İstirahət - işgüzarlığın sinonimi

Azərbaycanın görkəmli tədqiqatçı alimi Nizaməddin Şəmsizadənin yetmiş yaşı tamam olur. Onu ürəkdən təbrik edir, cansağlığı, ailə sevinci arzulayıram. 1954-cü ilin son ayında, son günündə dünyaya gəlmişdir. Haqqında oxuduğum mənbədə gördüm ki, bu mötəbər insanın demək olar, hər günü gərgin və işgüzar olub, elə bu günlərədək.

Yəqin ki, ilk görüşlərimdə suallarımın biri bu olacaqdı ki, "istirahət"ə, bu sözə necə baxırsınız? Cavabını da təsəvvür edirəm: yəqin özünəxas təbəssümlə deyə bilər ki, "işgüzarlığın sinonimi!"

Əlbəttə, bu bəlkə zarafatdı, ancaq müəyyən yaşdan sonra, onun elmi yaradıcılıq işgüzarlığı yəqin ki, istirahət günlərinin sinonimi olmuşdur.

Yeri gəlmişkən, bir misal: Günəşin dünyaya gəlişi çağırış deyilmi? Yazıb yaratmağa, işgüzarlığa çağırış. İnsanın günəşlə görüşü də yəqin istirahətin yox, işgüzarlığın sinonimidir.

Hələ gənclik illərindən elmi tədqiqata güclü meyl göstərən Nizaməddin müəllim Universitetin filologiya fakültəsini 1977-ci ildə bitirmiş, bundan sonra o, günləri "vaxt", "zaman" meyarları ilə ölçməyə-biçməyə başlamış, elmi müəssisələrdə sanki bir-birinin ardınca laborant, kiçik elmi işçi, baş elmi işçi kimi fəaliyyət göstərmişdir.

Namizədlik və doktorluq dissertasiyalarını müvəffəqiyyətlə müdafiə edən gənc istedad sahibinin qarşısında yeni elmi yaradıcılıq imkanları açılır. Bir sıra elmi müəssisələr onu işə dəvət edir. Azərbaycan Yazıçılar Birliyinin üzvü olur. Azərbaycan Dövlət Mədəniyyət və İncəsənət Universitetində elmi-pedaqoji fəaliyyətini davam etdirməklə, müsabiqə yolu ilə baş müəllim, dosent, professor seçilir, "Ədəbiyyat və dillər", "Ədəbiyyat və Azərbaycan dili", eləcə də "Ədəbi yaradıcılıq" kafedrasının müdiri vəzifəsində işləyir. Beləliklə, Tiflisdə, Qafqaz Xalqları Elmlər Akademiyasının həqiqi üzvü seçilir.

Nizaməddin müəllim elmi xidmətlərinə görə, akademik Y.Məmmədəliyev mükafatı laureatıdır. "Heydər Əliyev və Azərbaycan ədəbiyyatı" (müştərək) kitabına görə Azərbaycan Respublikasının Dövlət mükafatına layiq görülür.

Tanınmış tədqiqatçı alimin bir sıra monoqrafiyaları, o cümlədən: "Ədəbi mübahisələr", "Azərbaycan ideologiyası", "Azərbaycan ədəbiyyatşünaslığı", "Türk təfəkkürü məcrasında", "Əli Nazim", "Tənqidin ədəbi prosesdə rolu", "Azərbaycançılıq", "Ədəbi proses və ədəbi nəsil" və b. nəşr olunmuş, geniş yayılmış, "Əgər onlar olmasaydı", "Mən kiməm", "Tüstü", "Duman", "Müdriklər bunları deməyib" və bu kimi ədəbi-tənqidi məqalələri, şeirləri, elmi-nəzəri və fəlsəfi-publisistik məqalələrdən ibarət kitabları çapdan çıxmışdır.

N.Şəmsizadənin yaradıcılığı haqqında 80-dən artıq elmi məqalə, eləcə də professor Ş.Vəliyevin "Azərbaycanşünas alim" monoqrafiyası və "Filosof tənqidçi" kitabı işıq üzü görmüşdür. O, "Milli ideologiyamız - Azərbaycançılıq nəzəriyyəsi haqqında" ilk kitabın müəllifidir.

İndiyədək bir sıra mötəbər vəzifələrdə işləyən görkəmli alim, hazırda Azərbaycan Dövlət Mədəniyyət və İncəsənət Universitetinin "Ədəbiyyat və dillər" kafedrasının professoru kimi elmi-pedaqoji fəaliyyətini davam etdirir.

Nizaməddin müəllim Bakı Dövlət Universitetinin 100 illiyi münasibətilə Azərbaycanda təhsilin və elmin inkişafındakı xidmətlərinə görə "Əməkdar elm xadimi" fəxri adına layiq görülmüşdür.

Hörmətli qələm dostumuz ailəlidir, dörd övlad, yeddi nəvə sahibidir.

Daha yeni ailə sevinci, daha yeni yaradıcılıq uğurları arzusu ilə hələlik sağollaşıram.

Nəriman HƏSƏNZADƏ

525-ci qəzet .- 2024.-26 sentyabr (№175).- S.9.