Böyük tarixə bədii baxış

Türk Mədəniyyəti və İrsi Fondu "Türk ədəbiyyatının inciləri" kitab seriyasından Əməkdar incəsənət xadimi, Azərbaycan Yazıçılar Birliyinin katibi, nasir Elçin Hüseynbəylinin "Gültəkin xaqan" romanını çap edib. "Zərdabi" nəşriyyatında işıq üzü görən kitabın redaktorları Fərid Hüseyn və Dürdanə İbrahimova-Hüseynbəyli, rəssamı Seyran Allahverdidir

Nəşrin layihə rəhbəri və ön sözün müəllifi Türk Mədəniyyəti və İrsi Fondunun prezidenti, Qazaxıstan Respublikasının Əməkdar İncəsənət Xadimi, sənətşünaslıq elmləri doktoru, professor Aktotı Raimkulovadır. Kitaba yazılmış ön sözü oxucularımıza təqdim edirik.

Türk dünyasının tarixi - bu, əcdadlarımızın müdrikliyinin, qəhrəmanların igidliyinin və mənəvi ənənələrin zənginliyinin vəhdət təşkil etdiyi böyük bir xəzinədir. Bu irs mədəniyyətimizi inkişaf etdirir, dünyagörüşümüzü formalaşdırır və gələcəyə gedən yolda etibarlı bələdçi rolunu oynayır. Keçmiş mədəni mirasımıza müraciət etməklə biz yalnız tariximizin şanlı səhifələrini qoruyub saxlamırıq, həm də yeniliklər yaratmaq üçün güc və ilham mənbəyi qazanırıq.

Azərbaycan Respublikasının Prezidentinin təşəbbüsü və Qazaxıstan, Qırğızıstan və Türkiyə dövlət başçılarının dəstəyi ilə yaradılmış Türk Mədəniyyəti və İrsi Fondu Türk xalqlarının zəngin tarixi irsini və mədəniyyətini öyrənir, qoruyur və beynəlxalq aləmdə tanıdır. Fondun fəaliyyətində prioritet istiqamətlərdən biri Türk dünyasının çoxəsrlik tarixi və görkəmli şəxsiyyətlərinin unikal irsinin təbliğidir.

Fond tərəfindən dörd kitab seriyası - "Türk dünyasının görkəmli şəxsiyyətləri", "Türk ədəbiyyatının inciləri", "Türk dünyasının elmi inciləri" və "Türk dünyasının tarixi inciləri" nəşr edilir. Azərbaycanın Əməkdar incəsənət xadimi, istedadlı yazıçı və Yazıçılar Birliyinin katibi Elçin Hüseynbəylinin "Gültəkin xaqan" romanı Fondun "Türk ədəbiyyatının inciləri" seriyasından nəşr olunan növbəti əsərdir.

Əsərin süjeti bizi şanlı Türk tarixinin qüdrət simvoluna çevrilmiş bir dövrə - Birinci Göytürk xaqanlığı zamanına aparır. Romanın əsas ideyası Türk dünyasının birliyidir. Yazıçı romanda qəhrəmanların ziddiyyətli xarakterlərini və dövrün fırtınalı hadisələrini bir araya gətirərək maraqlı bir bədii-tarixi sintez yaradır.

Əminik ki, bu əsər oxuculara Türk birliyinin önəmini daha dərindən anlamaqda kömək edəcək, onların yaddaşında qəhrəmanların parlaq obrazlarını möhkəmləndirəcək və ədəbiyyatsevərlərdə Türk dünyasının çoxəsrlik tarixinə böyük maraq oyadacaq.

Aktotı RAİMKULOVA

Türk Mədəniyyəti və İrsi Fondunun prezidenti

525-ci qəzet .- 2025.- 26 avqust (№151).- S.9.