Oyun İnklüziv Teatrı daha bir uğurlu layihə təqdim edib

Azərbaycan Dövlət Kukla Teatrında daha bir vacib sosial-mədəni aksiya keçirilib. "OYUN" İnklüziv Teatrının təqdimatında “Parkda” tamaşasısnın premyerası olub. Milli Məclisin Mədəniyyət Komitəsinin sədr müavini Günay Əfəndiyeva, eləcə də mədəniyyət və incəsənət xadimlərinin, media nümayəndələrinin, ictimai sferada tanınan simaların izlədiyi tamaşa maraqla qarşılanıb.

Məlumat üçün deyək ki, cəmiyyətdəki sosial-mənəvi problemlər fonunda müxtəlif qadın qəhrəmanlarını ön plana çıxaran tamaşa real qəhrəmanların həyat hekayələrinin səhnələşdirilmiş yozumudur. Tamaşada müxtəlif dövlət teatrlarında çalışan peşəkar aktyorlarla yanaşı əlilliyi olan həvəskarlar da rol alıblar.

Bu mənada səhnə aktının əsas məqsədi əlilliyi olan şəxslərin tanınmış aktyorlarla bir layihədə iştirakına şərait yaratmaq və bu yolla onların cəmiyyətə inteqrasiyasına nail olmaqdır.

Tamaşanın ideya və quruluş müəllifi Saida Hagverdiyeva, quruluşu rəssamı İqbal Əliyevdir.

Tamaşada rolları Zülfiyyə Qurbanova (Aynur), Zümrüd Qasımova (Dilarə), Ülviyyə Əliyeva (Sərgül), Türkay Cəfərli (Murad), Gülçöhrə Abdullayeva (Bibixanım), Səbinə Məmmədova (Ofsiant), eləcə də Xaqani Əliyev, Kamilə Xəlilova, Babək İsmayılov, Xumar Haqverdiyeva, Aylin Nəcəfli, İbrahim Laçın, Hökumə Ağayeva, İlkin Həsənli ifa ediblər.

Tragikomik səhnələrin üstünlük təşkil etdiyi birhissəli tamaşada ailədə şiddət, xəyanət, eləcə də erkən nikah, məişət zorakılığı, həmçinin sosial şəbəklərin insan münasibətlərinə mənfi təsiri kimi məqamlar ön plana çıxarılıb.

Xatırladaq ki, "OYUN" İnklüziv Teatrı 2019-ci ildən fəaliyyət göstərir və burada 30-a yaxın həvəskar aktyora müxtəlif istiqamətlərdə səhnə dərsləri, incəsənətin fərqli yönlərində təlimlər keçilir. Beləcə art-terapiya xarakterli proses sonda tamaşa ilə yekunlaşır. Repertuarında hələ ki, 2 tamaşa olan teatr layihəsinin üçüncü səhnə aktı üzərində iş gedir və yeni tamaşa martın sonunadək teatrsevərlərin ixtiyarına veriləcək.

525-ci qəzet .-2025.- 12 fevral(№26).- S.9.