"Qarabağ Universiteti
mühüm elm-təhsil mərkəzinə çevriləcək"
"Bu universitetin başlıca fəaliyyətinin tədqiqat
əsaslı olması nəzərdə tutulub"
Məlum olduğu kimi, sentyabrın 23-dən etibarən
Qarabağ Universitetində tədris prosesinə
başlanılıb. 2024-2025-ci tədris ili üzrə
Qarabağ Universitetinə 1104 nəfər qəbul olub və qəbul
planı 98,5 faiz dolub. Universitetə qəbul olan tələbələrdən
101 nəfəri 600-dən, 385 nəfəri isə 500-dən
çox bal toplayıb. Ən yüksək nəticə 683,8
balla hüquqşünaslıq ixtisası üzrə qeydə
alınıb. Olimpiada qalibi olan bir abituriyent universitetin elektrik
və elektronika mühəndisliyi ixtisasına müsabiqədənkənar
qəbul edilib. Ümumilikdə, Qarabağ Universitetinə I-IV
ixtisas qrupları üzrə orta qəbul balı 467,6 olub.
Qarabağ Universitetində bu il tədris Azərbaycan və
ingilis dilində aparılacaq, rus dili bölməsi üzrə
qəbul isə yoxdur. İngilis dili bölməsi üzrə
təhsil alacaq tələbələrin birinci ildə dil
biliyinin təkmilləşdirilməsi üçün işlər
görüləcək. Növbəti ildən isə
bütün tədris ingilis dilində aparılacaq. İlk tədris
ilində Qarabağ Universitetində
hüquqşünaslıq, xarici dil müəllimliyi (ingilis
dili), maliyyə və mühasibat ixtisasları üzrə
"SABAH" qrupları təşkil olunub. Müxtəlif ali
təhsil müəssisələrinin birinci tədris ilini
(kursunu) bitirmiş tələbələri arasında
keçirilən müsabiqədə uğur qazanan 60 tələbə
sözügedən 4 ixtisas üzrə Qarabağ Universitetinin
"SABAH" qruplarında ikinci tədris ilində təhsil
alacaq.
İlkin mərhələdə Qarabağ Universitetində
kadr hazırlığı 6 fakültədə - Pedaqoji,
İncəsənət, Humanitar və sosial elmlər,
İqtisadiyyat, Mühəndislik və Turizm fakültələrində
aparılacaq.
Qarabağ Universiteti hazırda Xankəndi şəhərindəki
3 tədris binasında yerləşir. Əsas tədris
binasında Pedaqoji, Mühəndislik, Humanitar və sosial elmlər,
İqtisadiyyat və Turizm fakültələri, 2-ci tədris
binasında İncəsənət fakültəsi, 3-cü tədris
binasında isə Beynəlxalq dil mərkəzi fəaliyyət
göstərir.
Tələbələrin nəzəri biliklərinin
praktiki bacarıqlarla möhkəmləndirilməsi
üçün ilk tədris ilinin müvafiq ehtiyacları nəzərə
alınmaqla universitetdə 6 (Fizika, Kimya, Mexatronika, Robototexnika,
Kompüter və qrafiki dizayn, Kompüter və
proqramlaşdırma) laboratoriya yaradılıb.
Müasir standartlara uyğun şəkildə dizayn
edilmiş universitet kitabxanasının xidmətlərindən
eyni vaxtda 200 tələbə istifadə edə bilər.
Kitabxananın fondunda Azərbaycan, ingilis və rus dillərində
6 mindən çox dərslik və digər ədəbiyyat
mövcuddur. Burada tələbələr "Elektron
kitabxana" sisteminin geniş imkanlarından faydalana bilərlər.
Hazırda universitetin 160 əməkdaşı var.
Onlardan 60 nəfəri akademik heyətin üzvü, 100 nəfəri
isə inzibati və texniki heyətin üzvüdür.
Kadr heyətinin seçimi zamanı Qarabağ Universitetinin
fəaliyyətinin beynəlxalq standartlara uyğun təşkili
üçün vacib olan bilik və bacarıqlara sahib peşəkar
mütəxəssislərə üstünlük verilib.
Hazırda peşəkar və təcrübəli yerli və
xarici professor-müəllim heyətinin akademik fəaliyyətə
cəlb olunması istiqamətində işlər davam
etdirilir. Bu prosesdə xaricdə yaşayan azərbaycanlı
alimlər və müvafiq dövlət proqramları ilə
nüfuzlu xarici ali təhsil müəssisələrində təhsil
alan gənclər diqqət mərkəzində
saxlanılır.
Xatırladaq ki, Prezident İlham Əliyev sentyabrın
20-də Qarabağ Universitetinin təmirdən sonra
açılışında iştirak edib, ali məktəbdə
yaradılan şəraitlə tanış olub.
Qarabağ Universitetinin rektoru Şahin Bayramov bildirir ki,
Qarabağ Universitetində yeni ixtisaslar və fakültələrin
yaradılması nəzərdə tutulur. Universitet rəhbərliyi
dövlət başçısının onların
qarşısında qoyduğu vəzifələrin icrası
üçün maksimum səy göstərəcək:
"İlk tədris ili üçün universitetə 1154 tələbə
qəbul olunub. Hazırda universitetin 160 əməkdaşı
var. Açılış mərasimində dövlət başçısı
doğma Qarabağla bağlı mühüm mesajlar verdi və
bizim qarşımızda müəyyən vəzifələr
qoydu. Biz də bu vəzifələrdən irəli gələrək,
növbəti mərhələlərdə həmin
tapşırıqdan irəli gələn vəzifələri
yerinə yetirmək əzmindəyik".
Ş.Bayramov universitetə qəbul olan tələbələrin
yüksək potensiala malik olduqlarını vurğulayıb:
"Tələbələrimizin potensialı çox yüksəkdir.
Çünki Qarabağ Universitetinə qəbul
imtahanlarında yüksək bal toplayan tələbələr
qəbul olunub. Növbəti mərhələdə universitetimizdə
yeni ixtisaslar və fakültələrin yaradılması ilə
bağlı tapşırıqlar almışıq. Ümumiyyətlə,
universitetin başlıca fəaliyyətinin tədqiqat əsaslı
olması nəzərdə tutulub. Növbəti tədris ilində
universitetimizdə yeni məzmunda tibb fakültəsinin
yaradılması da cənab Prezidentin
tapşırığına daxildir. Qeyd etmək yerinə
düşər ki, Qarabağ Universiteti müasir dövrün
gənclərini Heydər Əliyev ideyalarına sadiq bir vətəndaş
kimi yetişdirməyi nəzərdə tutur".
Azərbaycan Milli Elmlər Akademiyasının (AMEA)
prezidenti, akademik İsa Həbibbəyli bildirib ki, Qarabağ
Universiteti Qarabağın əsas və böyük elmi-mədəni
mərkəzidir. Bu universitet Qarabağı ölkəmizin və
dünyanın əsas elm-təhsil mərkəzlərindən
birinə, Xankəndini isə gənclik şəhərinə
çevirəcək. Qarabağ Universiteti Qarabağ həqiqətlərini
dünyaya çatdıracaq: "Həyata keçirilən
genişmiqyaslı hazırlıq işləri Qarabağ
Universitetinin ilk tədris ilindən başlayaraq böyük hədəflərə
doğru irəliləməsinə tam əsas verir. Azərbaycan
Milli Elmlər Akademiyası Qarabağ Universitetinin daha da
inkişaf etdirilməsi üçün üzərinə
düşən hər cür dəstəyi göstərməyə
hazırdır. Qarabağ Universitetinin açılması
ölkəmizin çoxəsrlik təhsil tarixinin ən
böyük hadisəsidir".
Təhsil eksperti Ramin Nurəliyevin dediyinə görə,
bu il tədrisə hazır vəziyyətə gətirilmiş,
müasir təhsil səviyyəsi və tədris planına
uyğun olan universitetin qəbul üzrə keçid
balları hamı üçün maraqlı idi.
İmtahanlarda yüksək bal toplayan abituriyentlərin
Qarabağ Universitetini ilk sıralarda seçməsi, əlbəttə
ki, bu ali təhsil ocağına marağın, o cümlədən,
keçid ballarının yüksək olacağından xəbər
verirdi. Belə də oldu: "Qarabağ Universitetində
hüquqşünaslıq ixtisasının keçid balı
Bakı Dövlət Universitetinin hüquqşünaslıq
ixtisası ilə eyni səviyyədə oldu. Pedaqoji
ixtisaslardan Azərbaycan dili və ədəbiyyatı
ixtisasının keçid balı Azərbaycan Dövlət
Pedaqoji Universitetinin eyni ixtisasının dövlət
sifarişli yerinin balından yüksək oldu. Bu, Qarabağ
Universitetinin yüksək nüfuzundan xəbər verir. Birinci
ixtisas qrupu üzrə Qarabağ Universitetinə orta qəbul
balı 475, ikinci qrup üzrə 396, üçüncü
qrup üzrə 531, dördüncü qrup üzrə isə
470 olub. I-IV qruplar üzrə ümumi ortalama bal 467,6 olub. Eləcə
də 600 baldan yüksək nəticə göstərən
101 abituriyent Qarabağ Universitetinə qəbul olub. Ehtimal
olunur ki, növbəti illərdə balların yüksəlişi
artan templə davam edəcək və Bakıdakı dövlət
universitetləri ilə Qarabağ Universiteti davamlı rəqabət
halında olacaq".
Millət vəkili Naqif Həmzəyev bildirib ki,
Qarabağ Universiteti Azərbaycanın top 10 universitetindən
biri olacaq: "Hesab edirəm ki, Qarabağ Universiteti ən
qısa zamanda Azərbaycanın ən aparıcı universitetlətindən
biri ola biləcək. Çünki dövlət
qayğısı və diqqəti bu universitetin üzərində
olacaq. Çox faydalı və uğurlu bir fəaliyyətin
baş tutacağına inanıram".
Millət vəkili Arzu Nağıyev qeyd edib ki,
Qarabağda elmə-təhsilə xüsusi qayğı
göstərilib və daimi bu məsələ diqqətdə
saxlanılıb: "Bu baxımdan ali təhsil müəssisəsinin
ilk olaraq məhz Xankəndidə yaradılması xüsusilə
vacibdir. Bu addım həm də regionda yüksək
ixtisaslı kadrların hazırlanması baxımından
olduqca əhəmiyyətlidir. Hesab edirəm ki, Qarabağ
Universiteti gələcəkdə perspektivli ali təhsil müəssisələri
sırasında olacaq. Bu təhsil ocağı 1969-cu ildə
Ulu öndər Heydər Əliyevin Azərbaycanda birinci dəfə
siyasi hakimiyyətə gəldiyi zaman Azərbaycan Pedaqoji
İnstitutunun filialı kimi qurulub, 1973-cü ildən 1988-ci ilədək
ali təhsil müəssisəsi kimi fəaliyyət göstərib,
ərazilərimizin işğalı dövründə isə
ümumiyyətlə, fəaliyyətini dayandırıb".
Rauf Pənciyev deyir ki, ilk tələbələrindən
biri olduğu Qarabağ Universitetində yüksək səviyyədə
tədris üçün hər şərait
yaradılıb: "Xankəndi şəhərində
Qarabağ Universiteti ilk dəfə açılır, mən
bu ali təhsil ocağının ilklərinə imza atanlardan
biriyəm. Həm bu ali təhsil ocağının tələbəsi
olmaq, həm də dövlət başçısının
xeyir-duası ilə təhsil almaq qürurvericidir. Buranın mənim
gələcək karyeramda əsaslı rol oynayacağına
inanıram".
Tələbə Fənarə Məmmədzadə də
universitetdə yaradılan şəraitdən məmnunluğunu
ifadə edib: "Çox sevincli və qürurludur ki,
Qarabağ Universitetinin ilk tələbələrindən biriyəm.
Xüsusilə qeyd etmək istəyirəm ki, cənab
Prezidentlə görüşən tələbələrdən
biri oldum. Görüş həm məsuliyyətli, həm də
çox həyəcanlı idi. Universitetin ilk tələbələri
olaraq, çiyinlərimizə çox şərəfli vəzifə
düşür".
Sevinc QARAYEVA