Milli musiqimizin keşiyində

Siyavuş Kərimi-70

Azərbaycan Milli Konservatoriyası milli ənənələrimizi, milli irsimizi, milli mədəniyyətimizi qoruyub inkişaf etdirən, bu missiyanı layiqincə daşıyan musiqi məbədidir. 24 ildir fəaliyyət göstərən bu təhsil ocağının əsası mərhum Prezident - Ulu öndər Heydər Əliyevin 13 iyun 2000-ci il tarixli fərmanı ilə qoyulub, Musiqi Kolleci və İncəsənət Gimnaziyası onun tabeçiliyinə verilib.

Ulu öndər o dövrdə artıq yetərincə tanınmış, yenilikçi, gözəl bəstəkar Siyavuş Kərimini yeni fəaliyyətə başlayan bu musiqi məbədinə rektor təyin etdi. O gündən bu günə qədər üzərinə düşən missiyanın öhdəsindən layiqincə gələn Azərbaycan Respublikasının Xalq artisti Siyavuş Kərimi sadəcə bir musiqi təhsil ocağı deyil, bir mədəniyyət məbədi yarada bildi. Azərbaycan Prezidenti İlham Əliyev 2006-cı ildə Azərbaycan Milli Konservatoriyası kompleksinin tikintisinə dair Sərəncam imzaladı. 2014-cü il fevralın 13-də Azərbaycan Milli Konservatoriyasının indiki gözəl və möhtəşəm binası hazır oldu. Binanın açılışında Azərbaycan Respublikasının Prezidenti cənab İlham Əliyev və birinci xanım Mehriban Əliyeva iştirak etdilər, yeni binada yaradılmış muzey, kitabxana, auditoriya və konsert zalları ilə tanış oldular, Milli Konservatoriyanın professor-müəllim heyəti və mədəniyyət xadimlərilə görüşüb onları təbrik etdilər.

Xalq artisti Siyavuş Kərimi və Milli Konservatoriyanın idarə heyəti - prorektorlar, kafedra müdirləri, ümumiyyətlə, rəhbərlik hər səhər tələbələrin məşq prosesini izləyirlər. Rektor tələbələrlə görüşür, elə yerindəcə fikir mübadiləsi aparır. Bu xor və orkestrlər demək olar ki, ölkədə keçirilən beynəlxalq və rəsmi dövlət tədbirlərində, bayramlarda iştirak edir, Bakıda fəaliyyət göstərən müxtəlif dövlətlərin səfirliklərində tədbirlərə dəvət alırlar. Tələbələrin konsert fəaliyyətinin təməli elə tələbəlik illərindən qoyulur.

Bu gün Konservatoriyada Azərbaycan mədəniyyətinin çox tanınmış simaları pedaqoji fəaliyyət göstərirlər. Burada tələbələr tanınmış sənətkarlardan, musiqi sahəsinin xiridarlarından dərs alırlar. Tələbələrin hərtərəfli inkişafı üçün elmi konfranslar, musiqi saatları keçirilir. Musiqi saatları konservatoriyanın ənənələrindən biridir. Konservatoriya rəhbərliyinin təşəbbüsü ilə ənənə halı almış musiqi saatları Tələbə Gənclər Təşkilatı tərəfindən hər həftə təşkil olunur. Burada müxtəlif kurslardan öz istedadlarını nümayiş etdirmək istəyən tələbələr çıxışlar edirlər ki, bu da onların öz bacarıqlarını inkişaf etdirmələrinə böyük zəmin yaradır.

Artıq neçə ildir ki, Azərbaycan Milli Konservatoriyasında "Xalq çalğı alətləri" festivalı keçirilir. Hər həftəsi bir musiqi alətinə həsr olunan, yüksək səviyyədə keçirilən festivala çoxlu iştirakçılar qatılırlar. Tədbirlər adətən "Mədəniyyət" telekanalı tərəfindən canlı olaraq yayımlanır və böyük əks sədaya səbəb olur.

Azərbaycan Milli Konservatoriyasında musiqi günləri ölməz sənətkarlarımızın yubileyləri, xatirə günləri, ədəbi görüşləri keçirilir, əlamətdar günlər qeyd edilir, konsertlər, beynəlxalq elmi praktiki konfranslar təşkil olunur. Milli Konservatoriyada fəaliyyət göstərən kafedralar hər il iki dəfə hesabat konsertləri, festivallar, müsabiqələr təşkil edirlər. Müsabiqələr nəzəriyyəçi və musiqişünas tələbələr üçün də keçirilir. Azərbaycan Milli Konservatoriyası hər gün həyat qaynayan bir universitet olmaqla yanaşı, həm də görkəmli sənətkarlar və öz işinin biliciləri ilə əhatə olunmuş bir təhsil ocağıdır. Azərbaycan Milli Konservatoriyası bir çox türk dövlətlərinin Milli Konservatoriyaları ilə əməkdaşıq memorandumları imzalayıb. Həmin universitetlərdən Milli Konservatoriyaya təcrübə üçün tələbələr gəlir. Son günlərdə Kurmanqazı adına Qazaxıstan Konservatoriyasının bir qrup tələbəsi Azərbaycan Milli Konservatoriyasında təcrübə keçib.

Əməkdaşlıq memorandumları ölkəmizin mədəniyyət ocaqları və universitetləri ilə də bağlanır. Belə təhsil ocaqlarından biri də Naxçıvan Dövlət Universitetidir (NDU). Azərbaycan Milli Konservatoriyasının professor və müəllim heyəti, tanınmış sənətkarlar NDU-də ustad dərsləri təşkil edirlər. Uzun illərdən sonra qürur yerimiz olan müqəddəs torpağımız Xankəndidə fəaliyyətə başlayan Qarabağ Universitetinə Milli Konservatoriyanın da bir neçə nəfər əməkdaşı gedib, onlar bu təhsil ocağında fəaliyyət göstərirlər. Bu, Azərbaycan Milli Konservatoriyası ailəsi üçün böyük iftixar və qürurdur.

Bu təhsil ocağında başlıca məqsəd Azərbaycan milli musiqisinin, muğamın, milli musiqi alətlərimizin qorunmasıdır: bu səbəbdən də Milli Konservatoriyada milli musiqi alətləri laboratoriyası fəaliyyət göstərir, muğam görkəmli sənətkarlarımız tərəfindən yüksək peşəkarlıqla tədris edilir, öz işinin, peşəsinin bilicisi olan istedadlı professor-müəllim heyəti istedadlı gənclərin hərtərəfli yetişmələri üçün əllərindən gələni əsirgəmirlər. Bizim mənəvi dəyərlərimizdən biri də milli musiqimizdir. Bayağı musiqilərdən, anlamsız ifaçılardan uzaq olmaq, musiqimizi qorumaq borcumuzdur. Azərbaycan musiqisini öz çalarlarında, öz gözəlliyində tərənnüm edən bir nəsil yetişməlidir. Azərbaycan Milli Konservatoriyasının başlıca prinsipi də elə budur.

Azərbaycan Milli Konservatoriyasında mövcud ab-havanı başda rektor Siyavuş Kərimi olmaqla burada çalışan görkəmli sənətkarlarımız yaradıblar. Rektor kimi Siyavuş Kəriminin öz sənət dostlarına, tələbələrə, personala olan diqqət və qayğısı danılmaz həqiqət və reallıqdır.

2024-sü ilin noyabrın 9-da Siyavuş Kəriminin 70 yaşı tamam olur. Yubiley yaşının astanasında olan Xalq artisti, professor, "Şərəf" və "Şöhrət" ordenləri ilə təltif olunmuş gözəl bəstəkar, bütün bu titulların fonunda duran ali insani keyfiyyətlərə malik Siyavuş müəllimə Azərbaycan Milli Konservatoriyasının nailiyyətlərini bundan sonra da davam etdirmək, yeni-yeni ucalıqlara yol açmaq yolunda uğurlar diləyir, tanrının bəxş etdiyi ömür payını ləyaqətlə yaşayan yubilyara cansağlığı, xoşbəxtlik, pedaqoji fəaliyyətində daha böyük uğurlar arzulayırıq. Qoy onun yazdığı gözəl mahnıların, musiqi əsərlərinin sayı daha da artsın, Azərbaycan Milli Konservatoriyası bundan sonra da uca məqamlara yetişərək Siyavuş müəllimi daima fərəhləndirsin.

Aysel FİKRƏT

525-ci qəzet .- 2024.- 31 oktyabr(№200).-S.10.