Beynəlxalq Muğam Mərkəzində növbəti konsert

Beynəlxalq Muğam Mərkəzində (BMM) “Muğamat axşamı” adlı konsert proqramı təqdim olunub.

"Respublika" xəbər verir ki, böyük anşlaqla keçən konsertdə Əməkdar artistlər Babək Niftəliyev, Arzu Əliyeva, BMM-nin solistləri Vəfa Vəzirova, Səbinə Ərəbli, Rəvanə Qurbanova, Mirələm Mirələmov, Kamilə Nəbiyeva muğam və təsniflərdən ibarət proqramla dinləyicilərin qəlbini oxşayıblar.

İfaçıları BMM-nin solisti Rövşən Qurbanovun (tar) rəhbərliyi ilə instrumental ansambl – Ceyhun Muradov (kamança), Əməkdar artist Təranə Əliyeva (qanun), Rafael Əsgərov (balaban), Amil Mustafayev (nağara), Vasif Yusublu (ud) və Adəm Zərbəliyev (balaban) müşayiət ediblər.

Layihənin məqsədi əsrlər boyu davam edən tədrici inkişaf və təkamül prosesi nəticəsində yetkinləşmiş, formalaşmış və kamilləşmiş muğam sənətimizi gələcək nəsillərə çatdırmaqdır.

525-ci qəzet .- 2025. -4 aprel(№55).- S.9.