Hər doğum günündə bir yaş da böyüyən sevgi

Vətən müharibəsi şəhidi Amil Hüseynovun xatirəsinə

Bir körpə göz açdı dünyaya... Avqustun isti bir günündə, mayası igidliklə, qəhrəmanlıqla yoğrulan bir kəndin qoynunda! Ağlayaraq haray saldı bu dünyaya gəlişini, elə o an doldu ciyərlərinə bu vətənin, bu kəndin havası. Balaca ovucları ilə anasının barmaqlarından bərk-bərk yapışan bu körpə, sanki böyüklərin dünyasına qatılmağa tələsirdi. Baxışlarında günahsız bir dünyanın saflığı vardı. Elə o vaxtdan öz məsum baxışlarıyla bu dünyanın ağır yükünü çiyinlənəcəyindən xəbər verirdi. Adını Amil qoydular. Mənası - “Sözünə əməl edən”, “təsir edən”, “iş görən”, “əməl sahibi” deməkdir. Onun adı ilə həyatı arasında dərin bir uyğunluq var idi. O, bu adı sadəcə daşımadı – həyatı boyunca yaşadı, sübut etdi və haqqını verdi.

O, hələ çox balaca idi... Hələ topaqla oynayarkən həyatın nə olduğunu bilmirdi. Bircə onu yaxşı bilirdi ki, bu torpaq onundur. Torpaqla oynamaq onun üçün uşaq əyləncəsindən ziyadə bir bağlılıq idi. Oynamaqdan doymurdu, balaca əlləri palçığa bulaşır, təmiz paltarları toz-torpaq olurdu. Başı elə qarışırdı ki, anası onu çağıranda belə oyunundan ayrılmaq istəmirdi. Elə o vaxtdan çox sevirdi torpağın qoxusunu, ayaqlarının altında bir-birinə toxunub xışıldayan daşları. O sevgi zamanla böyüdü və Amilin ürəyində Vətənə çevrildi. “Qələbə” elə onun üçün o vaxt torpaqdan, daşdan qurduğu qalalar idi. O torpağın üstündə balaca barmaqlarıyla çəkdiyi cizgilərin zamanla böyüyüb bir şəhidin addım izlərinə çevriləcəyini anlalayacaq yaşda deyildi hələ.

O, artıq böyümüşdü... Hər şeyi dərk edirdi. Qəlbində böyüyən cəsarəti, mərdliyi, qeyrəti, əzmi, səxavəti, fədakarlığı, incəliyi, sevgini ayna kimi göstərən baxışlarındakı saflıq olduğu kimi qalırdı. Köçkünlük həyatının, doğma kəndindən uzaqda böyüməsinin, onun əlindən alınmış uşaqlığının acısı vardı köksündə. O saflığın içində düşmənə qarşı hiddət də böyütmüşdü. Bir zamanlar oyuncağı torpaq olan bu uşaq indi əllərində torpağı qorumaq üçün silah tuturdu. Əvvəllər üzərində oturub oynadığı torpağı qorumaq üçün indi ayağa qalxmışdı. O, təkcə döyüşmədi, həm də yaşatdı - ailəsinin, kəndinin adını, xalqının şərəfini, qürurunu. İndi O, əsl qələbəni gerçəkləşdirmişdi. “Zəfərin Amili” olaraq əbədiyyətə qovuşdu. Amma bu əbədiyyət yoxluq deyil, onun yolunun sonsuzluğudur. Onun üçün daim axan zamanın tıqqıltısıdır.

Torpağın azadlığı uğrunda bitən hekayə, torpaqla başlamışdı... Artıq 16 avqust təkcə bir evin, bir ailənin deyil, butün Azərbaycanın qəlbində tarixə çevrilmiş bir gündür. Bu günün xatirəsi bütün xalq üçün bir qəhrəmanın doğum günü olaraq doğmalaşıb. Gənc surəti, yaraşıqlı cismi, yaşındakı 34 rəqəmi dəyişməyən doğum günlərində hər il böyüyən yalnızca sevgi və qəhrəmanlıqdır.

Və bu gün onun həsrəti ilə böyüyən bir kədər içində doğulduğu günü yad edirik. Doğum günündə onun təzə geyimi yenilənən plakatları, fotolarıdır. Hədiyyələri məzarına düzülən gülləri, açılan süfrəsi isə bir fatihə duası və bir qismət halvasıdır. Biz isə bu sadə və müqəddəs, fəqət ağrılı həqiqətlə barışmağa məcburuq.

Sən daha böyümürsən, igid, yaşının üstünə yaş gəlmir, amma hər doğum günündə bir az da ucalırsan! Çünki sən bu vətən üçün doğulmuş oğulsan! Cənnətdəki 39 yaşın mübarək!

Ruhun şad, məkanın cənnət olsun, qəhrəman şəhid!

Həyat yolu haqqında qısa arayış: Hüseynov Amil Rasim oğlu 1986-cı il avqust ayının 16-da Füzuli rayonun Əhmədalılar kəndində anadan olmuşdur. Birinci sinifə Bakıda fəaliyyət göstərən Ağdam rayon 36 saylı tam orta məktəbində getmiş və həmin məktəbin məzunu olmuşdur. Orta məktəbi bitirdikdən sonra 2004-2006-cı illər ərzində Beynəlxalq Sülhməramlı ordu tərkibindəki Kosovoda fəaliyyət göstərən Azərbaycan Sülhməramlı qoşunlarında həqiqi hərbi xidmət yolu keçmişdir.

O idmanın karate növü ilə məşğul olmuş, Respublikada və xaricdə keçirilən yarışlarda iştirak edərək yüksək nəaliyyətlər qazanmışdır. Hərbi fəaliyyətinə 2010-cu ildən Azərbaycan Respublikasının Daxili qoşunlarında başlamışdır. Daha sonra Azərbaycan Respublikasının Milli Ordu sıralarında Müddətdən artıq Həqiqi Hərbi xidmətdə kəşfiyyatçı kimi fəliyyətini davam etdirmiş, 2013-cü ildə Türkiyədə kəşfiyyatçı olaraq təlim kursu keçmişdir. O, həmçinin, Beyləqanda və Füzulidəki N saylı hərbi hissələrdə Azərbaycan və Ermənistan Silahlı Qüvvələrinin təmas bölgələrində xidmət etmişdir. 2020-ci il sentyabrın 27-də başlayan İkinci Qarabağ müharibəsinin fəal iştirakçısı olan, ən ön sıralarda döyüşən Amil Hüseynov Füzuli və Xocavənd uğrunda gedən döyüşlərdə kəçfiyyatçı olaraq xüsusi şücaət göstərmişdir. Oktyabrın 10-da ildən şəhidlik zirvəsinə ucalan qəhrəmanımızın nəşi 60 gündən sonra Füzuli rayon Əbdürrəhmanlı kənd istiqamətindən tapılmış və 10 dekabr 2020-ci ildə öz doğma kəndində böyük izdihamla son mənzilə yola salınmışdır.

Azərbaycan Respublikasının Prezidenti İlham Əliyevin sərəncamına əsasən, Amil Hüseynov şəhadətindən sonra "Füzulinin, Xocavəndin, Cəbrayılın, Şuşanın azad edilməsinə görə", "Vətən uğrunda" , “Cəsur döyüşçü” medalları və 3-cü dərəcəli “Vətənə xidmətə görə” ordeni ilə təltif edilmişdir.

Xalisə MƏMMƏDOVA

Vətən müharibəsi şəhidi Amil Hüseynovun həyat yoldaşı

525-ci qəzet .- 2025.- 15 avqust(№144).- S.6.