Yazıçılar Birliyində Ramiz Əskərin yubileyi qeyd olunub

Görkəmli elm xadimi, filologiya elmləri doktoru, professor, bir çox yerli və beynəlxalq mükafatlara layiq görülmüş, "Şöhrət" ordenli Əməkdar jurnalist Ramiz Əskərin 70 illik yubileyi Azərbaycan Yazıçılar Birliyinin (AYB) Natəvan klubunda qeyd edilib. Tədbirdə tanınmış alimlər, jurnalistlər, qələm adamları, şair və yazıçılar iştirak ediblər, yubilyara xoş arzularını çatdırıblar.

AYB-nin katibi, Əməkdar incəsənət xadimi, yazıçı Elçin Hüseynbəyli R.Əskərin yaradıcılıq yolu barədə geniş söhbət açıb. Onun tədqiqatçı kimi səmərəli fəaliyyəti haqqında fikirlərini bölüşən E.Hüseynbəyli yubilyarın zəngin bioqrafiyası, bir elmi konfransın mövzusu ola biləcək qiymətli xidmətlərini xüsusi vurğulayıb.

AMEA Folklor İnstutunda xarici ölkələrlə əlaqələr bölməsinin rəhbəri, alim, publisist Əli Şamil keçmişə nəzər salıb, tələbəlik illəri ilə bağlı xatirələrini dilə gətirib. O bildirib ki, Azərbaycanda milli şüurun oyanmasında, türkçülük ideyasının inkişafında R.Əskərin böyük rolu olub.

Filologiya elmləri doktoru, professor Firuzə Ağayeva bildirib ki, əgər biz R.Əskərin tərcümə etdiyi, müəllifi olduğu kitabları bir yerə yığsaq, böyük bir qalereya yaratmaq olar. F.Ağayeva onun elmi-bədii yaradıcılığı ilə yanaşı, pedaqoji fəaliyyəti barədə də danışıb. F.Ağayeva bildirib ki, R.Əskər Bakı Dövlət Universitetində Türkologiya kafedrasına rəhbərlik etdiyi illərdə müəllim heyətinə olduqca hörmət və qayğı ilə yanaşıb, tələbələrin sevimlisinə çevirilib. F.Ağayeva çıxışını bu fikirlərlə yekunlaşdırıb: "Ramiz Əskər təkcə Azərbaycanda yox, bütün Orta Asiyada tanınan və sevilən alimdir".

Tarix üzrə fəlsəfə doktoru, Azərbaycan Milli Elmlər Akademiyasının Tarix İnstitutunun əməkdaşı Nazim Mustafa R.Əskərin mənsub olduğu nəsil, doğulub boya-başa çatdığı Qərbi Azərbaycan eli barədə çıxış edib.

Əməkdar jurnalist, şair və tədqiqatçı Adil Cəmil tələbəlik illərindən bəhs edib, R.Əskərlə birgə oxuduğu illərin təəssüratını bölüşüb. "Manas" dastanının tərcüməçisi olan A.Cəmil daim R.Əskərdən yaradıcılıq impulsu aldığını vurğulayıb. A.Cəmil qeyd edib ki, R.Əskərin elm aləminə gəlişi türkologiya sahəsindəki boşluğu doldurdu.

Azərbaycan Jurnalistlər Birliyinin üzvü, R.Əskərin əmisi Əsgər Əsgərov çıxışında yubilyarın uşaqlıdan ta indiyə qədər keçdiyi ömür yoluna ümumi nəzər salıb, şəxsi və yaradıcı keyfiyyətləri barədə danışıb.

Əməkdar jurnalist Tahir Aydınoğlu R.Əskərin mətbuatdakı fəaliyyəti barədə çıxış edib. O bildirib ki, elmi yaradıcılıqla yanaşı, R.Əskərin publisist kimi fəaliyyəti də təqdirəlayiq olub. T.Aydınoğlu görkəmli türkoloqun ictimaiyyətə, yeni nəsilə daha yaxşı tanıdılmasının zəruriliyini vurğulayıb.

Professor Sayalı Sadıqova bildirib ki, R.Əskər zəhmətkeş alim kimi bütün türk dünyasına xidmət edib. Onun sözlərinə görə, R.Əskər tərcümə etdiyi əsərlərin bir çoxunu həm də linqvistik cəhətdən tədqiq edib və ortaya sanballı elmi əsərlər çıxarıb.

İslam Sadıq, Fazil Güney, Seyfəddin Altaylı çıxış edərək R.Əskərin uğurlu həyat yolundan bəhs ediblər, ona təbriklərini ünvanlayıblar.

Şair, rəssam Nəvai Mətin çəkdiyi portreti R.Əskərə hədiyyə edib, ürək sözlərini bölüşüb.

Sonda çıxış edən R.Əskər tədbir iştirakçılarına minnətdarlığını bildirib.

Nadir YALÇIN

525-ci qəzet.-2024.- 12 yanvar, №5.- S.8.