Mədəniyyət Nazirliyinin dəstəyi ilə 26 film hazırlanır

Mədəniyyət Nazirliyi və ARKA-nın dəstəyi ilə 2023-cü ildə 3, 2024-cü ildə 21 film çəkilib. Hazırda 26 filmin istehsalı davam etdirilir.

“Qafqazinfo” AZƏRTAC-a istinadən xəbər verir ki, bunu mədəniyyət naziri Adil Kərimli nazirliyin 2023–2024-cü illərdəki fəaliyyətinə dair geniş kollegiya iclasında çıxışı zamanı deyib.

Nazir bildirib ki, ötən dövr ərzində ölkə rəhbərliyi tərəfindən teatr xadimlərinin maddi rifahının, teatrların maddi-texniki təchizatının yaxşılaşdırılması sahəsində diqqətəlayiq işlər görülüb.

“Azərbaycan Dövlət Gənc Tamaşaçılar və Gəncə Dövlət Dram teatrlarına “milli”, Şuşa Dövlət Musiqili Dram Teatrına “aparıcı”, Beynəlxalq Muğam Mərkəzinə isə “beynəlxalq” statusu verilib. Həmçinin bölgələrdə mədəni iştirakçılığın səviyyəsinin artırılmasına da diqqət yetirilib. 2023-cü ildə “Teatr-tamaşa müəssisələrinin illik repertuarlarının və dövlət sifarişi əsasında hazırlanan tamaşaların məzmununun qiymətləndirilməsi üzrə Ekspert şurası” yaradılıb, - deyə o əlavə edib.

525-ci qəzet .- 2025- 4 fevral(№20).- S.10.