Əməkdaşlıq perspektivi vəd edən sərgi

“Sərgi sənət bayramıdır”. Düşünürəm ki, bu mədəni hadisənin mahiyyətini sözügedən ifadə çox yaxşı xarakterizə edir. Belə tədbirlər incəsənətə yaxın insanlar üçün lazımi mühit yaradaraq, ünsiyyət körpüsünə çevrilir. “QGallery”də baş tutan RAK İncəsənət Fondunun rəssamlarının əsərlərindən ibarət sərgi də sənətsevərləri növbəti dəfə bir araya gətirdi.

Bəhreyn Krallığında fəaliyyət göstərən RAK İncəsənət Fondu və paytaxtın məşhur rəsm qalereyası olan QGallery ilə əməkdaşlıq çərçivəsində təşkil edilən sərgi özünəməxsus atmosferi ilə fərqlənə bildi. Buna misal olaraq, tərtibat, tabloların düzümü, əsərlərin seçilməsi kimi bir sıra vacib nüansları qeyd edə bilərik.

Sərginin açılış mərasimində çıxış edən RAK İncəsənət Fondunun təsisçisi, rəssam Raşid Al Xəlifə bildirdi ki, belə tədbirlərin davamlı şəkildə keçirilməsi nəzərdə tutulur: “Bəhreyn rəssamlarının istedadını QGalery və sənətsevərlərlə bölüşmək fürsəti əldə etdiyim üçün çox şadam. Düşünürəm ki, bu əməkdaşlıq Azərbaycan və Bəhreyn arasında ümumbəşəri sənət dili vasitəsilə uğurlu mədəni mübadilələrin başlanğıcı olacaq. Ümid edirik ki, Azərbaycan rəssamlarının əsərlərinin də yaxın gələcəkdə Bəhreyndə nümayişi baş tutacaq. Belə bir əməkdaşlığın məqsədi bəhreynli sənətkarların zəngin qobelenlərini Bakının canlı və rəngarəng incəsənət səhnəsinə təqdim etməkdən ibarətdir. Bu isə, incəsənət həvəskarları və kolleksiyaçılara Bəhreyn müasir incəsənətinin gözəlliyinə və əsərlərdəki fəlsəfi yanaşmalar aləminə baş vurmaq üçün unikal bir imkandır”.

“QGallery”nin təsisçisi Emin Məmmədov ölkələr arasında mədəniyyətin inkişafı baxımından rəssam Rəşid Əl Xəlifə və RAK İncəsənət Fondu ilə əməkdaşlığın əhəmiyyətini vurğuladı: "Rəssam Raşid Al Xalifa və RAK İncəsənət Fondu ilə əməkdaşlığımız incəsənətin beynəlxalq dostluq və mədəni anlaşmanın daha geniş təşəkkül tapmasının bariz sübutudur. Biz, hörmətli rəssam Raşid Al Xalifa ilə bu nəcib amalın təşviqinin qaçılmaz olduğu qənaətinə gəldik. Bu gün Bəhreynin müasir incəsənət nümunələrinin ümumi mənzərəsinin Bakıda canlandırılmasından məmnunuq. İnanıram ki, bu ölkələrimiz arasında gələcək mübadilə və tərəfdaşlıq imkanlarının daha geniş vüsət almasına təsir göstərəcək”.

Mərasimdə çıxış edən digər incəsənət nümayəndələri də sərginin əhəmiyyətindən danışarkən, sözügedən fikirləri təsdiqlədilər.

Tədbirdə Heydər Əliyev Fondunun vitse-prezidenti Leyla Əliyeva, Azərbaycan Prezidentinin köməkçisi, Heydər Əliyev Fondunun icraçı direktoru Anar Ələkbərov da iştirak edirdilər.

Açılış mərasiminin rəsmi hissəsi yekunlaşdıqdan sonra qonaqlar nümayiş olunan əsərlərlə tanış oldular. Tədbirin gedişatında imkan tapıb sərgi iştirakçılarının fikirlərini öyrəndik.

Azərbaycan Rəssamlar İttifaqının sədri, Xalq rəssamı Fərhad Xəlilov sərgidə nümayiş olunan əl işləri ilə yaxından tanış olduğunu bildirdi: “Əvvəla, onu qeyd edim ki, Raşid Al Xəlifə ilə çox gözəl münasibətimiz var. Biz danışmışıq ki, bəhreynli rəssamlarla Azərbaycan rəssamları arasında əlaqələrin qurulması istiqamətində bir sıra işlər həyata keçirək. Sentyabrın sonunda onlarla aramızda görüş olacaq və bizim rəssamların işləri də Bəhreyndə nümayiş olunacaq. Bir sözlə, bu görüşlər davam edəcək. Hazırkı sərgi də yüksək səviyyədə təşkil olunub. Biz Bəhreyndə olarkən rəssamların əl işləri ilə tanış olmuşduq. Ancaq belə yığcam və səviyyəli sərgi təşkil etmək asan məsələ deyil. Burada işləri nümayiş olunan rəssamlar çox geniş dünyagörüşünə malikdirlər. Tablolar estetik olmaqla bərabər, həm də informativdir”.

Xalq rəssamı Sirus Mirzəzadə bildirdi ki, sərginin özünəməxsus ruhu var: “Tablolarda ərəb ölkələrinin ritmi saxlanılıb. Həmçinin müasir süjetlərə də üstünlük verilib. Əsərlər boyakarlıq üzərində qurulub. Tablolara baxanda insan xoş hisslər keçirir. İşləri nümayiş olunan rəssamların əksəriyyəti olduqca istedadlıdır. Mənə elə gəlir ki, sərgi bu mühitlə çox uyğun gəlir”.

Xalq rəssamı Arif Hüseynov xarici rəssamlarla əməkdaşlığın perspektivləri haqqında söz açdı: “Bu qalereya həmişə yeni layihələrlə rəssamları sevindirir. Yenə burada çox maraqlı sərgi açılıb. Bilirsiniz, hər sənətçinin öz yaradıcılıq metodu var. Cəmiyyət gərək rəssamlığın əlifbasını bilsin ki, əsərdən zövq alsın. Artıq bizim cəmiyyətdə də bu, yavaş-yavaş formalaşır. Sərgiyə göstərilən maraq da bunun nümunəsidir. Belə sərgilərin təşkili gənc rəssamların inkişafına mühüm töhfə verir. Bu tədbirlər sayəsində rəssamlarımız başqa mədəniyyəti təmsil edən sənətkarların işləri ilə daha yaxından tanış olurlar”.

Sərgidə rəssamlıqla yanaşı, digər sahələrin nümayəndələri də iştirak edirdilər. Geyim üzrə mütəxəssis Mirəli Baxşıyev də həmin ziyarətçilərdəndir. O bildirdi ki, sərgidə nümayiş olunan əsərlərinin rəng koloriti çox maraqlıdır: “Sərgi haqqında dostum məlumat verdi. Mən də eşidən kimi böyük məmnuniyyətlə gəlmək istədiyimi dedim. Bakıda belə tədbirlərin keçirilməsi sevindirici haldır. Burada elə əsərlər var ki, insanı çox düşündürür. Rəssamlıqda belə bir məşhur yanaşma var ki, açıq rənglərdən istifadə insan şüuruna müsbət təsir göstərir. Fikir versəniz, burada nümayiş olunan əsərlərdə də açıq rənglər xüsusi formada işlənib”.

Rəssam Ghada Hunji isə rənglərin təsadüfən seçilmədiyini və hər detalın incəliklə işlənildiyini qeyd etdi: “Bu gün burada olmaqdan çox məmnunam. Sərginin təşkilatçılarına təşəkkür edirəm ki, bizə öz əsərlərimizi Azərbaycanda nümayiş etdirmək üçün şans yaradıblar. Düşünürəm ki, belə sərgilər gələcəkdə azərbaycanlı rəssamlarla sıx əlaqələrin qurulması üçün zəmin yaradır”.

Sərgi iştirakçıları arasında gənclər üstünlük təşkil edirdilər. Sərgiyə dostları ilə qoşulan Georgi bildirdi ki, sərgiyə yalnız yeni əsərlərlə tanış olmaq üçün yox, həm də asudə vaxtlarını səmərəli keçirmək məqsədilə gəliblər: “Mən hazırda İngiltərədə təhsil alıram. Ancaq Bakıda olduğum zaman belə tədbirlərdə iştirak etməyə çalışıram. Buraya dostlarımla gəlmişəm. Biz incəsənəti çox sevirik. Burada olduqca maraqlı işlər var. Biz həm yeni əsərlərlə tanış oluruq, həm də maraqlı vaxt keçiririk”.

Georgi və dostları kimi mən də bu sərgidə maraqlı vaxt keçirdim. Başqa ölkənin mədəniyyəti ilə sənətkarların təqdimatında tanış olmaqdan xüsusilə zövq aldım. Bir ad altında birləşən əsərlərin hər biri özünəməxsus xüsusiyyətləri ilə seçilirdi. Buna baxmayaraq, gördüyümüz fərqliliklər xaos yaratmır, əksinə, tabloların rəng həlli, verdiyi mesaj və ardıcıllıq bir-birini tamamlayırdı.

İncəsənət ünsiyyət tələb edir. Mədəni proseslərin davamlı olması üçün sənət adamlarının ünsiyyəti mütləqdir. Belə sərgilərin təşkili mədəni proseslərin müsbət istiqamətdə inkişafına təkan verir.

Axarıncı olsun!

Aytac SAHƏD

525-ci qəzet.- 2024.- 3 sentyabr.(№158).- S.14.