Moskvada “Azərbaycanın mühacir ədəbiyyatı” kitabı nəşr olunub

Rusiya paytaxtında “Azərbaycanın mühacir ədəbiyyatı” kitabı nəşr olunub.

APA-nın Rusiya bürosu xəbər verir ki, kitaba Baninin “Qafqaz günləri” avtobioqrafik romanı və Qurban Səidin “Əli və Nino” romanı daxil edilib.

Banin “Qafqaz günləri” avtobioqrafik romanında 1920-ci illərdə Bakı cəmiyyətinin müxtəlif təbəqələrinin həyatından, varlıların və kasıbların zövq və vərdişlərindən, sadə insanların durumundan bəhs edir. Romanda yazıçının ailəsinin şəxsi faciəsi və ötən əsrin əvvəllərində böyük sarsıntılar dövründə Azərbaycan xalqının həyatında baş verən faciəvi hadisələr öz əksini tapıb.

Qurban Səidin "Əli və Nino" romanı isə azərbaycanlı müsəlman Əli Xan Şirvanşir ilə gürcü xristian Nino Kipiani arasındakı məhəbbətdən bəhs edir.

“Azərbaycanın mühacirət ədəbiyyatı” kitabı məhdud tirajla nəşr olunub və Rusiya Federasiyasının və MDB ölkələrinin kitabxanalarında və ixtisaslaşmış müəssisələrində təmənnasız yayım üçün nəzərdə tutulub.

Kitabının təşəbbüskarı, tərtibçisi və müqəddiməsinin müəllifi tibb elmləri doktoru, professor Mehman Məmmədovdur. Son 5 ildə alimin Moskvada Azərbaycanın mədəniyyətinə və tarixinə dair silsilə kitabları çap olunub.

525-ci qəzet .- 2025. -4 aprel(№55).- S.9.