Milli Konservatoriya: nailiyyətlər və yeni layihələr

Azərbaycan Milli Konservatoriyasında "Nailiyyətlər və yeni layihələr" mövzusunda növbəti mətbuat konfransı keçirilib. Tədbirdə Milli Konservatoriyanın fəaliyyət göstərdiyi 25 il ərzində qazanılan uğurlara nəzər salınıb, əldə olunan nailiyyətlər və gələcəkdə həyata keçirilməsi nəzərdə tutulan yeni layihələr haqqında məlumat verilib.

Media nümayəndələrinin suallarını cavablandıran Azərbaycan Milli Konservatoriyasının rektoru, Xalq artisti Siyavuş Kərimi son illər Qazaxıstan və Özbəkistandan rəhbərlik etdiyi təhsil ocağına tələbə axını müşahidə olunduğunu bildirib: "Qazaxıstan və Özbəkistandan tələbələrin elmi dərəcələrini yüksəltmək üçün Azərbaycan Milli Konservatoriyasına üz tutmaları bizim üçün müsbət haldır. Biz bununla həm öz milli mədəniyyətimizi təbliğ edir, həm də onların mədəniyyətilə tanış oluruq. Bizim müəllimlərin yüksək səviyyəli münasibətlərinə, tədris metodlarına görə hər il həmin ölkələrdən xeyli tələbə konservatoriyaya axın edir".

Siyavuş Kərimi qeyd edib ki, Naxçıvan musiqi mühitinin Azərbaycan mədəniyyətinin ümumi inkişaf tempindən geri qalmaması üçün Milli Konservatoriya öz köməyini əsirgəmir: "Naxçıvanın musiqi mühiti neçə vaxtdır, Azərbaycan mədəniyyətinin inkişaf tempindən kənarda qalıb. Konservatoriya bu məqsədlə memorandum imzalayıb. Ordakı universitetin tərkibində fəaliyyət göstərən konservatoriyamızda ustad dərsləri keçirilir, Xalq artistləri tərəfindən konsertlər təşkil olunur".

Yeni musiqi alətlərinin yaradılması ilə bağlı suala cavab verən Siyavuş Kərimi bildirib ki, yeni alətin yaranması üçün cəmiyyət onu qəbul etməli və o alətdə ifa edən mütəxəssislər olmalıdır: "Azərbaycan Milli Konservatoriyası yarananda bizim layihələrimizdən biri o idi ki, Azərbaycan milli musiqi alətlərinin təkmilləşdirilməsi və yaradılması laboratoriyası qurulsun. Bu layihə uğurla həyata keçirildi. 2004-2005-ci illərdə biz bəm kamanı yaratdıq. Həmin bəm kamanının və balaban alətinin alternativini ərsəyə gətirdik və onların təqdimatı keçirildi. Hazırda bu alətlərdən istifadə olunur. Bir çox ustalar var ki, onlar öz alətlərini yaratmaq istəyirlər. Amma alət o zaman olar ki, onu cəmiyyət qəbul eləsin".

Siyavuş Kərimi yenicə hazırlanmış "Nəsimi" operası ilə bağlı da fikirlərini bölüşüb: "Nəsimi obrazını canlandıran Əməkdar artist Ramil Qasımov opera ilə bağlı fikrini mənimlə bölüşdükdən sonra librettonu əldə etdim və açığın deyim, iki ay həmin librettoya toxunmadım. Tarixdə operalar çox uzun müddət ərzində yazılıb. Amma pandemiya dövrü imkan verdi ki, bu əsəri qısa müddət ərzində hazırlayım. Altı ay müddətinə operanı bitirdim. Bu işdə konservatoriyanın əməkdaşları mənə çox dəstək oldular. Mən bu əsəri opera kimi görmək istəmirdim. Niyyətim tamam başqa idi. Bu, çox elit janrdır. Təəssüf ki, Azərbaycanda son dəfə bu janra müraciət 53 il qabaq - 1971-ci ildə "Sevil" operası ilə olub. İlk məqsədim o idi ki, dünya Azərbaycan şairini tanısın. İkinci məqsədim isə Azərbaycan kinosunun yeni nəfəs almasıdır. Mən Mədəniyyət Nazirliyinə və Heydər Əliyev Fonduna xüsusilə təşəkkür etmək istəyirəm. Onların dəstəyi ilə bizim əsər Heydər Əliyev Sarayında nümayiş olundu. Mənə ən çox təsir edən məqamlardan biri o oldu ki, iki min nəfərlik zal ağzına kimi dolu idi. Tamaşa bitəndən sonra isə tamaşaçılar düz yarım saat ayaqüstə bizi alqışladılar. Nəsiminin qətlə yetirilməsi səhnəsində obrazın paltarları cırılıb-çıxarılmalı idi. Texniki nasazlıqdan bu zaman onun paltarı üzərindəki mikrofon yerə düşdü. Çoxları bunu problem kimi dəyərləndirdi. Amma mən dedim ki, bu, problem deyil, əksinə, bu, lap yaxşı oldu. Ramil Qasımov o qədər təmiz oxuyurdu ki, bir çoxları elə bilirdi, bu fonoqramdır, canlı ifa deyil. Mikrofon yerə düşəndən sonra səs kəsiləndə hamı başa düşdü ki, bu artıq tamaşaçıya olan dəqiq münasibətdir. Buna görə Ramil Qasımova təşəkkür edirəm".

Tədbirin sonunda Milli Konservatoriyanın yaranmasında Ulu öndər Heydər Əliyevin adını xüsusi vurğulayan Siyavuş Kərimi bu illər ərzində bu təhsil ocağına ayrılan diqqətə görə Azərbaycan Respublikasının Prezidenti cənab İlham Əliyevə minnətdarlığını bildirib.

Ləman İLKİN

525-ci qəzet .- 2024.- 27 noyabr(№217).-S.11.