Bakıda “...Bahar naxışlı Novruz” sərgisi açılıb

Bakı Fotoqrafiya Evində “Güllü-çiçəkli, bahar naxışlı Novruz” adlı sərginin açılışı olub.

"Azərbaycan Xalçaçıları” İctimai Birliyi və “İçərişəhər” Dövlət Tarix-Memarlıq Qoruğu İdarəsinin birgə təşkilatçılığı ilə keçirilən sərgidə torpağın zənginliklərini sənətdə əks etdirən və baharın füsunkar gözəlliyini yaradıcılıqda canlandıran əsərlər yer alıb.

Tədbirdə “Azərbaycan Xalçaçıları” İB-nin sədri, professor Röya Tağıyeva, “İçərişəhər” Dövlət Tarix-Memarlıq Qoruğu İdarəsi Aparat rəhbərinin müavini Rəna Nəsirova, Azərbaycan Respublikası Mədəniyyət Nazirliyinin sektor müdiri Araz Bağırlı çıxış ediblər.

Daha sonra modelyer Tünzalə Ağabalayevanın “Azərbaycan bayrağı” milli geyim kolleksiyası, İB üzvlərinin “Keçə inciləri”, rəssam və dekorativ-tətbiqi sənət ustası Pərvanə Əliyevanın “Azərbaycan milli geyimlərinə müasir baxış” kolleksiyaları nümayiş olunub. Defilenin təşkilatçısı İB-nin idarə heyətinin üzvü, Məmməd Səid Ordubadinin Xatirə Muzeyinin direktoru vəzifəsini icra edən Rasimə Əhmədovadır.

Sərgidə professor Röya Tağıyevanın rəhbərliyi ilə birlik üzvlərinin xovlu və xovsuz xalçalar, bədii tikmə, bədii hörmə, keçə sənəti, miniatür sənəti, dəri rəngkarlığı, xəttatlıq və rəngkarlıq nümunələri nümayiş olunub.

Ekspozisiyada idarə heyətinin üzvləri - xalçaçı-rəssam Eldar Hacıyev, bədii tikmə və bədii hörmə ustası Elmira Qasımova, bədii tikmə ustası Şəhla Əsgərova və digərlərinin əsərləri yer alıb.

AB-nin üzvü Aynur Yunusova Azərbaycan Milli Konservatoriyası nəzdindəki Musiqi Kollecinin müəllim-konsertmeysteri Könül Abdullayevanın müşayiəti ilə Üzeyir Hacıbəylinin “Arşın mal alan” operettasından Gülçöhrənin naləsini və Asiyanın nəğməsini ifa edib.

525-ci qəzet .- 2025. -2 aprel(№53).- S.9.