Şərəf müharibəsi

Biz 44 günlük müharibəni "İkinci Qarabağ müharibəsi", "Vətən müharibəsi", "Dəmir yumruq əməliyyatı" da adlandıra bilərik.

Savaş 27 sentyabr 2020-ci il səhər saat 6-da Birinci Qarabağ müharibəsindən sonra yaranmış təmas xətti boyunca başladı. Azərbaycan illərdir danışıqlar aparırdı ki, torpaqları dinc yolla alsın. Amma Ermənistan torpaqları xoşluqla vermək istəmədi. Vaxt udmaq istəyir, torpaqlarımızı əbədi əldə etməyə çalışırdı. Azərbaycan işğalla barışa bilmirdi və barışmadı da.

Ermənistanın Baş naziri Nikol Paşinyanın 2019-cu il avqustun 5-də Xankəndidə "Qarabağ Ermənistandır və nöqtə" açıqlamasına Ali Baş Komandanımız İlham Əliyev oktyabrın 3-də "Valday" beynəlxalq diskussiya klubunun iclasında çıxışı zamanı "Qarabağ Azərbaycandır və nida işarəsi!" deməklə sərt və qətiyyətli cavab verdi.

2020-ci ilin iyul ayında Ermənistan sərhədin Tovuz istiqamətində hərbi təxribat törətdi. Azərbaycan Ordusu düşmənə sarsıdıcı zərbə endirərək layiqli cavab verdi. Ermənistan 2020-ci ilin avqust ayında yenidən hərbi təxribata əl atdı. Amma ordumuz bu təxribat planını da pozdu.

2020-ci ilin sentyabrın 24-də Prezident İlham Əliyev bildirdi ki, Ermənistan təcavüzkar, hücum xarakterli hərbi doktrina və milli təhlükəsizlik strategiyası qəbul edib: "Biz BMT-ni və beynəlxalq ictimaiyyəti Ermənistanı növbəti hərbi təcavüzdən çəkindirməyə dəvət edirik. Təxribatların baş verməsinə və gərginliyin artmasına görə məsuliyyət tam şəkildə Ermənistanın hərbi-siyasi rəhbərliyinin üzərinə düşür".

2020-ci il sentyabrın 27-də Azərbaycan Ordusunun mövqelərinə və mülki yaşayış məntəqələrinə atəş zərbələri endirilməsinə cavab olaraq əks-hücum əməliyyatı başladı. Sonradan bu əməliyyat "Dəmir yumruq" adını aldı. Ali Baş Komandan İlham Əliyev xalqa üz tutdu. Onun müraciətləri xalqımızı ayağa qaldırdı. İlham Əliyev bütün cəmiyyəti qəti qələbəyə köklədi: "Biz haqq yolundayıq. Bizim işimiz haqq işidir. Biz zəfər çalacağıq. Qarabağ bizimdir, Qarabağ Azərbaycandır!"

2020-ci il oktyabrın 9-da Azərbaycan Prezidenti xalqa müraciətində daha status-kvonun olmadığını və təmas xəttinin yarıldığını elan etdi: "Yoxdur status-kvo. Yoxdur təmas xətti. Yarmışıq onu. Onlar 30 il idi ki, qururdular bu təmas xəttini... Yarıb keçmişik. Azərbaycan əsgərinin qabağında heç kim heç nə edə bilməz!"

2020-ci il oktyabrın 17-də Ali Baş Komandan raket hücumlarına məruz qalan Azərbaycan şəhərlərinin müqavimət rəmzinə çevrildiyi mesajını verdi: "Heç bir təhdid, heç bir hədə-qorxu, heç bir təzyiq mənim iradəmə təsir edə bilməz. Bizim işimiz haqq işidir. Biz öz torpağımızda vuruşuruq, öz ərazi bütövlüyümüzü bərpa edirik".

2020-ci il oktyabrın 20-də İlham Əliyev əldə edilən nəticələrin düşünülmüş və vaxtında atılmış addımların bəhrəsi olduğunu dedi, tələskənliyin yolverilməzliyini diqqətə çatdırdı: "Mən hər dəfə xalqıma müraciət edərkən xoş xəbərlər çatdırıram. Eyni zamanda demək olar ki, hər gün öz tviter hesabımda işğaldan azad edilmiş yeni kəndlərin, şəhərlərin adlarını çəkirəm. Mən bilirəm ki, Azərbaycan xalqı bu xəbərləri hər gün gözləyir, hər gün! Hər gün, hər saat. Amma istəyirəm əziz xalqım bilsin ki, hər kəndin, hər yüksəkliyin götürülməsi böyük rəşadət tələb edir. Biz həm onların istehkamlarına, toplarına, raketlərinə qarşı, eyni zamanda təbii relyefə qarşı vuruşuruq və torpaqlarımızı işğalçılardan qarış-qarış azad edirik".

2020-ci il oktyabrın 26-da dövlət başçısı Azərbaycan xalqının həlledici qələbəyə yaxın olduğunun müjdəsini verdi: "Biz əsgərlərimizin, zabitlərimizin canı-qanı bahasına bu torpaqları azad edirik. Həm döyüş meydanında, həm siyasi müstəvidə özümüzü təsdiqləmişik, dünyaya təsdiqləmişik. Azərbaycan xalqını qürurlu xalq kimi, cəsarətli xalq kimi, yenilməz xalq kimi təsdiqləmişik".

2020-ci il noyabrın 8-i Azərbaycan tarixinə qızıl hərflərlə Zəfər Günü kimi yazıldı. İlham Əliyev 7-ci müraciətini Şəhidlər xiyabanından edərək Şuşa şəhərinin işğaldan azad olunduğu müjdəsini verdi: "Mən bu gün eyni zamanda Ulu öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Şəhidlərimizin, Ulu öndərin ruhu şaddır bu gün! Gözün aydın olsun Azərbaycan! Gözünüz aydın olsun dünya azərbaycanlıları!"

2020-ci il noyabrın 10-da Ermənistanın kapitulyasiya aktı - Azərbaycan Prezidenti, Ermənistanın Baş naziri və Rusiya Prezidentinin birgə bəyanatı imzalandı.

İlham Əliyevin 8-ci müraciətində milli şüara çevrilmiş "Qarabağ Azərbaycandır və nida" ifadəsi ilə Ermənistan-Azərbaycan münaqişəsinə son qoyulduğunu elan etdi: "Əminəm, hər bir Azərbaycan vətəndaşı hesab edir ki, onun həyatında bu günlər, bu dəqiqələr ən xoşbəxt günlər, dəqiqələrdir. Mən də xoşbəxtəm ki, bu xoş xəbərləri, bu müjdəni Azərbaycan xalqına verirəm. Xoşbəxtəm ki, bu tarixi sənədə imza atmışam. Xoşbəxtəm ki, biz öz Vətənimizə, doğma Qarabağımıza qayıdırıq, Qarabağımızın tacı olan Şuşaya qayıdırıq və bu torpaqlarda əbədi yaşayacağıq! Bundan sonra heç kim bizi o torpaqlardan tərpədə bilməz!"

Biz bilirik ki, 44 gündə ordumuz (başda Ali Baş Komandanımız olmaqla) necə əziyyət çəkdi. Əziyyətləri yerdə qalmadı. İşğaldan sonrakı 20 gün ərzində 3 rayon - Ağdam, Kəlbəcər və Laçın Azərbaycana təhvil verildi. Bu, bir möcüzə idi. Biz bu rayonları bir güllə atmadan, bir şəhid vermədən qaytarmışıq. Vətən müharibəsində Azərbaycan parlaq qələbə qazanaraq Ermənistanı məğlub etdi, işğala son qoydu. Bu 44 günün hər günü Azərbaycanın şanlı tarixidir.

Biz Ali Baş Komandanımız İlham Əliyevə minnətdarıq! Azərbaycan Ordusunun qarşısında baş əyirik! Şəhidlərimizin qarşısında baş əyirik! Qazilərimizin qarşısında baş əyirik!

Səma TAĞIZADƏ

Bakıdakı 212 nömrəli tam orta məktəbin X sinif şagirdi

525-ci qəzet .- 2024.-6 sentyabr.(№161).- S.13.