Həmişə ön sıralarda

"MİR ŞAHİNİN VAXTI" VERİLİŞİ ƏTRAFINDA DÜŞÜNCƏLƏR

Mirşahinin uzun illər Azərbaycan televiziya məkanında apardığı, əsasən siyasi təhlil xarakterli verilişlər daim diqqət mərkəzində olub.

Hələ tələbəlik illərindən onun peşəkar jurnalist kimi yetişəcəyinə şübhəm yox idi. Gənc və fəal tələbənin istedadı elə universitet auditoriyalarında özünü büruzə verirdi. Digər tələbə dostum - həmkarım, həmyerlim Etibar İbrahimovla bir qrupda oxuyurdular və Mirşahinlə tanışlığımız da onun vasitəsilə baş tutmuşdu.

Bizim tələbəliyimiz 80-ci illərin sonuna təsadüf edirdi - milli-azadlıq hərəkatının vüsət aldığı o ağır dövrə. Fakültədə təhsil alan əyalətdən gəlmiş gənclər çox idi. Geyimləri olduqca sadə, bir qədər də kasıbyana olduğundan biz - şəhər uşaqları onlara az diqqət ayırırdıq. Mirşahin də həmin gənclərin sırasındaydı. Tələbəlik illəri və sonrakı proseslər kimin nəyə qadir olduğunu açıq-aşkar göstərdi. Mirşahin hətta müəllimləri özünəməxsus mürəkkəb, bir qədər də qəliz, düşündürücü söz və fikirləri ilə mat-məəttəl qoymuşdu. Sanki ağzından od-alov püskürən bir tələbə-gəncin çıxışları qarşısında acizlik hökm sürürdu. Vaxt-zaman torpaq, millət, azadlıq şüarlarının fonunda istedadlar yetişirdi. Mirşahinin taleyinə ön sıralar düşdü, daha dəqiq desək, o özü qeyri-adi istedadı ilə bunu qazandı. Bu kimi keyfiyyətləri Mirşahini daha gərgin mübarizələrə atdı - ANS telekanalının yaradıcılarından birinə çevrildi. Etibar İbrahimov Bakıda qaldı, ANS-də çalışdı. Mən isə, qatı millətçi Ömər Faiq Nemənzadə demiş, rus-erməni yuvasına çevrilmiş Bakını heç sevmədiyimdən Cümhuriyyət paytaxtına - doğma Gəncəyə qayıtdım. Bax burada Mirşahinə məxsus bir böyük keyfiyyəti də xüsusi qeyd etməliyəm - mübarizlik və işgüzarlıq!

Sonrakı dövrlərdə keçmiş ANS telekanalındakı məhsuldar fəaliyyəti, ictimai-siyasi və analitik təhlilləri, ağır müharibə dövrünün çağırışları və bu reallıqların fonunda gənc telejurnalistlərin, o cümlədən Mirşahin bəyin üzərinə düşən böyük məsuliyyət, ən təhlükəli döyüş bölgələrində aparılan çəkilişlər, çoxsaylı müsahibələr və ondan da ağır şəraitdə intizarda olan xəbər izləyiciləri üçün hazırlanan sanballı materiallar müasir Azərbaycan telejurnalistikasının qızıl fondu sayılmalıdır.

Məlumdur ki, tələbkar Azərbaycan auditoriyasına düzgün və qərəzsiz süjetlər hazırlayıb onun maraqlarını lazımınca təmin etmək xüsusi ustalıq tələb edir. Yeri gəlmişkən, əvvəllər Azərbaycanda informasiya təminatının faiz göstəricisi kifayət qədər az olsa da, indi bu nicbət bəlkə də birə-beş artıb. Əslində telekanallar arasında rəqabət də artmaqdadır. Deməli, daha yüksək səriştə və peşəkarlıq telejurnalistikanın əsas göstəricisidir.

Qeyd edək ki, yaşadığımız dövrdə və mövcud coğrafi məkanda informasiya bazarına doğru-dürüst məlumatlar təqdim etmək və operativ olaraq teleistehlakçıya - izləyiciyə və ya dinləyiciyə çatdırmaq hər jurnalistin imkanları daxilində deyil. Müasir baxışları və onlardan doğan istəkləri razı salmaq, yeri gələndə, üstələmək qan-tər işidir. Bu mənada, vəzifəsinin öhdəsindən peşəkarlıqla gələ biləcək jurnalist və yazarlarımız, həmçinin müəllif verilişləri, təəssüf ki, azdır. Təbii ki, onların sırasında xüsusi dəyərləndirdiyimiz və seçdiyimiz, ürəyimizcə olan "Mir Şahinin vaxtı"dır. Hazırda bu verilişin baxış reytinqinə nəzər salsaq, izləyici sayının nə qədər yüksək olduğunu görərik. Bəs bu qədər auditoriya sevgisini qazanmaq nədən qaynaqlanır?

İlk növbədə, etiraf edilməlidir ki, veriliş müəllifinin nəzəri fikir və təcrübə zənginliyi bütün hallarda ona uğur gətirən əsas meyardır. Sözün çəkisini yaxşı bilən Mirşahin hər bir çıxışında onun nə vaxt və hansı məqamda işlədiləcəyinə ciddi diqqət yetirir. "Faktdan başqa fakt yoxdur, müxbir onun rəsuludur" - deyən Mirşahin jurnalistikada hər bir şeyin fakta söykəndiyini xüsusi vurğulayır.

"Mir Şahinin vaxtı"nın növbəti buraxışlarını izləyirik. Verilişə müasir tipli qatarda başlayan Mirşahin: "Bu saat təkcə qatarda deyilik, zamanın içindəyik, qatar isə rəmzdir" - deyərək Bakının 30 il əvvəlki yollarını, acınacaqlı infrastrukturtunu arxiv süjetləri ilə indiki gözəl yollarımızı və tıxaclarımızı bəzən bəyənməyən tamaşaçıya müqayisəli təqdimat verir. Ölkə başçısı cənab İlham Əliyevin son müşavirələrdəki çıxışlarından iqtibaslar, süjetlə mövsunu daha canlı edir. "O zaman oralardaydıq - bərbad şəhərdə, bəs bu gün haradayıq... Gəlin özümüzə kənardan kənara baxaq". Olduqca məntiqi və düşündürücüdür... Nə yaxşı ki, arxivlər qorunur, köhnə süjetlər mühafizə olunur. Bəli, o zaman hardaydıq, indi Azərbaycan haradadır...

Tarixə qovuşmuş "Əsrin müqaviləsi" və bu müqavilənin əhəmiyyəti, onun Azərbaycana gətirdiyi əsl müstəqillik... Və əlçatmaz zirvələr fəth etmiş Azərbaycanın bu günü! "Mir Şahinin vaxtı" bu müqayisəli çıxışları ilə unutduğumuz və unutmadıqlarımızı bütün məqamları bizə xatırladır.

Mirşahin müəllifi olduğu verilişə mövzu seçimini və hədəfləri öncədən, bütün kriteriyalara uyğun ustalıqla hazırlayır, süzgəcdən keçirir, güclü performans şəklində izləyicinin ixtiyarına təqdim edir.

"Real" Təhlil və İnformasiya Mərkəzinin fəaliyyətində dövlətçilik məsələləri xüsusi yer tutur. Ölkə başçısının fərman və sərəncamları, qəbul edilən dövlət əhəmiyyətli sənədlər, prezidentin jurnalistlərə verdiyi müsahibələr, müxtəlif xarici ölkə jurnalistlərinin suallarına cavablar və s. REAL TV və Mirşahinlə daha maraqlı, daha geniş analitik təhlilə məruz qalır. Bütün siyasi, iqtisadi və sosial xarakterli təhlillərdə jurnalistikanın yazılan və yazılmayan qanunlarına ciddi riayət edilir. "Mir Şahinin vaxtı" zamanın nəbzini tuta bilir. Bütün qısa informasiyalar yığcam olduğu qədər də genişdir, kifayət qədər əlçatandır. Verilən icmallar, şərhlər, təfərrüatlar televiziya tamaşaçılarını düşünməyə və aparılan müqayisə-analizlərə münasibətdə fəal olmağa, hadisələrə fərdi maraq göstərməyə vadar edir.

Daha son efirlərdən birini Şuşadan seyr edirik. 2025-ci ilin ölkə başçısı tərəfindən "Suverenlik və Konstitusiya ili" elan etməsi ilə bağlı buradan ötürülən mesajlar qürurvericidir. Şuşanın dağlarından Davosa, Alp dağlararına qayıdan aparıcı Davos iqtisadi forumunda müzakirə edilən məsələlərə baş vurur, cənab Prezidentin beynəlxalq forumdakı məhsuldar və işgüzar fəaliyyətinə toxunur. Müqayisələr davamlı aparılır və COP29-un Bakıda keçirilməsinin də böyük əhəmiyyəti yenidən gündəmə gətirilir. "Mirşahinin vaxtı" sərhəd bilmir - istər mövzu baxımından, istərsə də coğrafi baxımdan.

Düşünürəm ki, müasir Azərbaycan telejurnalistikası Mirşahinlə yeni tarixə çevriləcək və ya artıq çevrilib. Bir sıra yeni, daha maraqlı mövzu və layihələrə davamlı imza atlılır. Vaxt gələcək bu tarixin səhifələri nəzəriyyə kimi öyrəniləcək və telejurnalistikanın əsasları kimi araşdırılacaq.

Budur, yeni nəsil jurnalistlərimiz artıq yetişməkdədir.

Gənc, müstəqil dövlətimizin dayaqları təzə-təzə qurularkən, respublikamızın peşəkar jurnalist kadrlarına böyük ehtiyacı vardı. Açıq deyək ki, profesionallar az idi. O zaman Jurnalistika fakültəsinə qəbul da məhdud, üstəlik, bu fakültəyə qəbul qaydaları da fərqli idi.

Ulu öndər Heydər Əliyevin uzaqgörənliyi sayəsində Müstəqil Azərbaycanın güclü inkişafı bütün sahələrin, o cümlədən peşəyönümlü ixtisasların artmasına və genişlənməsinə, əlçatanlığına şərait yaratdi. Az bir vaxt ərzində yetişən istedadlı jurnalistlərimiz milli mətbuatımıza yeni nəfəs gətirdi. Məhz həmin, bildiyimiz keçid dövrü olduqca çətin və keşməkeşli oldu. Bu dövrdə yetişən Mirşahinin taleyinə düşən çətin telekanal fəaliyyəti, ağır senzura və qadağalar şəraitində böyük jurnalistikaya baş vurmaq missiyası yeni tarixin - müasir telejurnalistikamızın başlanğıcını qoydu. O dövrdə qədim Gəncədə, region qəzetində çalışsam da, həmin tarixi məqamlar jurnalist dəftərçəmdə əbədi yer qazandı.

Bax, beləcə, jurnalist məsuliyyəti, mobillik, yüksək erudisiya, operativlik və qorxmazlıq, əlavə olaraq, jurnalist sözünün kəsəri bu sənətə aparan yola gur işıq saçdı və istedadlı həmkarımız Mirşahinin yaradıcılığı yeni tarix yazdı - sabaha aparan yolun bünövrəsinə öz sanballı töhfələrini vermiş ən yeni tarix.

Yolunuz açıq olsun, Mirşahin bəy, vaxtınız daim zamanla ayaqlaşsın!..

Maarif RZAYEV

Azərbaycan Dövlət Aqrar Universiteti "Aqrar mütəxəssis" qəzetinin baş redaktoru, Bakı Dövlət Universiteti Jurnalistika fakültəsinin məzunu

525-ci qəzet .- 2025.- 11 fevral(№25).- S.10.