Şəhidlik və qalibiyyətin ülvi vəhdəti

AZƏRBAYCANA ZƏFƏR QAZANDIRAN ƏZİZ ŞƏHİDLƏRİMİZİN AİLƏ ÜZVLƏRİ TÜRKİYƏNİN ZƏFƏR BAYRAMINDA

(Əvvəli ötən sayımızda)

Səfər proqramına əsasən, avqustun 31-də Türkiyənin qurucusu Atatürkün məzar-məqbərə kompleksini - Anıt qəbiri və buradakı möhtəşəm muzeyi ziyarət etdik. Şəhid ailələri Mustafa Kamal Atatürkün məzarını ziyarətdən sonra xatirə muzeyində Türkiyə Cümhuriyyətinin qurucusunun həyat və fəaliyyətinə aid eksponatlara tamaşa etdilər, xatirə fotoları çəkdirdilər.

Günün sonunda şəhid ailələri TÜİB-in Ankara ofisində oldular. Layihənin ilk günündən şəhid ailələri ilə bir yerdə olan TÜİB-in rəhbəri Hüseyin Büyükfırat və sözügedən ictimai birliyin təhsil-mədəniyyət komissiyasının rəhbəri Ragıp Sarı şəhid ailələrini qurumun Ankara ofisində qonaq etməkdən məmnunluqlarını ifadə etdilər. Səmimi ab-havada keçən görüş ofisin açıq çay bağçasında şam yeməyi ilə yekunlaşdı.

Sentyabrın 1-də səfər proqramına uyğun olaraq şəhid ailələrinin Ankara etnoqrafiya muzeyinə ziyarəti təşkil edildi, onlar Türkiyənin tarixi ilə bağlı maraqlı eksponatlarla tanış oldular.

Ankaradakı Heydər Əliyev Parkına təşkil olunan ekskursiya da şəhid ailələrinin tam ürəyincə idi. Onlar parkın girişində Ulu öndər Heydər Əliyevin heykəli önünə tər güllər düzdülər, Ümummilli liderin ruhuna dualar oxudular. 2014-cü ildə sakinlərin ixtiyarına verilən, yaşıllıqlar məskəni olan bu park böyük ərazini əhatə edir.

Günün sonunda TÜİB-in Ankara ofisində şəhid ailələrinin şərəfinə ziyafət verildi. Ziyafətdə TÜİB rəhbəri Hüseyin Büyükfırat, Ədalət və İnkişaf Partiyasını təmsil edən millət vəkili Mustafa Şən, Türkiyənin əmək və əhalinin sosial müdafiəsi naziri Ahmet Aydın, qardaş ölkənin ombudsmanı Şərəf Malkoç, kənd təsərrüfatı nazirinin müavini Əbubəkir Gizligidər, millət vəkili Ərtoğrul Soysal, professor Mazhar Bağlı ziyafətdə çıxış edərək bu kimi sosial layihələrin könül körpülərinin qurulmasında mühüm rol oynadığından söz açdılar. Çıxışlarda TÜİB-in və "YAŞAT" Fondunun bu istiqamətdə gördüyü işlərin vacibliyindən danışıldı. Eyni zamanda çıxışlarda TÜİB rəhbəri Hüseyin Büyükfıratın 2022-ci ildə Azərbaycan Prezidenti İlham Əliyev tərəfindən "Tərəqqi" medalı ilə təltif edilməsi xatırladılaraq son illər ərzində onun medalın adına və mahiyyətinə uyğun olaraq çoxsaylı sosial layihələrin təşəbbüskarı və icrası ilə Azərbaycanın tərəqqisinə, iki qardaş ölkənin bir-birinə daha da yaxınlaşmasına xidmət etdiyi qeyd olundu.

Ziyafətdə Azərbaycanın Xalq artisti, şəhid atası Əli Nurun qəhər dolu çıxışı və şəhid oğlu Rövşən Nurzadənin xatirəsinə göz yaşları ilə səsləndirdiyi "Salam, oğlum" şeiri tədbir iştirakçılarını çox təsirləndirdi.

Səfərin son günü "Müharibə əlilləri, şəhid dul və yetimləri" Dərnəyi ziyarət edildi. Dərnək təmsilçiləri azərbaycanlı şəhid ailələri ilə görüşdən məmnunluqlarını ifadə etdilər.

Beləliklə, TÜİB və "YAŞAT" fondunun birgə təşkilatçılığı ilə 28 avqust-2 sentyabr tarixlərini əhatə edən "Tək millət, tək ürək, qardaş ailə" layihəsi silsiləsindən 30 avqust Zəfər Bayramına həsr olunmuş növbəti səfər proqramı uğurla başa çatdı.

Bu layihənin icrasında ən mühüm məqamlardan biri səfər zamanı azərbaycanlı şəhid ailələrinin həm türk şəhid ailələri ilə, həm də elə bir-birilərini yaxından tanıyıb daha da doğmalaşması idi. Şəhid ailələrinin indi bircə təsəllisi var: Övladlarının, həyat yoldaşlarının xatirəsinə sığınıb yaşamaq və fürsət düşdükcə bu həzin xatirələri onları can qulağı ilə dinləyənlərlə bölüşmək. Dövlət bu gün şəhid ailələrinə sahib çıxır, bizim vətəndaş borcumuz isə onların öz ciyərparaları ilə bağlı xatirələrinə sahib çıxıb yaşatmaqdır.

Könül Vəlizadə şəhid Urfan Vəlizadənin Türkiyə Hərbi Hava Qüvvələri Akademiyasından məzun olduğunu bildirərək səfər zamanı iştirak etdiyi hərbi akademiyanın mərasimlərində kövrəldiyini dilə gətirdi: "Sanki Urfan da bizimlə bərabər o məzuniyyətdə iştirak edirdi. Akademiyadan məzun olan gəncləri izlədikcə dayanmadan gözlərimdən yaş süzülürdü, Urfan da bir zamanlar bu akademiyadan məzun olmuşdu..."

44 günlük müharibənin ilk günündə iki oğlu - Əli və İslam şəhid olan Sevinc Əhmədova həyatının ən gözəl günlərini onların sağlığında yaşadığını dedi: "Əli İslama həm ata, həm qardaş olmuşdu. Əli sakit, İslam isə çılğın idi. Bir-birindən xəbərsiz, eyni gündə şəhid olublar, döyüşlərdən əvvəl halallaşıb məni bir-birilərinə tapşırıblar... Əli nişanlı idi, toyuna hazırlaşırdıq, qismət olmadı... Onlar şəhid olan gün dünyam çevrildi, sən demə, ən xoşbəxt günlərim balalarımla olan günlərim imiş, amma heç xəbərim yox olmayıb..."

Afət ananın həyat yoldaşı Şükür Nəcəfi Birinci Qarabağ savaşında, oğlu Elxan isə 44 günlük Vətən müharibəsində şəhid olub: "Həyat yoldaşım şəhid olanda Elxanın 6 yaşı vardı, dedi ki, ana, böyüyüb atamın qisasını alacağam. Dediyinin üstündə də durdu, zabit olub atasının intiqamını aldı. Oğlumla da, həyat yoldaşımla da qürur duyuram. Oğlumun 5 yaşında övladı yadigar qalıb, çalışırıq onu elə tərbiyə edək ki, atasının şərəfli yolunu davam etdirsin, onun kimi qeyrətli oğul olsun".

Həyat yoldaşı şəhid pilot, pokovnik-leytenant Fəxrəddin Əsgərov haqqında danışan Ramilə Əsgərova onun 1996-cı ildə Türkiyənin Ali Hərbi Təyyarəçilik Məktəbini fərqlənmə ilə bitirdiyini, 2008-ci ilin yanvarında Xəzər dənizi üzərində döyüşə hazırlıq məqsədi ilə təlim uçuşu həyata keçirərkən MİQ-29 tipli qırıcı təyyarəsinin dənizə düşməsi nəticəsində şəhid olduğunu və nəşinin tapılmadığını söylədi: "Fəxrəddin xidmət etdiyi dövrdə ən çox uçuş saatına malik olan pilot olub, Azərbaycan bayrağını ilk dəfə Vətən səmasına məhz o çəkib, ölkənin hərbi hava qüvvələrinə məxsus bütün növ hərbi təyyarələrini idarə edib. 33 yaşı olanda vətən uğrunda canından keçərək şəhidlik zirvəsində əbədi qərar tutdu".

Arzu ana şəhid oğlu baş leytenant Cavid Mirzəyevin 44 günlük müharibədə Şuşaya qədər döyüş yolu keçdiyini, antiterror əməliyyatlarında şəhid olduğunu vurğuladı: "Vətən darda qalanda, əlbəttə ki, oğullar torpağı qorumağa getməlidir. Amma biz analar üçün hədsiz dərəcədə çətindir. Ölümündən sonra övladı dünyaya gəlib, onunla təsəlli tapırıq".

Mehriban ana şəhid oğlu Surxay Noçuyev haqqında bir xatirəsini bölüşdü: "2019-cu ilin yanvar ayında Türkiyədən zəng edib bizimlə danışanda demişdi ki, bir gün sizi də bura gətirəcəyəm. Dediyi kimi, Türkiyəyə getməyimiz Surxayın hesabına oldu... Surxaydan sonra..."

Şəhid polkovnik Babək Səmidlinin həyat yoldaşı Günel xanım bu səfər zamanı Türkiyə Quru Qoşunları Akademiyasının məzuniyyət mərasimindən çox təsirləndiyini dedi: "Diplomları təqdim edilən bu gəncləri gördükdə nə zamansa Babəkin də belə gənc olduğunu, bu şəkildə diplomunu aldığını düşündüm... Tədbirin təşkilatçılarına şəhid ailələrini daim diqqətdə saxladıqlarına görə təşəkkür edirəm".

Oğlu Vüsal Vəliyevin şəhadəti haqqında göz yaşları ilə söhbət açan Mədinə ana onun mayor rütbəsi aldığını, lakin bundan az müddət keçdikdən sonra şəhid olduğunu bildirdi: "Nişanlı idi, tək qalırdı, gedəndə hər dəfə qovurma bişirib verirdim, son gedişində elə tələsik çıxdı ki, əlimdə qovurma qabı ilə qapının ağzında qaldım, qazanı açıb bir tikə götürüb tələsdiyini deyib təbəssümlə çıxıb getdi... Həmişə deyirdi ana, səni yanıma gətirib sənə bənövşə çayı dəmləyəcəyəm... Biz "YAŞAT" Fondunun təşkilatçılığı ilə burada qardaş Türkiyənin Zəfər bayramını qeyd etdik. Türkiyənin Prezidenti və nazirlərlə görüşdük, Allah bu birliyimizi bizə çox görməsin!"

Məhsəti Hüseynova şəhid həyat yoldaşı mayor Emin Süleymanovun Vətəninə, ailəsinə, peşəsinə qarşı həddindən artıq məsuliyyətli olduğunu vurğuladı: "Şəhid olandan sonra əsgərlər danışırdılar ki, Aprel döyüşlərində öz yemək payını da əsgərlərlə bölüşürmüş ki, güclü olsunlar. Peşəkar artilleriyaçı idi, hər fürsətdə deyirdi ki, hərbçilik peşəmdir, mənim borcum Vətəni qorumaqdır".

Samirə xanım şəhid həyat yoldaşı Elvin haqqında danışmağın çətin olduğunu, lakin onun xatirələrinin daim dipdiri qaldığından söz açdı: "Oğlum Unversitetə qəbul olunanda həyat yoldaşım Elvin ona dedi ki, sən mənim başımı uca elədin, mən də gedib sənin başını uca edəcəyəm. O, sözünə sadiq qaldı, nəinki oğlumun, torpaqlarımızı işğaldan azad edərək bütün xalqımızın başını uca etdi".

Şəhid valideynləri Sevda Əhmədova və Şahid Mayılov övladları pilot Emil haqqında keşmiş zamanda danışmağın hədsiz çətin olduğunu dedilər: "O, öz yolunu özü seçdi və sonunacan da yolundan dönmədi. Daim Vətənin səmalarında uçub bu torpağın həqiqi qəhrəmanına çevrildi".

Ulduz xanım həyat yoldaşı mayor Əhməd Abdullayevin 2010-cu ildə döyüş tapşırığını yerinə yetirərkən şəhid olduğunu bildirdi: "44 günlük Vətən müharibəsi başlayanda eyni depressiyanı yaşamağa başladım ki, evlərə şəhid tabutları gedir, ocaqlara yas düşür... Vətən müharibəsi başlayanda yuxuda gördüm ki, Əhməd əlləri sıyrılmış halda evə gəldi, dedim ki, nə yaxşı gəlmisən, cavab verdi ki, yox, yemək hazırla, götürüb səngərə qayıdacağam. Sonralar bir əsgər deyirdi ki, müharibə başlayanda komandiri də səngərdə yanımızda görürdük sanki... Bu mistik hadisəni heç unutmuram... Tək təsəllim odur ki, Vətənimiz işğaldan azad olub".

Könül Hüseynova həyat yoldaşı şəhid pilot, polkovnik-leytenant Rəşad Atakişiyev haqqında hər söz düşdükcə kövrəlir: "Rəşad haqqında xatirələrim sonsuzdur... Onun mərdliyi, ailəcanlılığı, ailəsinə və peşəsinə olan bağlılığı heç bir şeylə ölçülməyəcək dərəcədə sonsuz idi. O alicənab, ata, qardaş sevgisini də verə biləcək qədər böyük ürəyə malik həyat yoldaşı, ölkənin ən peşəkar, ən savadlı pilotlarından idi... Onunla fəxr edirəm!"

Zəfərimiz həm də məhz bu valideynlərin və həyat yoldaşlarının mətanəti, əzmi, fədakarlığı və məğrur duruşu sayəsində əldə olunub. Fəxarətin, sevinc və kədərin bir arada olduğu səfər boyu təbii ki, şəhid valideynlərinin, şəhidlərin həyat yoldaşlarının göz yaşları içində anlatdıqları bu sarsıdıcı xatirələrin, təsirli həyat hekayələrinin, demək olar ki, hamısının sonu eyni cümləylə tamamlanırdı: Təki Vətən yaşasın!

Sevinc MÜRVƏTQIZI

525-ci qəzet.- 2024.- 4 sentyabr.(№159).- S.10.