Xalq yazıçısı Kamal Abdullanın 75 illik yubileyi qeyd olunub

Azərbaycan Respublikasının Mədəniyyət Nazirliyi və Teatr Xadimləri İttifaqının birgə təşkilatçılığı ilə Xalq yazıçısı, akademik Kamal Abdullanın 75 illik yubileyi münasibətilə “Sözün sehrinə sığınan adam” adlı tədbir keçirilib.

AZƏRTAC xəbər verir ki, tədbirdə çıxış edən Əməkdar artist, professor Azad Şükürov Kamal Abdullanın zəngin elmi, ədəbi və ictimai fəaliyyətindən söz açıb.

Azərbaycan Teatr Xadimləri İttifaqının sədri, Xalq artisti, Dövlət mükafatı laureatı Hacı İsmayılov, Azərbaycan Dövlət Mədəniyyət və İncəsənət Universitetinin rektoru, Əməkdar incəsənət xadimi, professor Ceyran Mahmudova, Azərbaycan Dillər Universitetinin Azərbaycan ədəbiyyatı kafedrasının müdiri, akademik Muxtar İmanov, Əməkdar incəsənət xadimi, sənətşünaslıq elmləri doktoru, professor Məryəm Əlizadə və Azərbaycan Dövlət Akademik Musiqili Teatrının rejissoru Əsgər Əsgərov ədibin Azərbaycan elminə və mədəniyyətinə verdiyi əvəzsiz töhfələrdən danışıblar.

Azərbaycan Teatr Xadimləri İttifaqının məsul katibi Aida Qafarova AZƏRTAC-a açıqlamasında söyləyib ki, Xalq yazıçısı Kamal Abdulla müasir Azərbaycan mədəniyyətinin nadir simalarından biridir. “Onun çoxşaxəli yaradıcılığı milli mədəniyyətimizin formalaşmasına mühüm töhfələr verib. Bu zəngin fəaliyyətin mühüm qollarından biri də teatr sənətinə bəxş etdiyi dəyərli əsərlərdir. Yazıçının ölkə teatrlarında uğurla səhnələşdirilən tamaşalarında dilin milli yaddaşın daşıyıcısı kimi təqdim olunması xüsusilə ön plana çəkilir. Kamal Abdullanın əsərləri beynəlxalq səviyyədə də böyük maraq doğurur. Onun elmi düşüncələri və bədii axtarışları insanı düşünməyə, dərk etməyə, həm özünü, həm də dünyanı yenidən kəşf etməyə çağırır”,- deyə A.Qafarova əlavə edib.

Tədbirin bədii hissəsində Azərbaycan Dövlət Mədəniyyət və İncəsənət Universiteti tələbələri yazıçının “Bir, iki, bizimki” tamaşasını nümayiş etdiriblər.

Səhnə əsəri qəhrəmanın əbədi rahatlıq tapmaq arzusunu, iki fərqli dünyanın insanları arasında söhbət, toxunuş, sevgi, peşmanlıq və qovuşmaq istəkləri üzərində qurulan süjet xəttini səhnəyə daşıyıb.

525-ci qəzet .- 2025.-3 dekabr(№220).- S.9.