Peşəkar jurnalist, dəyərli ziyalı

Qulu Məhərrəmli-70

Özümə ustad bildiyim Əməkdar jurnalist, BDU-nun professoru Qulu Məhərrəmlinin "Altun kitab" nəşriyyatında işıq üzü görmüş "Gələcəyə ön söz" məqalələr toplusunu çox böyük maraqla oxudum. Müxtəlif mövzuları əhatə edən, vaxtilə "Ayna" qəzetində işıq üzü görmüş bu məqalələr oxucunun təsəvvüründə insanların gözünə dik baxıb əsl həqiqəti söyləməyi bacaran dəyərli bir qələm adamının portretini canlandırır. Kitabın ön sözünün müəllifi Əməkdar jurnalist Elçin Şıxlının dediyi kimi, "Qulu Məhərrəmli ana dilimizin çağdaş problemlərini araşdıran ciddi bir alimdir".

"Həmişə əsl vətəndaş mövqeyində durmağı bacaran, varlığımız və ictimai əxlaqımız üçün təhlükə yaradan meylləri cəsarətlə tənqid etməkdən çəkinməyən" professor Qulu Məhərrəmlinin ən böyük silahı onun qələmidir. Qulu Məhərrəmlinin mətbuat tariximizdə öz yeri, mövqeyi var. Mən Qulu müəllimin bir neçə il əvvəl işıq üzü görmüş bu toplusunu birnəfəsə oxudum. "Müsəlman Şərqində ilk parlamentli respublika - Demokraktik Cümhuriyyət qurmuş, insan hüquq və azadlıqlarını önə çəkmiş, müasir tipli universitet yaratmış, senzuranı ləğv edərək mətbuat azadlığını demokratik dəyərə çevirmiş qurucu babalarımızın müqəddəs ruhuna dərin ehtiram"ın ifadəsi kimi çap olunmuş bu toplu, fikrimcə, hər bir ziyalının stolüstü kitabı olmağa layiqdir. Təbii ki, kimsə məni qınaya, bu heyranlığımda "yanlışlıqlar" axtara bilər. Amma hesab edirəm ki, jurnalistika aləmində hələ tam bişib-bərkiməmiş bir gənc yazarın Qulu Məhərrəmli kimi öz sözünü demiş dəyərli telejurnalist, publisist və alim haqqında səmimi düşüncələrini bölüşməsində elə bir qəbahət yoxdur.

Kitabında toplanmış məqalələrindəki dərin və düşündürücü mühakimələr Qulu Məhərrəmlinin zəngin dünyagörüşünün məhsuludur. Ən müxtəlif məsələlərlə bağlı əsl ziyalı mövqeyinə bütün dövrlərdə böyük ehtiyac duyulur. Təsadüfi deyil ki, adıçəkilən kitabda Qulu müəllimin qətiyyətli və gur səsini eşidirik: "Eeeyy!! Cənab deputatlar, uzaqgörən siyasətçilər", "politoloqlar", "ekspertlər", köşə yazarları, hardasınız?.." Həmin yazının sonundakı tarixə baxıram. Düz on il əvvəl işıq üzü görsə də, bu yazı bu gün də öz aktuallığını saxlayır. Düzdür, bu illər ərzində müzəffər Ali Baş Komandanımızın qətiyyəti, şanlı ordumuzun şücaəti sayəsində 30 ilə yaxın düşmən tapdağında olan ərazilərimiz işğaldan azad edilib, xalqımız 44 günlük Zəfər savaşının sevincini bu gün də yaşayır. Amma bu misilsiz zəfərimizi, möhtəşəm qələbədə xalqımızın əvəzsiz birliyini həzm edə bilməyənlərə qətiyyətli mövqeyimizi bildirməyə, kəsərli sözümüzü deməyə həmişə hazır olmalıyıq.

Kitabda maraqla oxuduğum məqalələrdən biri də "Köhnə kişilər haqqında hekayət" oldu. Köhnə kişilər... Belə kişilər haqqında yaşlı adamlardan çox eşitmişəm. Bir də "Yaxşı kişilər yaxşı atları minib getdilər" deyərdilər. Müəllif bu yazısında çox haqlı olaraq vurğulayır ki, "köhnə kişi" deyəndə, həm də, adamın gözünün qabağında ağır təbiətli, təmkinli, qürurlu və şəxsi ləyaqət hissini hər şeydən üstün tutan bütöv bir xarakterin sahibi canlanır..."

Tarixə qovuşan tarixi şəxsiyyət" məqaləsində isə ustad jurnalist, mərhum professor Şirməmməd Hüseynovdan bəhs edilir. Mətbuat tariximizin mahir bilicisinin əvəzsiz xidmətləri haqqında fikirlərini müəllif belə tamamlayır: "Şirməmməd müəllimin bu millət qarşısında tarixi bir missiyası var idi və həmin missiyanı şərəflə yerinə yetirdi, özündən sonrakılar üçün zəngin irs və mənalı yaşamaq örnəyi qoyub getdi... Şirməmməd Hüseynovun vəfatı ilə mətbuat tariximizdə, müasir jurnalistikamızda böyük bir epoxa sona yetdi..." Topludakı "Barış Manço ilə samuray söhbəti", "Şairlərin günahı nə ?!", "Tarixə qovuşan tarixi şəxsiyyət", "Dilimizi didən dərdlər", "Yaratmağın faciəsi", "Dəmir ledi" əfsanəsi" və digər məqalələr də böyük maraqla oxunur.

Professor Qulu Məhərrəmli mənalı ömrünün 70-ci pilləsindədir. Qulu müəllim yaşının bu vədəsində də böyük şövqlə yazıb-yaradır. Yazmaya bilmir, çünki çoxsaylı oxucuları ondan yeni-yeni əsərlər gözləyir...

Dostlarının və doğmalarının Qulu Məhərrəmli haqqında dedikləri

Elçin Şıxlı

Azərbaycan Jurnalistlər Birliyinin sədri:

- Sözün doğrusu, hərdən Qulu Məhərrəmli ilə birlikdə "İlk dəfə necə tanış olmuşuq" sualı ətrafında düşünürük. Mənim yadıma gəlmir (gülür). Çünki Qulu Məhərrəmli ictimai adamdır və tanışlıqdan əvvəl də onu televiziyada veriliş aparanda görürdüm. Ona görə də, bizə elə gəlir ki, onu lap çoxdan, televiziyada Qulu müəllimi görəndən tanımışıq. Xoş xatirələrimiz həddindən çoxdur.

Qulu Məhərrəmliyə cansağlığı, indiki kimi dinamik olmağı, bir yerdə durmayan, hər yerə özünü çatdıran enerji arzu edirəm. Arzu edirəm ki, o, daim indiki kimi jurnalistikadakı təcrübəsini tələbələrinə ötürə bilsin.

Arif Əliyev

Bakı Mətbuat Klubunun rəhbəri:

- İlk tanış olduğumuz gündən Qulu Məhərrəmli ilə mənim xoş xatirələrim o qədər çoxdur ki, onların arasında seçim etmək çətindir. Bu gün Qulu Məhərrəmlinin doğum günü yox, doğum aylarının başlanğıcıdır. Biz hər il onun doğum gününü ilin sonuna qədər qeyd edirik. Bir şeyə inanıram ki, bizim ən xoş xatirəmiz qabaqdadır. Məhz bu il baş verəcək. Çox şükür ki, Qulu Məhərrəmli zəfərdən sonra gedib öz doğma Zəngilan torpağını da gördü. Ən böyük arzumuz odur ki, belə yubiley yaşlarını işğaldan azad olmuş öz ata-baba ocağında qeyd eləsin!

Mən Qulu Məhərrəmlini bağrıma basıram, onu həyatımda dost olaraq ən böyük qazanclarımdan hesab edirəm. Tək özüm üçün yox, elə bu ölkə, jurnalistika və bizim millət üçün də. Qulu Məhərrəmliyə həyat yoldaşı Zemfira xanım, övladları və nəvələri ilə birgə böyük ailə xoşbəxtliyi arzulayıram.

Zemfira Məhərrəmli, Əməkdar jurnalist, Qulu Məhərrəmlinin həyat yoldaşı:

- Əvvəla, ailəmizə diqqət göstərdiyiniz üçün sizə təşəkkürümü bildirirəm.

Qulu müəllim mənim tələbə yoldaşım olub və tanışlığımız qəbul imtahanlarından başlayıb. Sonra qismət oldu, biz beş il Bakı Dövlət Universitetinin Jurnalistika fakültəsində təhsil aldıq. Qulu Məhərrəmli qrupumuzun ən yaxşı oxuyan tələbələrindən idi. Tale elə gətirdi ki, əvvəlcə mənim tələbə yoldaşım oldu, sonra isə ömür-gün yoldaşım, iki qızımın atası, nəvələrimin babası. Həyatda ən böyük dayağım Qulu Məhərrəmli olub. O, adı böyük hərflərlə yazılan müəllimdir. Qulu müəllim mənim peşə fəaliyyətimdə də həmişə yardımçım olub və ailəmizdə qarşılıqlı anlaşma hökm sürüb. Biz vaxt olub ki, kirayə evdə, dar mənzildə yaşamışıq. Bir balaca masamız var idi, bir ucunda Qulu müəllim yazırdı, bir ucunda mən. O balaca stol həm bizim yazı, həm də nahar masamız idi. O balaca stolda paltar da ütüləyirdim, Aytənimi, Şəhlamı da bələyirdim. Biz bu çətinlikləri görmüşük. Ailədə qarşılıqlı anlaşma əsasdır. Əgər anlaşma varsa, hüzur və həm də yaradıcılıq şəraiti var. Mən çox sevinirəm ki, mənim tələbəliyim hələ də davam edir. Çünki Qulu müəllim mənimlə eyni ailədə, eyni damın altındadır.

İlk növbədə həyat yoldaşıma cansağlığı arzu edirəm. Əsas odur ki, onun həyat eşqi, yaradıcılıq əzmi heç vaxt tükənməsin. Allah onu var eləsin, həmişə ailəmizin başında olsun, başımızın üstündən əskik olmasın.

Mən isə bu yazımı Qulu müəllimə həsr etdiyim şeirimlə bitirir, onun 70 illik yubileyini ürəkdən təbrik edir, cansağlığı, bol-bol yaradıcılıq uğurları arzulayıram.

Yanır işığından sözlərin özü,

Sizi alqışlayır düzlərin düzü,

Böyük elmində var xalqların gözü,