Şəxsi və ictimai inkişafa xidmət edən müsabiqə - "Yüksəliş"

Builki V "Yüksəliş" müsabiqəsində iştirak etmək üçün ümumilikdə 16 min 553 nəfər qeydiyyatdan keçib. Fevralın 28-də start götürən beşinci "Yüksəliş" müsabiqəsinin qeydiyyat mərhələsi aprelin 10-da başa çatıb. Qeydiyyatdan keçən iştirakçıların 11 min 923-ü kişi, 4630-u isə qadındır.

"Yüksəliş" müsabiqəsinin İşçi Qrupunun rəhbəri, Gənclər və idman nazirinin müavini Fərhad Hacıyevin sözlərinə görə, V "Yüksəliş" müsabiqəsində qeydiyyatdan keçən 16 min 553 nəfərdən 78-nin müraciəti yaş və ali təhsil meyarlarına uyğun gəlmədiyi üçün İşçi Qrupu tərəfindən məlumatları yoxlanılarkən ləğv edilib: "Bu il müsabiqəyə 9976 nəfər təkrar müraciət edib. Həmin şəxslər ötən illərdə keçirilən müsabiqədə də iştirak ediblər. İlk dəfə müraciət edən namizədlərin sayı isə 6577 nəfərdir. Namizədlərin əksəriyyəti Bakı, Abşeron-Xızı və Qarabağ iqtisadi rayonlarından müraciət edib. Müsabiqədə iştirak üçün yaş məhdudiyyəti 21-51 yaş arası müəyyənləşdirilib. Qeydiyyatdan keçənlər arasında 21 yaşını tamamlamış 106 nəfər, 51 yaşını tamamlamış 33 nəfər namizəd yer alır. Müsabiqəyə müraciət edən namizədlərin 56,48 faizi dövlət sektorunda, 41,05 faizi özəl sektorda, 1,49 faizi qeyri-hökumət təşkilatlarında (QHT), 0,98 faizi isə beynəlxalq qurumlarda çalışır".

F.Hacıyev vurğulayıb ki, qeydiyyatdan keçən şəxslərdən bakalavariat üzrə 15 min 601 nəfəri Azərbaycanda təhsil alanlardır: "Onlardan 713 nəfər xarici ölkələrdə, 239 nəfər isə hər ikisində təhsil alır. Bununla yanaşı, magistratura üzrə Azərbaycanda 7016 nəfər, xaricdə 1205, hər ikisində isə 391 nəfər təhsil alır".

İşçi Qrupun rəhbəri qeyd edib ki, bu il doktoranturada təhsil alan iştirakçıların sayında artım var: "Müraciət edən şəxslərdən 921-i Azərbaycanda, 213-ü xarici ölkələrdə, 9 nəfər isə hər ikisində doktoranturada oxuyur".

"Yüksəliş" müsabiqəsi ölkədə yeni nəsil idarəçilərin aşkara çıxarılması, perspektivli idarəçilərin dəstəklənməsi və təşviqi baxımından çox faydalı, eyni zamanda, şəffaf mexanizmə əsaslanan sosial lift layihəsi hesab edilir. "Yüksəliş" - istedadlı kadrların seçilməsi, inkişaf etdirilməsi üzrə müsabiqədir. Bu müsabiqə iştirakçılara kadr ehtiyatının inkişafı proqramında iştirak etmək, ölkənin gələcəyini quracaq şəxslərdən biri olmaq imkanını qazandırır. Bu müsabiqə peşəkar təlimlər üçün qrant qazanmaq, idarəetmə bacarıqlarınızı hərtərəfli inkişaf etdirmək, əvəzolunmaz əlaqələr qurmaq, vahid komandanın üzvü olmaq üçün qaçırılmayacaq fürsətdir. "Yüksəliş" - ilkin seçim mərhələlərindən uğurla keçən yarımfinalçılara peşəkarlarla görüşmək, finalçılara şəxsi inkişaf planları əldə etmək, qaliblərə isə idarəçi rəhbərlərlə çalışmaq imkanı qazandıran müsabiqədir.

"Yüksəliş"in Təşkilat Komitəsinin üzvü, Dövlət İmtahan Mərkəzinin Direktorlar Şurasının sədri Məleykə Abbaszadənin dediyinə görə, bu müsabiqə intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin edir. "Yüksəliş" müsabiqəsi karyera pilləsində yüksəlmək istəyən, istedadlı, özünə güvənən gənclər üçün bir şansdır.

DİM Direktorlar Şurasının sədri təhsil, karyera imkanlarına görə ölkədə gender bərabərliyinin mövcud olması, qanunlarımızda da bu məsələ ilə bağlı məhdudiyyətlərin olmadığını bildirib. Bəzən reallıqda bu qaydalara riayət edilmədiyini, qadınlarımızın karyera pillərində çətinliklərlə, qeyri-sağlam rəqabətlə üzləşdiklərini, bu tendensiyanın nəinki ölkəmizdə, demək olar ki, bütün dünyada hökm sürdüyünü vurğulayıb.

Gənclər və idman naziri Fərid Qayıbovun sözlərinə görə, "Yüksəliş" müsabiqəsinin əsas məqsədi potensiallı kadrların aşkarlanması, dəstəklənməsidir: "Müsabiqə bir neçə mərhələdən ibarətdir. Bu mərhələlər həm maraqlı, həm də həyəcanvericidir. Bütün bu amillər bizim iştirakçılara idarəetmə alətləri, yeni biliklər, yeni əlaqələr qazandırır. Bütün bunlar gözəl fürsətdir. "Yüksəliş" müsabiqəsi intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə yaradılıb. Bu baxımdan, idarəçi rəhbər şəxslərə, liderlərə xas xüsusiyyətlərin qiymətləndirilməsinə xüsusi diqqət yetirilir. Nəticəyə yönəlmə, kommunikasiya, işin icra edilməsi, komanda işi, sosial məsuliyyət, innovativ yanaşma kimi liderlik xüsusiyyətləri qiymətləndirilir. Eyni zamanda, ümumi dünyagörüşü, məntiq, riyazi təhlil, sürətli düşünmə, büdcənin idarə edilməsi, sosial intellekt, layihələrin idarə edilməsi kimi bilik və bacarıqlara da önəm verilir. Öncəliklə, gənclər təhsillərinə diqqətlə yanaşmalı və bununla yanaşı, mütaliəyə və şəxsi inkişafa - dil biliklərinin artırılması, müxtəlif proqram və kurslar vasitəsi ilə əlavə biliklərin əldə olunması və s. xüsusi önəm verməlidirlər. Məqsədlərinə doğru əmin addımlarla irəliləməli və ruhdan düşməməlidirlər. Bununla yanaşı, onlar sevdikləri və faydalı olduqları sahədə çalışmalı, öz karyeralarını həmin sahədə qurmalıdırlar. İşin və karyeranın yalnız şəxsi təminat, fərdi yüksəliş üçün deyil, eyni zamanda, cəmiyyət və ölkəyə faydalı olmaq üçün qazanıldığını anlamalıdırlar. Müsabiqənin hər bir mərhələsi müxtəlif bilik və bacarıqların ölçülməsinə yönəlib. Hər bir mərhələdən sonra siz yüksək və aşağı nəticə göstərdiyiniz istiqamətləri görə bilirsiniz və özünüzü hansı istiqamətdə inkişaf etdirəcəyinizi öyrənirsiniz. Bu müsabiqə həm də yeni tanışlıqlar qazanmaq, öyrənmək və öyrətmək üçün çox yaxşı platformadır".

Energetika naziri Pərviz Şahbazov Prezident İlham Əliyevin Sərəncamı ilə yaradılan və dəstəyi ilə həyata keçirilən "Yüksəliş" müsabiqəsinin ölkədə peşəkar kadr potensialının aşkara çıxarılması istiqamətində əhəmiyyətli təşəbbüs olduğunu qeyd edib. Nazir "Yüksəliş" müsabiqəsinin milli və dövlətçilik dəyərlərimizə, qanunlara hörmətlə yanaşan, üzərinə düşən vəzifəni vicdanla yerinə yetirən, bu meyarları əsas tutan perspektivli rəhbər şəxslərin müəyyən edilməsi istiqamətində ümidləri doğruldacağına əmin olduğunu vurğulayıb.

"Yüksəliş" müsabiqəsi əmək bazarında yüksəlmək istəyən hər bir peşəkar üçün irəliyə doğru böyük bir addımdır. Bu baxımdan müsabiqənin hər mərhələsi yeni imkanlar yaradacaq. "Yüksəliş" ilkin seçim mərhələlərindən uğurla keçən yarımfinalçılara peşəkarlarla görüşmək, finalçılara şəxsi inkişaf planları əldə etmək, qaliblərə isə idarəçi rəhbərlərlə çalışmaq imkanı qazandıran müsabiqədir.

"Yüksəliş" müsabiqəsinin qalibini bir il ərzində idarəçi rəhbərlərdən - böyük şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı və 20 min manat dəyərində pul mükafatı gözləyir.

Üçüncü "Yüksəliş"in qalibi Ülviyyə Mehralıyeva deyir ki, bu müsabiqə həyat albomumun ən parlaq səhifələrindəndir: "Müsabiqə boyu keçirdiyim hisslər, yaşadığım təcrübələr və əldə etdiyim yeni tanışlıqlar mənim üçün əvəzolunmazdır. Öz bilik və bacarıqlarıma yenidən nəzər salmaqla, idarəçilik sahəsində özümü sınamaqla müsabiqə mənim üçün bir növ özünüqiymətləndirmə imkanı idi. Komandalarda müxtəlif keyslər üzrə işləyərkən əyani şəkildə münaqişə hallarının idarə edilməsi, stress altında çevik qərarvermə və dəyişikliklərin idarə olunması kimi bacarıqların idarəçi bir şəxs üçün necə vacib bir xüsusiyyət olduğunu daha aydın anlayırsan. Düşünürəm ki, mən bu sahələrdə uğurlu nəticələr göstərdim və bu da müsabiqənin mənə aşıladığı ən vacib dəyərlərdən biri olub. Çalışdığım maliyyə idarəetməsi - daşınmaz əmlak investisiyaları sahəsində lazımi qədər təcrübə topladığımı və idarəetmə bacarıqlarımı müəyyən səviyyədə inkişaf etdirdiyimi düşünürəm. Hazırda Dövlət Neft Fondunun əməkdaşı kimi səlahiyyətlərim çərçivəsində dövlətimiz üçün maksimum faydalı olmağa səy göstərirəm. İşimdə hər hansı dəyişiklik haqqında danışmaq isə, düşünürəm ki, hələ tezdir. "Yüksəliş" müsabiqəsinin heç bir mərhələsinə əvvəlcədən hazırlaşmamışam. Xüsusilə final və yarımfinal mərhələləri o qədər yaxşı təşkil edilib ki, orda hər hansı süni bir hərəkət qiymətləndiricilər tərəfindən asanlıqla fərqləndirilirdi. Ona görə mən potensial iştirakçılara müsabiqə boyu qətiyyətli və pozitiv olmağı, təbii və peşəkar oyun göstərmələrini tövsiyə edərdim".

Ü.Mehralıyevanın fikrincə, müsabiqə müddətində ən maraqlı mərhələlər yarımfinal və finaldır: "Sözügedən mərhələlərdə iştirakçılar müxtəlif komandalarda oynayaraq çoxsaylı keysləri həll etməyə çalışırlar. Qiymətləndiricilər isə müsabiqənin səkkiz meyarı üzrə iştirakçıları qiymətləndirirdi. Bu meyarlar strateji düşünmə, effektivliyin idarə olunması, nəticəyönümlülük, komanda işi, kommunikasiya bacarıqları, dəyişikliklərin və innovasiyaların idarə olunması, sosial məsuliyyət, liderlikdir. Yarımfinal və final mərhələləri həyəcanlı və bir çox hallarda gərgin keçirdi. Bu da öz növbəsində çoxlu enerji və qətiyyət tələb edirdi. Xüsusilə final mərhələsi məndə həm emosional, həm də təcrübə baxımından əvəzolunmaz bir iz buraxıb. "Yüksəliş" müsabiqəsinin hər bir mərhələsi çətindir. Bu həm sualların çətinlik səviyyəsi, həm də iştirakçıların kifayət qədər güclü olması ilə əlaqədardır. Sözsüz ki, müsabiqənin kulminasiyası final mərhələsidir. Xatırlayıram ki, bu mərhələdə, xüsusilə mentor keysində çox həyəcanlı idim. Ancaq mənə ən çətin gələn mərhələ "İdarəetmə bacarıqları" imtahanı olub. Həyatımda buna bənzər bir imtahan verməmişdim. Düşünürəm ki, bütün mərhələlərdə mənə yüksək konsentrasiya qabiliyyətim, güclü xarakterim və qətiyyətim kömək edib. Yarımfinal və final mərhələlərində isə insanlarla ünsiyyət və kommunikasiya, həmçinin hadisələri düzgün dəyərləndirmə qabiliyyətim məni digər iştirakçılardan fərqləndirən xüsusiyyətlər olub".

Sevinc QARAYEVA

525-ci qəzet .- 2025.- 25 aprel(№70).-S.15.