Kukla teatrı janrında klip - "Sıradan Adam"

Tanınmış reper, yazıçı Qaraqan fərqli və düşündürücü bir layihə - "Sıradan Adam" adlı yeni mahnısıyla gündəmə gəlib. Mahnının vizual həlli çox maraqlıdır.

Bu, Azərbaycanda ilk dəfə kukla teatrı janrında hazırlanan klipdir. Hadisələrin mərkəzində müəllifin Sıradan Adam adlandırdığı bir obraz dayanır. O, fərqli düşünsə də, kasıbdır, uğursuzdur. Divarda Nizami Gəncəvinin rəsminin asılması onun mədəni bir insan olduğuna işarə edir.

Süjetin başqa bir maraqlı detalı masanın üzərindəki qəzetdir. Qəzetdə plastik əməliyyatlar vasitəsilə insanların getdikcə bir-birinə daha çox bənzədiyi vurğulanır. Bu isə Sıradan Adamın kütlə içində tək qaldığını və onların bayağı dünyasına uyğunlaşmaq istəmədiyini göstərir. Cəmiyyət tərəfindən qəbul edilmədiyi üçün təkliyə məhkum olan bu insan sonda əlində "2+2=5" yazısı ilə şəhərin mərkəzinə çıxır.

Bu simvolik səhnə Sıradan Adamın ətrafındakı yalanları qəbul etdiyini və onlarla barışdığını göstərir. Belə olduqda, üzsüz, formasız, bir-birinə bənzəyən skelet insanlar ona yaxınlaşır və xorun müşayiəti ilə mahnı oxumağa başlayırlar.

Klipin ikinci hissəsində Sıradan Adamın içində üsyan qopur. O, həqiqi fikirləri ilə insanlara müraciət etməyə çalışır. Lakin bu fərqliliyi insanlar qəbul etmir və onu barmaqla göstərməyə, daş atmağa başlayırlar. Nəticədə, o, cəmiyyətdən kənarlaşdırılıb ruhi xəstəxanaya salınır.

Mahnının əsas mesajı budur ki, fərqli düşünən, mədəni insanı bayağı kütlə qəbul etmir. Belə insanlar bütün zamanlarda və bütün məkanlarda sıxışdırılıb uzaqlaşdırılırlar. Kütlə onları "dəli" adlandırır, öz içində əridib yox edir. Cəmiyyətin inkişafı üçünsə məhz belə adamların, fərqli düşünənlərin, dünyanı ağ-qara deyil, alabəzək, rəngli görənlərin olması nəinki lazımdır, hətta vacibdir.

Qeyd edək ki, Qaraqan hər zaman düşündürücü və cəmiyyətə mesaj verən işləri ilə fərqlənib. O, öz yaradıcılığı ilə sosial problemləri qabardır və fərqli yanaşmalar sərgiləyir. Buna qədər Qaraqan və Yaradıcı Birlik komandası Azərbaycanda ilk süni intellektlə çəkilmiş klipi və ilk animasiya komiksi kimi vizual yeniliklərə imza atmışdır. Hazırda isə Qaraqan (https://search.app/KWaeZUjgaG4k2twg7) ABŞ-da olmasına baxmayaraq, Azərbaycanda "Mədrəsə" (https://search.app/k659ruv8BNBwxDqH9) adlı sənədli filmi təqdim etməklə fəlsəfi mühazirə dərsləri təşkil edir.

525-ci qəzet .- 2025.- 19 fevral(№31).- S.9.