Nərmin Sadıqovanın yeni fərdi sərgisi açılacaq

Fevralın 23-dən martın 3-dək Müasir İncəsənət Muzeyində rəssam Nərmin Sadıqovanın “Mif” adlı fərdi sərgisi keçiriləcək.

“Qafqazinfo” xəbər verir ki, sərgi tanınmış rəssamın son illərdə astrologiya və müxtəlif mövzularda yaratdığı 40-a yaxın rəsm əsərlərindən ibarət olacaq.

“Mif” adlı sərgi Nərmin Sadıqovanın yaradıcılığında yeni bir səhifə sayıla bilər. Bu sərgidə təqdim olunacaq əsərlərdə, rəssamın əvvəllər müraciət etdiyi mövzularla yanaşı, yeni bir istiqamət də özünü göstərir. Sərgi astrologiya və incəsənətin sintezini təqdim edərək onlar arasındakı dərin əlaqələri araşdırmaq istəyən sənətsevərlər üçün unikal təcrübə yaradacaq.

Rəssam astrologiyanın əsrarəngiz dünyasını rəngkarlığın estetik ifadə vasitələri ilə birləşdirərək on iki bürcün özünəməxsus cəhətlərini – mifoloji mənasını, planetar təsirlərini və simvollarını kətan üzərində öz bədii yanaşması ilə əks etdirir. Müəllif bu silsilə əsərlərində hər bir bürcün fərdi xüsusiyyətlərini əyaniləşdirərək seçilmiş kompozisiya quruluşu, rəng palitrası və digər bədii ifadə vasitələri ilə onların bədii obrazını yaradıb.

Astroloji biliklərlə dəstəklənən bu əsərlərin kompozisiyalarında təsvir olunan elementlər kosmosla olan əlaqəni daha dərindən hiss etməyə imkan yaradacaq, çünki hər bir detal bütöv bir sistemin və onun arasındakı əlaqələrin simvolik bir təcəssümüdür. Bu sərgi izləyicilərə yalnız görmə bacarıqlarını deyil, həm də düşüncə tərzini genişləndirmək və dərin mənaları kəşf etmək imkanı verəcək. Bu baxımdan, Nərmin Sadıqovanın “Mif” adlı fərdi sərgisi bədii əsərlərin sadəcə estetik tərəfini deyil, həm də insan həyatına olan təsirini və astroloji simvolların dərin məzmununu əks etdirməklə yaddaşlarda silinməz iz buraxacaq.

525-ci qəzet .- 2025- 13 fevral(№27).- S.10.