Cəsur ürək

2023-cü il yanvarın 27-də Azərbaycan Respublikasının İran İslam Respublikasındakı Səfirliyinə qarşı terror aktı törədildi. Terroru törədən İran vətəndaşı Yasin Hüseynzadə "Kalaşnikov" markalı avtomat silahla səfirliyin binasına soxulub təhlükəsizlik postunu yardı, səfirlik əməkdaşlarına atəş açdı. Terror nəticəsində səfirliyin mühafizə xidmətinin rəisi Orxan Əsgərov qətlə yetirildi, xidmətin iki nəfər əməkdaşı yaralandı. Silahlı hücum zamanı mühafizəçi Vasif Tağıyev öz vəzifə borcunu yerinə yetirərkən həyatını təhlükəyə atdı. Baş verə biləcək böyük faciənin qarşısını almaq üçün şücaət göstərən Vasif Tağıyev terrorçunu zərərsizləşdirərək, aldığı güllə yaralarına baxmayaraq, hücuma məruz qalan insanların həyatını xilas etdi. Azərbaycan Respublikasının Prezidenti İlham Əliyev 3 fevral 2023-il tarixli sərəncamı ilə insanların həyatı və sağlamlığı üçün real təhlükə şəraitində xidməti borcunu yerinə yetirərkən igid və qətiyyətli hərəkətlərinə görə Tağıyev Vasif Natiq oğlunu 1-ci dərəcəli "Rəşadət" ordeni, Əsgərov Orxan Rizvan oğlunu (ölümündən sonra) və İmanov Mahir Kamil oğlunu isə "Vətən uğrunda" medalı ilə təltif etdi.

Vasif Natiq oğlu Tağıyev 1989-cu il martın 24-də Şuşa şəhərində anadan olub. Atası Natiq Tağıyev müharibə veteranı, anası Təranə xanım Tağıyeva isə tibb işçisidir. Tağıyevlər ailəsi 1992-ci ilin mayında Şuşanın işğalı ilə əlaqədar Tağıyevlər ailəsi Bakı şəhərinə köçüb. Vasif Xocalının Pirşağa kəndindəki 2 nömrəli tam orta məktəbi bitirib, 2007-ci ildə hərbi xidmətə çağırılıb. Qarabağa, Şuşaya olan sevgisi onu Milli Qvardiya sıralarında xidmətə aparıb, layiqli xidmətinə görə valideynləri təşəkkürnamə alıb.

Qəhrəmanımız Vasif Tağıyevin anası Təranə xanımla ilk dəfə İkinci Fəxri xiyabanda - şəhid Orxan Əsgərovun ildönümündə görüşdüm. Təranə xanım özünəməxsus azərbaycanlı şirinliyi ilə diqqətimi çəkdi. İlk dediyi bu oldu ki, kaş bizim Orxan da yaralanaydı, amma sağ qalaydı. Çox heyif.

Bəli, Orxan Əsgərovun şəhadət baharında vəfat etməsi ilə iki övladı atasız, valideynləri oğulsuz, gənc həyat yoldaşı isə arxa-dayaqsız qaldı. Terror aktında qəhrəmancasına həlak olmuş baş leytenant Orxan Əsgərova Allahdan rəhmət, ailəsinə səbir diləyirik!

Təranə xanımın hadisə baş verən günləri xatırlayır: "O günləri xatırlamaq çox çətindir. Yanvarın 27-də səhər tezdən Vasif mənə zəng edərək, "Ana, mən növbəyə gedirəm, internet zəifdir, ona görə də hər dəfə əlaqə saxlamaq mümkün olmur, məndən nigaran olmayın" dedi. Hadisə baş verən zaman işdə idim. Həyat yoldaşım telefonlar bu xəbəri mənə verəndə sanki dünyam alt-üst oldu. Dedim ki, oğlumla görüntülü telefon bağlantısı etməsəniz, onun özünü görməsəm, ölərəm. Ağ köynəyinin, üzünün qana bulaşdığını gördüm. Bu anları yaşadım... Çənəsindən aldığı güllə yarasından bir neçə dəfə əməliyyat olunan Vasifim xoşbəxtlikdən 9 saat davam edən son əməliyyatdan salamat çıxdı. Allah mənə onu yenidən bəxş etdi.

Biz Şuşadan çıxanda Vasifin 3 yaşı vardı. Torpaqlarımız işğaldan azad olunanda Vasifin sevinci aşıb-daşırdı, çünki onun mayası o torpağın suyundan bəhrələnmişdi. Oğlumuz vətənpərvər olduğundan işinin də ustası oldu, Tehranda baş vermiş hadisədə terrorçu ilə sona qədər əlbəyaxa olub mübarizə apardı".

Vasif Tağıyev 2009-cu ildən Əlahiddə Ümumqoşun Ordusunda, 2015-ci ildən Azərbaycan Respublikasının Tehran, Moskva, İstanbul, Gürcüstan səfirliklərinin Xüsusi Dövlət Mühafizə Xidmətində çalışıb, dəfələrlə "Qüsursuz xidmətə görə" medalı ilə təltif edilib.

Həyatlarını xilas etdiyi səfirlik əməkdaşlarının valideynləri, həyat yoldaşları, övladları ardı-arası kəsilmədən Vasifin görüşünə gəlirmişlər. Hadisənin şahidi olan Çinarə xanım o günü belə xatırlayır: "Vasifin dəhşətli səsi indi də qulaqlarımdadır. O, qışqıra-qışqıra deyirdi ki, uşaqları yuxarı mərtəbələrə aparın. Biz tez, hələ yuxudan oyanmamış, gecəköynəyində, ayaqyalın uşaqları yuxarı mərtəbələrə qaçırtdıq. Atışma səsləri kəsilmirdi. Dəhşət içərisində idik. Yaralanan kim idi, qalan kim idi, bilmirdik. Bu gün yaşadığımıza görə hamımız Vasif müəllimə sonsuz minnətdarıq".

Təranə xanımın dediklərindən: "Vasifin mehriban aiəsi var. Həyat yoldaşı Pərvin xanım alitəhsilli müəllimdir. Qızları Aysu 14, Zeynəb 11, oğlu Muhəmməd 10 yaşındadır. Vasif Bakıya qayıdanadək həyat yoldaşı və uşaqları ilə birlikdə çox çətin günlər yaşadıq. Səfiriyin əməkdaşlarını və ailələrini gətirən təyyarə yerə enəndən sonra arxayın olduq ki, onlar artıq etibarlı əllərdədir. Vasif deyir ki, təyyarədə həyatını qurtardığım uşaqların səsini eşidəndə, ağladım. Ölümün pəncəsindən qurtulan bu günahsızların yaşayacaqlarına sevindim. Ali Baş Komandanın ailəmizə göstərdiyi qayğılardan biri də Vasifin övladlarının Lev Landaunun adını daşıyan məktəbdə təhsil almalarıdır".

Allah xalqımızı, dövlətimizi qorusun. Dünyamıza əmin-amanlıq bəxş etsin. Allaha şükür, torpaqlarımız Vətənimizin qeyrətli oğullarının qanı bahasına işğaldan azad edildi, qazilərimizə cansağlığı diləyən Təranə xanıma deyirəm: O vaxtı atanız anasının (nənənizin) gözünə nur verən Zərifə xanım Əliyevaya təşəkkür məktubu göndərmişdi. Uzun zaman keçdikdən sonra siz övladınız Vasifin Vətənə salamat qayıtdığına və eləcə də 1-ci dərəcəli "Rəşadət" ordeni ilə təltif edildiyinə görə Ali Baş Komandan cənab İlham Əliyevə təşəkkür məktubu göndərdiniz. İki fərqli an, iki fərqli zaman, iki fərqli həyat - amma hər ikisində həyatla ölüm-dirim mübarizəsi!

Vasif Tağıyev Ali Baş Komandana müraciətində dövlətə bundan sonra da sadiq əsgər kimi xidmət edəcəyinə söz verir. Əsl Vətənpərvər! Əsl Vətənsevr!

Vasif Tağıyevin ailəsilə görüşəndə düşündüm ki, o, başqa cür hərəkət edə bilməzdi. Onun seçimində ailə tərbiyəsi, torpağa - Vətənə məhəbbət əsas yer tutur. Üzümü onun valideynlərinə tutub deyirəm: Vasif seçimində səhv edə bilməzdi. Axı onun mayası Şuşadan bəhrələnib. Nənə-babalarının, valideynlərinin doğulub-böyüdükləri Qarabağı görməsə də, düşüncəsinə Vətənimizin düşməndən azad edilməsi fikri hakim kəsilib. Ehtimal etmək olar ki, Vasif Tağıyev 44 günlük Vətən müharibəsinin şiddətini aydın dərk edirdi. Təranə xanımın dediyi kimi: "Mənim üçün çox əziz olan Şuşaya ölkəmin qeyrətli övladlarının sayəsində yenidən ayaq basdım".

...Vasif Tağıyevin - bizim qəhrəmanımızın bu il 36 yaşı tamam oldu. Ona sağlam və sakit həyat arzulayaraq deyirəm: Neçə-neçə ailəni ölümün pəncəsindən qurtaran İgid, uğurların bol olsun!..

Dilarə AĞAMUSA

Tarix üzrə fəlsəfə doktoru, yazıçı-publisist

525-ci qəzet .- 2025.- 16 aprel(№63).-S.13.