Gənclər Kitabxanasında Xanım Aydının kitablarının təqdimatı

Respublika Gənclər Kitabxanasında şair, yazıçı, tərcüməçi, ssenarist, Azərbaycan Yazıçılar Birliyinin üzvü Xanım Aydının nəzm və nəsr nümunələrindən ibarət “İkimiz” və “Çamadan” kitablarının təqdimatı olub.

Kitabxananın direktoru Aslan Cəfərov qonaqları salamlayaraq təqdim edilən əsərlərdə səmimiyyət, insanın ən dərin, həssas duyğularının əks olunduğunu deyib.

Azərbaycan Ədəbiyyat Fondunun baş direktoru Varis Yolçuyev müəllifin geniş və çoxşaxəli yaradıcılığı haqqında danışaraq, onun dərin məzmunlu əsərləri Azərbaycan dilinə tərcümə etdiyini diqqətə çatdırıb.

Əməkdar incəsənət xadimi İntiqam Qasımzadə Xanım Aydının şair təbiətli nasir olduğunu söyləyərək, onun “Sərçə”, “Rəngbərəng kəpənəklər” hekayələrində hər bir oxucunun qəlbini riqqətə gətirəcək həssas məqamlara toxunduğunu, həmçinin uzun illər müəllif ilə əməkdaşlıq etdiyini dilə gətirib.

“Ulduz” jurnalının baş redaktoru Qulu Ağsəs, Prezidentin İşlər İdarəsinin Siyasi sənədlər arxivinin şöbə müdiri Lamiyə Həsənova, Respublika “Xatirə Kitabı”nın baş redaktoru Nəzakət Məmmədova, "Azərbaycan" jurnalının baş redaktor müavini Südabə Ağabalayeva, Əməkdar jurnalist Zemfira Məhərrəmli, yazıçı Yunus Oğuz, filologiya üzrə fəlsəfə doktoru, dosent, yazıçı-publisist Şərəf Cəlilli, sənətşünaslıq üzrə fəlsəfə doktoru Fəxriyyə Lilpar, AzTV-nin əməkdaşı, yazıçı-publisist Təranə Bakirqızı və digərləri Xanım Aydının yaradıcı fəaliyyəti barədə fikirlərini bölüşüblər.

525-ci qəzet .- 2025.- 7 fevral(№23).- S.9.