YAZIRAM

Kimsənin önündə nə sın, nə əyil,

Ürəkdən çıxanın qayıdan deyil.

Şeiri əmidən, dayıdan deyil,

Şeiri, Allahdan umub yazıram.

Saxta ürəklərə yaramıram mən,

Saçımı nəğməsiz daramıram mən.

Şeiri dördgözlə aramıram mən,

Şeiri, gözümü yumub yazıram.

Savaş da gəzmirəm, qan da gəzmirəm,

Ruham hər əcaib canda gəzmirəm.

Şeiri şöhrətdə, şanda gəzmirəm,

Şeiri duyğuya cumub yazıram.

Məni el yaşadır, eldədi canım,

Gündədi, aydadı, ildədi canım.

Şeirə bükülmüş piltədi canım,

Şeiri, əriyib, damıb yazıram.

Bəsti BƏRDƏLİ

525-ci qəzet .- 2024.- 10 oktyabr(№185).-S.15.