Binalar tarix yaşadır

"Milli Dəyərlərin Qorunması" İctimai Birliyinin sədri, "Azərbaycan Qadınları Respublika Cəmiyyəti" İctimai Birliyi İdarə Heyətinin üzvü və sədr müavini Dilarə Ağamusa Nağıyeva-Muxtarovanın "Tarix yaşadan binalar" adlı kitabı nəşr olunub. Məşhur Azərbaycan sahibkarı, milyonçu, neft hasilatçısı və xeyriyyəçi Ağa Musa Nağıyevin 175 illik yubileyinə həsr edilmiş bu nəşr müəllifin sayca 10-cu kitabıdır. Kitab milyonçunun tikdirdiyi 98 bina haqqındadır. Kitabın müəllif Ağa Musa Nağıyevin nəvəsidir.

Qeyd edək ki, 28 may küçəsindəki qoşa imarətlər, həmin küçədə qırmızı kərpicdən tikilmiş əzəmətli bina, Nizami küçəsində Opera teatrının yanındakı yaşayış evi, Azərbaycan prospektində köhnə Mərkəzi poçt binası, Nigar Rəfibəyli küçəsindəki əzəmətli yaşayış binası, Səməd Vurğun küçəsində Qış klubu (indiki "Zabitlər evi"), "Astoriya" və "Yeni Avropa" mehmanxanaları kimi tarixi binalar Ağa Musa Nağıyevin sərmayəsi ilə tikilib.

Xeyriyyəçilik sadəcə pul vermək deyil, vacib olan dəyişikliklərə sərmayə qoymaqdır. Məşhur xeyriyyəçi Ağa Musa Nağıyevin təbirincə desək, "halallıqla varidat qazanmaq bacarıq, onu qoruyub saxlamaq müdriklik, düzgün işlətmək istedaddır". Dilarə xanım kitabda Ağa Musa Nağıyevin səxavətini və mərhəmətini üzə çıxarmaq məqsədilə milyonçunun bu xüsusiyyətlərinə ustalıqla toxunub. O, babasının xeyriyyəçi bir insan kimi vətəninə, dostlarına münasibətini, seçdiyi qərarlara görə məsuliyyətini əks etdirən xatirə və düşüncələrini oxucularla bölüşüb. Ağa Musa Nağıyev üçün gördüyü işlərin sayı yox, hər zaman məqsəd və nəticə önəmli olub.

Düşünürəm ki, yeni nəslin nümayəndələrinin masasından bu cür kitablar əskik olmamalıdır. Ağa Musa Nağıyev kimi məqsədindən əl çəkməyən, ağır həyat yolu keçməsinə baxmayaraq, acı taleyindən gileylənməyən insandan (binalarının üzərindəki Venzeldə görünən hanbal şələsi və saman çələngi onun keçmişinə işarədir) nümunə götürülməlidir.

Dilarə xanım "Tarix yaşadan binalar" kitabında ölkəmizin bugünkü tarixini qələmə alaraq, şəhidlərimizin qəhrəmanlıqlarından, 30 ildən artıq işğalda olan torpaqlarımızın azad edilməsindən, ölkəmizdə gedən quruculuq işlərindən də söz açıb.

Bu kitabı düşünməyi və nəticə çıxarmağı öyrədir. Ən əsası, insanı necə yaşamaq barədə düşünməyə vadar edir. Ümumiyyətlə, həyatın mənasını dərk etməyi, insanların istəklərini və hərəkətlərinin əsl motivlərini anlamağı öyrədən belə kitabları oxumaq və onlara hörmətlə yanaşmaq lazımdır. Mən Dilarə xanımın bu kitabını çox bəyəndim və hər kəsə oxumağı tövsiyə edirəm. Bu kitabı oxuyarkən məndə xeyli təəssüratlar yarandı - mənalı bir həyat, bütöv bir dünya, hisslər, vətənə və dosta sevgi kimi əbədi hisslər barədə. Elə kitablar var ki, onları həmişə oxumağa dəyər - Dilarə Ağamusa Nağıyeva-Muxtarovanın "Tarix yaşadan binalar" kitabı kimi. Ona görə də Xalqın tarixini öyrənməyə və özünü təkmilləşdirməyə can atan insanlara bu kitabı oxumağı məmnuniyyətlə tövsiyə edirəm.

Bahar QASIMOVA

"Azərbaycan Qadınları Respublika Cəmiyyəti" İctimai Birliyinin sədri

525-ci qəzet .- 2025. -2 aprel(№53).- S.13.