İlahi, sən göstər ədalətini

 

İlahi, sən göstər ədalətini,

Haqsızlar haqlını əzib keçməsin!

Toz qondurmayanlar öz xislətinə

Qoy başqa gözlərdə bir tük seçməsin.

 

Bu haqsız dünyada, İlahi, imdad,

Ağlım qəbul etmir gördüklərimi.

Rəhm eylə, dünyanı yenidən yarat,

Haqqı-ədaləti göydən pay kimi

Bütün ürəklərə tən-bərabər at.

 

Yaman ağır gəlir yaşanan hisslər,

Vicdanım, səbrim də mənə dərd olub.

"Sevimli bəndələr sınağa dözər" -

Deyərək çəkdiyin sınaq sərt olub.

 

"Dayan, möhkəm dayan, sevimli bəndəm,

Elə çətin deyil, çox ağır deyil,

Sənə dözəcəyin dərdlər verirəm" -

Uca kitabın da bunları deyir!

 

Yalvarıram sənə, daha gücüm yox,

Çoxdan nə yatmışam, nə dincəlmişəm.

Ruhum da, qəlbim də çox yorulub, çox,

İndi and içirəm pak varlığına,

Bu ağrı-acılar, kədər əlindən

Səbrim sona yetib, təngəgəlmişəm!

 

lll

 

Səkkiz mart yaxındadır,

Baş qaldırır o yanğılar.

Var gücüylə məni sarır,

Boğur nisgilli duyğular.

 

İllər öncə yaşadığım

Xoş günləri çox anıram,

Yenə közərir yaddaşım,

Ana, sənsiz hey yanıram.

 

Kaş gələydi ildə bir yol,

Ruhun mənə sarılaydı,

Dərdlərimə çarə qılıb,

Qəlbimə məlhəm olaydı.

 

Bir an yuxuma gələndə,

Oluram dünya xoşbəxti,

Deyirəm, anam ölməyib,

Kövrəlirəm uşaq təki.

 

Gözlərimi açan andan,

Əzablarım yenə başlar,

Ümidlərim puça çıxar,

Gözlərimə dolar yaşlar.

 

Acı nisgil mənə gülər:

"Anla artıq, anan yoxdur!" -

Nidasıyla dilə gələr,

Qəlb evimi nişan alar.

 

Nəzakət ƏHMƏDLİ

525-ci qəzet .- 2025- 13 fevral(№27).- S.15.