Bizim fizika müəllimimiz

Sevimli müəllimim Akif Quliyevin xatirəsinə

Dərsindən aldığım "əla" qiymət sonra ali məktəbə qəbul imtahanı zamanı yüksək qiymətləndirildi.

Dostcanlı, təəssübkeş olduğunun fərqindəydim. Fərqli, həm də fərdi yaradıcılığıma xüsusi diqqət göstərirdi. Bütün şagirdlərinin dostu idi.

Çox qəribə siqaret çəkməyi vardı, siqaret kötüyünün əzintisindən nələr çəkdiyini bilmək olurdu. Ətrafında baş verən haqsızlıqları sanki siqaret tüstüsündə boğmaq istəyirdi.

Dürüst adamıydı. Sözünün sahibi idi. Dürüstlüyünü yalan, şişirdilmiş rəqəmlərə qurban vermədi. İşdəki eybəcərlikləri, tənələri, rüşvətlə iş görənləri, şişirdilmiş rəqəmlərdən istifadə etməklə plan və tapşırıqları yerinə yetirənləri görmək və susmaq onun üçün çətin idi.

O, müəllim idi. Allahı yadından çıxarmamışdı. Təbii ki, vəzifəyə gəlmək təkcə savadın və istedadın gücünə deyildi. Sovet rejiminin yazılmamış qanunlarından biri də bu idi. Çox az istisnalar vardı ki, o, bu az istisna səbəbindən bir neçə dəfə təyin olunduğu vəzifədən istefa vermişdi.

Rayon səviyyəsində aqrar sahədə də çalışdı. Təsərrüfat rəhbəri kimi bu sahədə təcrübəsi olmasa da, müşahidələri vardı. Aqrar sahədə iş kifayət qədər ağır olur. Səhərlər hamıdan əvvəl işə gəlmək, heyvandarlıq sahələrinin işlərini müşahidə etmək, bitkiçilik sahəsində - tarlalarda, üzüm plantasiyalarında, taxıl zəmilərində görülən aqrotexniki işlərə qədər nəzarət etmək. Təşkilatı işlər, rayonun ümumi işlərində və digər məsələlər də daxil olmaqla yerinə yetiriləcək tapşırıqlar kifayət qədər dözüm və enerji tələb edirdi. O bu işin öhdəsindən də layiqincə gəldi.

...Amma ağzını aran yoluna açıb danışanlar da vardı.

İstefa mədəniyyəti onun son ürəkliliyi idi. Sovetlər vaxtı da, sonrakı dönəmdə də öz vəzifəsindən - işindən istefa vermişdi. Vəzifədən getməyinə çoxları heyifsilənirdi, özündən başqa. Hamı təəccüblənir, özündən başqa. Sağdan, soldan tərif edənlər və üzünə gülənlərin gözündə qəribə bir təəssüf görürsən.

...Ölümün çarəsi yoxdur, Allahım. Sevgili ölümlərin biri də baş verdi. Müəllimlərimdən daha biri bu dünyaya vida etdi. O, bütün enerjisi ilə müəllim idi. Çox sevdiyim, bizim fizika müəllimi - Akif Quliyev.

Amma əminəm, onun xatirəsi şagirdlərinin qəlbində uzun müddət yaşayacaq.

Xosrov NATİL

525-ci qəzet .- 2025.- 19 fevral(№31).- S.16.