
yaşayacaq, Şuşa haqqında ən gözəl
yazılarını hələ bundan sonra yazacaqdır.
lll
Sirr xarakterdədir!
Sən əgər tanımaza-bilməzə gözəl
təşəbbüsləri dəstəkləyirsənsə,
yaxşı işləri, istedadlı insanları ürəkdən,
təmənnasız dəyərləndirirsənsə, bu,
izsiz qalmır. İnsanlarımız minnətdarlıq
duyğusundan, ədalət hissindən xali deyil!
lll
Sevindikləri hadisənin fəlakət gətirəcəyini
bilmirdilər.
lll
Böyük oyunçuların böyük dərdi
var.
lll
Doğrudan da, həqiqət bir anda aydın olur.
lll
Heç kim heç nə bilmir.
lll
Unutdura bilən tək şey qadın gözəlliyidir.
lll
Canfəşanlığın məkrli səbəbi
vardı.
lll
Satqınlıq xislətdədir...
lll
Nədəsə təskinlik tapmalısan, nəyəsə
söykənməlisən.
lll
İnanmadığınla söhbət alınmır.
lll
Dərdsiz adam yoxdur.
lll
Özünü oda-közə vurmağın sonu pərvanə
taleyidir.
lll
Bir fikri iyirmi dəfə eyni şəkildə təkrarlamaq
qrafomanlıqdırsa, iyirmi variantda söyləmək qabiliyyətdir.
lll
"Dağlar Şuşamıza nərdivandısa,
Birinci pilləsi Lələtəpədir".
"Aprel döyüşləri"nin
ildönümünə həsr olunmuş "Zəfərin 4
anı" tədbirinin təşkilatçısı Sevinc
Orucovaya, tədbirin müəllifi İlqar Fəhmiyə,
rejissoru Nicat Kazımova təşəkkür
düşür. Şəhidlərimizin xatirəsi təsirli
və səviyyəli poetik nümunələrlə, peşəkar
aktyor oyunu və usta rejissor təqdimatıyla yad edildi. Gözəl
şair Əşrəf Veysəllinin yuxarıda misal gətirdiyim
məşhur şeirindəki bu misralar isə tədbirin ana xəttini
müəyyən edirdi.
lll
İnsanlara yuxarıdan aşağı baxmaq,
onları aşağılamaq naqis keyfiyyətdir.
lll
Xəyallar tükənəndə ömür mənasızlaşır.
lll
Gürcüstanda yaşayan həmkarımız Cəmilə
Babayevanın
Gürcüstanda Azərbaycanın zəngin mədəni
irsi haqqında araşdırma materiallarını təqdim
etdiyi www.aziz.ge müəllif saytı yaxşı təşəbbüsdür.
Həmkarımızı təbrik edir, uğurlar arzulayır,
həmvətənlərimizin bu gözəl təşəbbüsə
dəstək olacağına inanırıq.
lll
Sənət həyəcandan yaranır.
lll
Bəzən yuxunu xatırlamırsan. Amma
yaratdığı ovqat ayılandan sonra da səni tərk
etmir. Yuxunun süjetini təxmini hiss edirsən.
lll
Təmənnalı tərif sözlərin
düzülüşündən bilinir.
lll
Dünyanın gələcəyi ilə bağlı o
qədər qorxunc proqnozlar verilir ki, keçmişə xəfif
xiffət yaranır. İnsan dominant olmayacaq, insana şərik,
onu sıradan çıxaran, ondan da üstün süni
intellekt yaranacaq. Bu barədə bir az da vahiməli təxəyyüllər
keçmişin insan üçün daha yaşamalı,
münbit dövr olduğuna inam yaradır. Geriyə
dönüş mümkün olmasa da, insanlar keçmişə
qayıtmağı daha çox arzulamağa başlayır. Bəs
siz hansını seçərdiniz: keçmişimi, gələcəyimi?
lll
Yazıçılıq, Pamuk demiş, iynəylə
quyu qazmaqdır. Qaza bilən qazsın!..
lll
İndi kofe dəbə minməyə başlasa da,
çayın əvəzini verməz!
"Çay" mahnısı isə təbrizli və
lənkəranlı, o taylı-bu taylı azərbaycanlıların
yaratdıqları "Şuşa" qrupunun ifasında daha rəngarəng
alınıb.
Türkiyədə təhsil alan təbrizli xanım
Aynaz Rəhimzadəni ilk dəfə Ankarada TÜRKSOY-un tədbirində
görmüşdüm, milli musiqimizin məlahətli və
ürəkdən ifasına valeh olmuşdum.
lll
Unudacaqdınsa, yaşadıqlarının nə mənası
vardı?
lll
İpək "narahat"a "rahatsız" deyir.
Məncə, düz deyir.
lll
Adlar fikirlərdən önə keçib.
Statusu görəndə bilirsən ki, bu profil hansı
yönümlüdür, nə yazacaq, necə şərh verəcək,
kimin tərəfindədir. Bu qarışıq dövrdə
bu qədər aydınlıq da qəribədir. Bir tərəfdən
heç kim heç nə bilmir, bir yandan da hamı hər
şeyi bilir.
lll
Boş danışanlar çoxalıb.
lll
Kövrəlmək yaxşı əlamətdir.
lll
Hər kəsin uğur qazanmaq, özünü təsdiq
etmək arzusu başadüşüləndir.
Amma istedad və ardıcıl zəhmət çəkmək
inadı hamıda olmur.
Özünü gözə soxanlardan,
gördüyü xırda işləri bəh-bəhlə tərifləyənlərdən
fərqli olaraq, başını aşağı salıb, sevərək
öz işi ilə məşğul olanlar sonda daha çox
uğur və ehtiram qazanırlar.
lll
Tıxaca düşəndən sonra tələsməyin
anlamı qalmır.
lll
Adam işin çoxluğundan yox, insanların
laqeydliyindən, biganəliyindən,
etinasızlığından yorulur.
lll
Uzaqda görünən hadisələr sürətlə
keçmişə çevrilir. Zamanın sürəti
yaşadıqlarından zövq almağa imkan vermir.
lll
Səhər açılan kimi bəd xəbərlər
yaymağa tələsməyin. İmkan verin insanlar günə
nikbin ovqatda başlasınlar.
Günəşə bənzəməyə
çalışın!
lll
Beş dəqiqədən artıq dinlənilməsi
mümkün olmayan primitiv adamlara televiziyaların saatlarla vaxt
ayırması çox
düşündürücüdür. Görünür, belə
adamları dinləməkdən zövq alanlar çoxluq təşkil
edir. Dinləyən olmasa, onlara meydan verilməz.
lll
Ağlınızdan keçən hər sərsəm
fikri sosial şəbəkədə paylaşmağa məcbur
deyilsiniz. Bir az səbir edin, ovqatınız dəyişəcək
lll
Siz Teylor Qrini tanıyırsınızmı?
lll
Jurnalistlər və yazıçılar hər yerdə
bir-birinə bənzəyir.
lll
Müəllim adını uca tutmaq, onunla qürur duymaq
gərəkdir. Çünki müəllim obrazı
ömür boyu bizimlə yaşayır. Siması daim
gözümüzdə canlanan, unutmadığımız,
xoş xatırladığımız insanlar sırasında
müəllimlər daha çox olur. Onlar təkcə öyrətdikləriylə
yadda qalmır, həm də öz auralarıyla həyatımız
boyu bizə bələdçi olurlar. Müəllim
adının ucalığını qorumaq, ondan güc almaq
insanın həyatda möhkəm dayağı, etibarlı
söykənəcəyidi...
lll
Aşiq olmaq, sevmək ləyaqətsizliyə
yuvarlandırır?
lll
Kapitalizmi arzulayan kim idi?
lll
Postinsan mərhələsi...
lll
Futbol da dinə çevrilməkdədir.
lll
Hərdən belə fikirlər oxuyuram:
"Qurban Qurbanov Avropa klubuna gedir" və s.
Soyuqqanlı baxıram, inanmıram.
Qurban Qurbanov "Qarabağ"ı qoyub heç yana
getməz!
lll
Gənclik həm də yata bilmək, yuxunu sevmək,
yuxulu olmaqdır.
lll
Bu tempə dözmək çətindir. Nəfəs
kəsir.
lll
Qocaların gözü qapıda qalır
lll
11-ci dəfə azad Şuşada...
lll
Zeynəb Xanlarova əfsanədir. Bunu dəfələrlə
demişəm, bilməyənlər də bilməlidir.
VII Xarıbülbül Beynəlxalq Musiqi
festivalının açılışında Cıdır
düzündə böyük sənətkarımızla
görüşmək çox xoş oldu. Azad Şuşaya
ilk dəfə gəlirdi. Konsertdə də gənclik ruhu və
şövqlə elə çıxış etdi ki, heç
deməzdin yaşı 90-a yaxınlaşır.
lll
Ustadlar - Xalq artistləri Ramiz Quliyev və Ağaverdi
Paşayev Şuşada, Güllü bağda ağcabədili
yeniyetmə, tar həvəskarı Məcid Məmmədova
ustad dərsi keçdilər. VII Xarıbülbül musiqi
festivalının açılışına gələn mədəniyyət
xadimləri mayın 11-də səhər "Qarabağ"
otelinin qarşısında Məcidin ifa etdiyi məşhur
"Şuşanın dağları" mahnısını
dinləyib, ustad tövsiyələrini verdilər. Hadisə həm
də Şuşanın musiqi ənənələrinin əbədiyaşarılığına
bir işarə idi.
lll
Yuxudan harda oyanmağın ovqata və ruha təsiri
var. Şuşada, Laçında, Ağcakənddə səhər
tezdən oyanıb dupduru havanı sinənə çəkməyin
rahatlığı əvəzolunmazdır. Üstəlik,
ruhun pıçıldadıqları adama qol-qanad verir
lll
Nanəcib adamlar həmişə tapılacaq.
lll
Kinini boğa bilmək, içinin xıltını
büruzə verməmək böyük bacarıqdır.
lll
Candərdi çıxış o dəqiqə hiss
olunur.
Rəşad MƏCİD
"525-ci qəzet"in baş redaktoru, Azərbaycan
Yazıçılar Birliyinin sədr müavini
525-ci qəzet.- 2024.- 18 may,№87.- S.9.