Bu dünyanın dərdlərinə

Öz könlümü tuş elədim.

Udub dərdin havasını

Dərdlərimi nuş elədim.

Həsrət qalıb nəfəsinə

Yaşadım qəm həvəsinə.

Kədərin, dərdin səsinə

Qulaq verdim, guş elədim.

Dərd bürüdü hər küncümü,

Ala bilmədim dincimi.

Əldən çıxan sevincimi

Uçub gedən quş elədim.

Qovruldum mən bu kürədə.

Bir avaz gəldi hərədən.

Dağıldılar yan-yörədən,

Dərdləri sirdaş elədim.

lll

Sunayla Nazlıya

(Nəvələrimə)

Dünyamızı bəzədiniz doğulub.

Dünyamıza gəlişiniz mübarək!

Gülüşünüz südlə baldan yoğrulub.

Can dərmanı gülüşünüz mübarək!

Yeridiniz - Yer sevindi, güldü Gün.

Dünyanın da dadı artdı həmin gün.

Təzələndi həyatımız büsbütün,

Addımınız, yerişiniz mübarək!

Oyuncaqlar - silahınız, ordunuz.

Yenilməyən qalaları qurdunuz.

Divarlara təzə naxış vurdunuz.

Divardakı əl işiniz mübarək!

Bəhram ƏLİYEV

525-ci qəzet .- 2025.- 5 avqust(№136).- S.14.