"Söz adamı: Hidayət Elvüsal"

Bu yaxınlarda Azərbaycan mətbuat tarixində özünəməxsus üslubu ilə seçilən, tanınmış yazıçı-jurnalist Hidayət Elvüsalın 75 illik yubileyinə həsr olunan "Söz adamı: Hidayət Elvüsal" adlı kitab çapdan çıxıb. Hidayət Elvüsal kitabın çapdan çıxmasına bir neçə gün qalmış dünyasını dəyişdiyindən yubileyi münasibətilə hazırlanan bu kitabı görmək ona nəsib olmayıb.

Kitabda müasir Azərbaycan mətbuat tarixində özünəməxsus yer tutan Hidayət Elvüsalın mətbuat orqanlarında çap olunmuş yazıları ilə yanaşı, tələbəlik dostlarının və həmkarlarının onun haqqında söylədikləri ürək sözləri də yer alıb.

Qeyd edək ki, H.Elvüsal sentyabrın 8-də 75 yaşında dünyasını dəyişib. O, 1949-cu il iyunun 25-də Kəlbəcərdə doğulub. Bir sıra mətbu orqanlarda fəaliyyət göstərib. Kəlbəcərdə çıxan "Yenilik" rayon qəzetində, yerli radio verilişləri redaksiyasında çalışmaqla bərabər, Azərbaycan Dövlət Radiosu ilə əməkdaşlıq edib. Daha sonra "Azərbaycan gəncləri", "Kommunist" (indiki "Xalq qəzeti") qəzetlərində işləyib. "Səhər" qəzetinin yaradıcılarından biri, baş redaktorun müavini, "Belə-belə işlər", "Kriminal" qəzetlərinin baş redaktoru olub. Dövri mətbuatda oçerk, müsahibə, reportaj, hekayə və povestləri dərc olunub.

Azərbaycan Mətbuat Şurasının sədri, "525-ci qəzet"in baş redaktoru Rəşad Məcid kitabda yer alan ürək sözlərində qeyd edib ki, Hidayət Elvüsal yaddaşlarda istedadlı bir jurnalist olaraq qalacaq: "Vaxtı ilə "Səhər" qəzetində maraqlı yazıları çıxırdı. Yumor, sarkazm dolu yazılar yazırdı. Hidayət Elvüsal Azərbaycanın klassik jurnalistləri içərisində ən tanınmışlardan biri hesab olunur".

AMEA-nın Nizami Gəncəvi adına Ədəbiyyat İnstitutunun əməkdaşı, AYB-nin üzvü Maral Poladova kitabda yer alan "Jurnalist adını şərəfləndirən Hidayət Elvüsal" adlı yazısında bildirib ki, doğulduğu Kəlbəcərin saf havasından və suyundan ruhlanan Hidayətin bir vaxtlar, hələ universitetə qəbul olunmamışdan əvvəl yazdığı ilk qələm təcrübəsi olan şeir və hekayələri də elə Kəlbəcər rayonunun "Yenilik" qəzetində işıq üzü görüb. Sonralar onun jurnalistlik fəaliyyətinin coğrafiyası böyüyərək, ölkənin sayılıb-seçilən mətbuat orqanlarına doğru istiqamət alıb.

Azərbaycan Respublikası Kinematoqrafçılar İttifaqının redaktoru, tanınmış jurnalist Akif Cabbarlı qeyd edib ki, Hidayət Elvüsal istər sovet dövründə, istərsə də müstəqillik illərində yazdığı hekayələrdə, həyat ettüdlərində baş mövzu kimi əslində öz həyatını, yaşantılarını, rast gəldiyi hadisələri götürürdü və asanlıqla öz bədii məqsədinə çatırdı: "Onun hekayələrində rast gəldiyimiz qəhrəman və personajlar Mirzə Cəlilin və Ə.Haqverdiyevin, Mopassan və Çexovun, eləcə də Əziz Nesinin əsərlərindəki obrazları xatırladır bizə. Düşüncə və danışıq tərzinə, həyat mövqeyinə və istənilən vəziyyətdə özünü aparmaq və bu vəziyyətdən çıxmaq qabiliyyətinə görə. O, obrazları ilə davranmağı, onlarla dostluq etməyi, lazım gələrsə küsüb-barışmağı da asanlıqla bacarır. Yaratdığı obrazlar da Hidayəti sən deyən incitmir, asanlıqla dil tapır, tezliklə ortaq məxrəcə gəlirlər. Hidayətin yaradıcılıq metodologiyası yorucu deyil, novatorluq mahiyyətində, tam orijinaldır. Məhz buna görə də hələ "Səhər" qəzetində işləyərkən "Belə-belə işlər" rubrikası ilə araya-ərsəyə gətirdiyi yazılar əl-əl gəzir, dillərdə dolaşırdı".

Jurnalist Etibar Cəbrayıloğlu vurğulayıb ki, Hidayət Elvüsalı öz ustadlarından biri hesab edir: "Doğrudan da Azərbaycanda uğurlu imzalardan biri də onunla bağlıdır. Çox sevinirəm ki, onunla birgə "Ədalət" qəzetində işləmək mənə də nəsib olub".

Kitabda "Səhər" qəzetinin baş redaktoru olmuş mərhum jurnalist Məzahir Süleymanzadənin uzun illər bir yerdə çalışdığı qələm dostu Hidayət Elvüsal haqqında bir vaxtlar sözlədiyi fikirlərə də yer ayrılıb. Onun dediyinə görə, Hidayət Elvüsala ən böyük qiyməti vaxtilə Xalq şairi Bəxtiyar Vahabzadə verib: "Bəxtiyar Vahabzadə hər gün bizim redaksiyaya zəng edib Hidayət Elvüsalın "Belə-belə işlər" rubrikasında çıxan yazıları ilə bağlı fikir bildirir, yazılarından yaxşı mənada heyrətə gəldiyini vurğulayırdı. Bəxtiyar müəllim Hidayət Elvüsalı müasir dövrün Cəlil Məmmədquluzadəsi adlandırıb. Bu özü jurnalistə verilən ən böyük qiymətdir. Hidayət təkcə gözəl qələm sahibi yox, eyni zamanda gözəl bəstəkar olub. Oynaq, qəlbi oxşayan mahnıları xüsusilə sevilir. Baxmayaraq ki, sözü birbaşa sərt deyən insan idi, lakin bir adam tapılmaz ki, ondan incisin".

Jurnalist Məhəmməd Nərimanoğlunun kitabda yer alan "Söz adamı: Hidayət Elvüsal" başlıqlı yazısında isə bildirilir ki, Hidayət Elvüsal Azərbaycan mətbuatında öz dəst-xətti olan jurnalistlərdən biri olub: "Hidayət Elvüsalın məqalələrini oxuyanda onun ədəbi düşüncələrinə, dilinin rəvanlığına heyran olmuş və yaxşı mənada qibtə etmişəm".

Tanınmış jurnalist Hikmət Sabiroğlu deyir ki, elə ilk gördüyündə Hidayət Elvüsal ona əsl dağ adamı, saf, mehriban insan təsiri bağışlayıb: "Biz 1986-cı ildə Bakı Dövlət Universitetinin Jurnalistika fakültəsinə qəbul olunanda Hidayət Elvüsal dövrün ən məşhur qəzetinin - "Azərbaycan gəncləri"nin tanınan əməkdaşlarından idi. Bir çox yazar kimi, ona da əlçatmaz insan kimi baxırdıq. Tələbə kimi redaksiyalara ayaq açanda ruhumuza yaxın "Azərbaycan gəncləri"nə üstünlük verirdik. Hidayət Elvüsalla belə ziyarətlərin birində tanış oldum. Hər zaman bizi gülərüz qarşıladı, yazılarımız hər zaman işıq üzü görməsə də, xoş sözlərlə bizi ruhlandırdı. Onun yazılarının ayrı bir dad-tamı vardı. Sonralar "Səhər" qəzetində "Belə-belə işlər" rubrikası altındakı yazıları istedadının bir başqa qatını da üzə çıxardı".

SEVİNC

525-ci qəzet .-2024.- 4 oktyabr (№181).- S.15.