Azərbaycan Kaliforniyada keçirilən mədəniyyət festivalında təmsil olunub

Azərbaycan Kaliforniyada keçirilən mədəniyyət festivalında təmsil olunub

Azərbaycan ABŞ-nin Kaliforniya ştatında keçirilən mədəniyyət festivalında təmsil olunub.

Bu barədə "Report"a Diasporla İş üzrə Dövlət Komitəsindən məlumat verilib.

Bildirilib ki, Kaliforniya ştatının San Ramon şəhərində dünyanın müxtəlif mədəniyyətlərini bir araya gətirən “İcmada mədəniyyət” festivalı keçirilib.

Şimali Kaliforniya Azərbaycan Mədəniyyət Cəmiyyətinin nümayəndələri festivalda guşə yaradıb, ölkəmizi təmsil edib.

Azərbaycana aid suvenirlərin, kitabların sərgiləndiyi guşədə qonaqlara milli şirniyyatlarımız da təqdim olunub.Milli geyimdə olan cəmiyyət üzvləri – Nurlan Şükürlü, Könül Əliyeva, Cavid Hüseynli, Günay Xəlilova və Hüseyn Hüseynli qonaqlara ölkəmizin qədim tarixi, zəngin mədəniyyəti, mətbəxi, füsunkar təbiəti, turizm potensialı barədə ətraflı məlumat verib, sualları cavablandırıb.

Şimali Kaliforniya Mədəniyyət Cəmiyyətinin nəzdində fəaliyyət göstərən və tanınmış xoreoqraf Rozi Alməmmədovanın rəhbərlik etdiyi Azərbaycan rəqs ansamblının ifasında “Cəngi”, “Ağ Çiçəyim” və “Yallı” rəqsləri iştirakçıların alqışları ilə qarşılanıb.

525-ci qəzet .- 2025.- 1 fevral(№19).-S.13.