“Məni unudublar, sanki heç yox imişəm!”

XALQ ARTİSTİ FATMA MAHMUDOVA: “ÖLÜMÜMDƏN SONRA VERİLƏCƏK QİYMƏT NƏYİMƏ LAZIMDIR?

Tanınmış aktrisa, Xalq artisti Fatma Mahmudova yanvarın 29-da insult keçirib və xəstəxanaya yerləşdirilib. Ötən il də insult keçirən və uzunmüddətli müalicələrdən sonra səhhəti yaxşılaşan aktrisa hazırda müalicəsini evində davam etdirir. Onu əsas narahat edən isə ömrünü həsr etdiyi incəsənət mühitindən gördüyü laqeydlikdir. “525-ci qəzet”ə açıqlama verən aktrisanın vəziyyətinin heç də yaxşı olmadığı, çətinliklə danışdığı, eləcə də küskünlüyü hiss olunurdu:

“Özəl xəstəxanada qalmağa maddi gücüm yoxdur. Ona görə də evə çıxmalı oldum. Elə indi də mənə sistem köçürülür. Tibb bacısı yanımdadır, gecə-gündüz qayğıma qalır, iynə-dərmanımı edir. Ayaqlarım işləmir, yataq şəraitində qalmışam. Bu müddət ərzində Musiqili Teatrın direktoru Əliqismət Lalayevi mən yenidən kəşf etdim. O, çox mərd, qayğıkeş, sənətə, sənətkara qiymət verən insan imiş. Mən insult keçirəndə xəbər tutub məndən öncə çatmışdı xəstəxanaya. O gündən bəri həmişə həm maddi, həm də mənəvi dəstəyini əsirgəmir. Mənə dayaq olur, yenidən səhnəyə qayıtmağım üçün ruhlandırır. Ona ömrümün sonuna kimi minnətdaram. Nə yaxşı ki, bizim belə direktorumuz var. Kaş, Əliqismət müəllim kimi insanlar çox olaydı. Amma təəssüf ki, çox deyil. Aparıcı Lalə Azərtaş, aktyor Elməddin Cəfərovdan, sənət dostlarımdan da çox razıyam, axtarırlar, maraqlanırlar”.

Hazırda müalicəsini ancaq öz maaşı və çalışdığı teatrın sayəsində çətinliklə qarşıladığını deyən sənətkar Mədəniyyət Nazirliyindən, Heydər Əliyev Fondundan kömək istəyir: “Mən ömrümün 57 ilini bu sənətə həsr etmişəm. Cəbhə bölgələrində sənətimlə xidmət etmişəm, bir əsgər kimi mədəniyyətimizin keşiyində dayanmışam. Amma indi layiq olduğum dəyəri, diqqəti görmürəm. Məni unudublar, sanki heç yox imişəm! Dünən səhnəyə çıxanlara elə diqqət, qayğı göstərilir ki, adam bilmir nə desin. Nə Mədəniyyət Nazirliyi, nə də digər qurumlar mənimlə maraqlanır.

Dəyərimi vermək, diqqət göstərmək üçün ölməyimi gözləyirlər? Ölümümdən sonra veriləcək qiymət mənim nəyimə lazımdır? Bilmirəm, bəlkə də xəbərləri yoxdur. Nə yoldaşım var, nə də oğlum. Kimim var ki, kim də xəbər versin? Yəqin xəbərləri olsa, belə laqeyd münasibət göstərməzlər. Sizin vasitənizlə səsimi eşitsinlər, heç olmasa”.

Şahanə MÜŞFİQ

525-ci qəzet.- 2025.- 20 fevral(№32).- S.11.