Romada “Muzeylərdə Musiqi 2025” təşəbbüsü çərçivəsində Azərbaycan balabanı səslənib

İtaliyanın paytaxtı Romada keçirilən “Muzeylərdə Musiqi 2025” (Musei in Musica 2025) təşəbbüsü çərçivəsində Azərbaycan milli musiqisi şəhər ictimaiyyətinə təqdim olunub.

AZƏRTAC xəbər verir ki, Azərbaycanın İtaliyadakı səfirliyinin nəzdində fəaliyyət göstərən Mədəniyyət Mərkəzi bu il İtaliyanın “Zetema Mədəniyyət Layihəsi” tərəfindən tədbirə xüsusi qonaq qismində dəvət olunub və “Sehrli gecə: Azərbaycan balabanının nəfəsi” adlı xüsusi konsert proqramı Romanın Trastevere rayonunda yerləşən Roma Muzeyində təşkil edilib.

Tədbirin açılışını Mədəniyyət Mərkəzinin direktor müavini Gülnar Tağızadə edib, qədim nəfəsli musiqi aləti olan balabanın tarixi, səsi və mədəni əhəmiyyəti barədə auditoriyaya məlumat verib, ifaçılar təqdim olunub.

Daha sonra Azərbaycanın İtaliyadakı səfiri Rəşad Aslanov konsert iştirakçılarını salamlayaraq, tədbirin təşkilatçılarına, o cümlədən Roma Bələdiyyəsi, Roma Muzeylər Şəbəkəsi və Zetema Mədəniyyət Layihəsinə təşəkkürünü bildirib. Səfir qədim “Balaban sənətkarlığı və ifaçılıq sənəti”nin 2023-cü ildə UNESCO-nun Bəşəriyyətin Qeyri-Maddi Mədəni İrsinin Reprezentativ Siyahısına daxil edildiyini xatırladıb. Azərbaycan musiqisinin zəngin kökləri, onun beynəlxalq mədəni dialoqda oynadığı rol və İtaliya ictimaiyyətinin bu musiqiyə göstərdiyi böyük marağın mədəni əməkdaşlıq baxımından xüsusi əhəmiyyət daşıdığını vurğulanıb.

Konsert proqramında balaban ifaçısı Mehman Nuriyev və pianoçu Səbinə Məmmədova çıxış edərək, xalq və bəstəkar mahnılarını ifa ediblər. İnsan səsini xatırladan balabanın ifası yerli tamaşaçılar tərəfindən böyük rəğbətlə qarşılanıb.

Qeyd edək ki, Azərbaycan artıq bir neçə ildir Romada keçirilən böyük mədəni proqramlarda fəal iştirak edir. “Muzeylərdə Musiqi” təşəbbüsü isə İtaliya paytaxtında musiqi və sənətin birləşdirilməsi ilə mədəni irsin paytaxt sakinlərinə təqdim olunmasına xidmət edən əsas illik layihələrdən biridir.

525-ci qəzet .- 2025.-3 dekabr(№220).- S.9.