Xalq rəssamı Sirus Mirzəzadənin fərdi sərgisi açılıb

Azərbaycan Milli İncəsənət Muzeyində Xalq rəssamı, müasir təsviri sənətin tanınmış nümayəndələrindən olan Sirus Mirzəzadənin “Xəyalların qanadlarında” adlı fərdi sərgisinin açılış mərasimi keçirilib.

AZƏRTAC xəbər verir ki, Mədəniyyət Nazirliyi və Milli İncəsənət Muzeyinin birgə təşkilatçılığı ilə reallaşan sərgidə rəssamın 100-ə yaxın rəngkarlıq və qrafika əsəri, eləcə də müəllifi olduğu monumental rəngkarlıq nümunələrinin fotoşəkilləri nümayiş etdirilib.

Sirus Mirzəzadə həm monumental, həm də dəzgah rəngkarlığı, eləcə də qrafika sahələrində özünəməxsus bədii irs yaratmış, milli rəssamlıq məktəbinə böyük töhfələr vermiş sənətkarlardandır. Ə.Əzimzadə adına Azərbaycan Dövlət Rəssamlıq Məktəbi və Moskva Ali Rəssamlıq-Sənaye Məktəbinin məzunu olan rəssam 1970-ci illərdən özünəməxsus yaradıcılıq yoluna başlamışdı. Onun ənənə və müasirlik üzərində qurulan əsərləri seçilən dəst-xəttə malik olmaqla özündə rəssamın poetik düşüncə tərzini, dünyaya fəlsəfi münasibətini, gözəlliyə vurğunluğunu və bu kimi bədii xüsusiyyətləri əks etdirir.

Xalq rəssamının bədii fəaliyyətinin aparıcı istiqamətini təşkil edən monumental boyakarlıq sahəsi - Bakı, eləcə də digər şəhər və rayonlarda yerləşən binaları bəzəyən freska, mozaika və vitrajların fotoşəkilləri sərginin bir hissəsini təşkil edir və rəssamın çoxşaxəli yaradıcılığı haqqında dolğun təsəvvür yaradır.

Qeyd edək ki, sərgi martın 1-dək davam edəcək.

525-ci qəzet .- 2025- 4 fevral(№20).- S.11.