"Sevgi haqqında": Maqsud İbrahimbəyov Yaradıcılıq Mərkəzində poetik tamaşa

Maqsud İbrahimbəyov Yaradıcılıq Mərkəzində Leyla xanım Əliyevanın şeirləri əsasında hazırlanmış “Sevgi haqqında” adlı kiçik ədəbi-poetik tamaşanın premyerası olub.

Fevralın 13-də nümayiş olunan tamaşanın rejissoru Raulya Türkkan, xoreoqrafı isə Əməkdar artist Nigar Rzayevadır.

Səhnə işində Azərbaycanın Əməkdar artistləri Milana Sokolenko və İnna İmranova da daxil olmaqla, Azərbaycan Dövlət Akademik Rus Dram Teatrının aktyorları, həmçinin onların həmkarları Ruslana Pavlova, Aydan Axundzadə və Aylin Türkkan iştirak ediblər.

Gecənin rəsmi hissəsini mərkəzin direktoru Anna İbrahimbəyova açıb. O, çıxışında gecənin əhəmiyyətini vurğulayaraq Azərbaycan Respublikasının Prezidenti İlham Əliyevin Maqsud İbrahimbəyovun 90 illik yubileyinin qeyd edilməsi ilə bağlı bu gün sərəncam imzaladığını xatırladıb.

Sonra tamaşa nümayiş olunub.

Səhnə əsərini Prezident Administrasiyası Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, mədəniyyət naziri Adil Kərimli, Diasporla İş üzrə Dövlət Komitəsinin sədri Fuad Muradov, Milli Məclisin deputatı Hicran Hüseynova, Əməkdar incəsənət xadimi Cahangir Səlimxanov, Əməkdar artist Oleq Əmirbəyov və tanınmış mədəniyyət xadimləri izləyiblər.

525-ci qəzet .- 2025.- 15 fevral(№29).- S.14.