"Şərq qapısı": məktəb missiyalı qəzet

Azərbaycan Milli Mətbuatı-150

"Şərq qapısı" qəzeti canlı tarixdir. Özündə keçmişi, bu günü və gələcəyi birləşdirən tarix. İki əsrə və iki ictimai quruluşa təsadüf edən bu qəzet həyata vəsiqə aldığı gündən ictimai maraqlara xidmət etməkdədir. "Şərq qapısı" sağlam əqidəsi olan qəzetdir. İstər sovet totalitar rejiminin ağır cəngəsində inləyən zamanlarda, istərsə Azərbaycanın müstəqillik illərində əqidə saflığı və dəyişməz mövqeyi onun tarixin çətin sınaqlarına duruş gətirməsinə səbəb olub. Xalqa xidmət, ictimai maraqlara xidmət, dövlətə xidmət qəzetin preambulasıdır.

"Şərq qapısı" qəzeti ədəbiyyat məktəbidir. Hər nömrəsində ədəbiyyat ilə publisistikanın çulğalaşdığı klassik və novator ənənələrin sintezindən yoğrulan ədəbiyyat məktəbi. Ədəbi sözün qüdrətinə, ədəbi fikrin inkişafına maraqlı olan qəzet həm də ədəbiyyat dərsliyi, ədəbi mühitin əvəzedilməz fondudur. Bu fondda yüzlərlə şairin ədəbi irsi, külliyyatı toplanmaqdadır.

"Şərq qapısı" qəzeti jurnalistika məktəbidir. Yaradıldığı gündən fəhlə, kəndli müxbirlərə, daha sonra yazmaq bacarığı olan hər kəsə açıq olan bu qəzet peşəkar jurnalistikanın yaranması və inkişafına da əvəzsiz töhfələr bəxş etməkdədir. Mətbu orqanın qəzetçilik sahəsindəki fəaliyyətini qiymətləndirən akademik İsa Həbibbəyli yazır: "Şərq qapısı" ciddi qəzetçilik, yetkin jurnalistika məktəbidir".

Öz fəaliyyətinə hər zaman tənqidi yanaşan qəzet, həm də nöqsanları islah etməklə gələcək fəaliyyətinin əsasını qoymuş, zamanla büdrəsə də, yenə davamlı olmağa qətiyyətli olmuşdur. Hətta son zamanlarda "Şərq qapısı" qəzeti üçün keçirilən obyektiv monitorinqlər dediklərimizi bir daha təsdiqləmiş olur: "Şərq qapısı" yarandığı ilk çağlardan bu günə kimi Azərbaycanın böyük bir bölgəsinin - Naxçıvanın oxucu auditoriyasının informasiya tələblərinə xidmət etmiş və tələbləri ləyaqətlə yerinə yetirmişdir. Sovet dönəmində ağır senzura şəraitində fəaliyyət göstərsə də, xalqın maariflənməsinə, cəmiyyətin mümkün qədər obyektiv informasiya ilə təmin olunmasına çalışmışdır. Bu qəzetin uzun illər boyu formalaşmış informasiya siyasəti vardır".

"Şərq qapısı" qəzeti siyasət məktəbidir. Dövlətçilik kursuna sadiq qalan bu məktəb siyasi arenada kəskin siyasi qələmi, dəyişməz mövqeyi, vahid əqidəsi ilə fərqlənir. Müasir mərhələdə Ulu öndər Heydər Əliyevin siyasi kursunu dəstəkləyən qəzet Azərbaycan mətbuatında qərəzsiz siyasi münasibəti əks etdirən məqalələri, tarixi əhəmiyyəti ilə fərqlənir. Belə ki, Azərbaycan sovet mətbuatının əsasının qoyan bu qəzet həm də, keçmiş Sovetlər birliyində ilk müstəqil qəzetin də əsasını qoymaq məsuliyyətini çiyinlərinə götürüb. "Şərq qapısı" qəzeti teatrşünaslıq məktəbidir. XX əsrin əvvəllərindən bugünədək Naxçıvan teatrının ən diqqətli tamaşaçısı "Şərq qapısı" qəzetidir. Teatr resenziyaları ilə zəngin olan bu qəzet Qurban Qurbanov, Hüseyn İbrahimov, Kəmalə Ağayeva, Elman Həbib kimi dramaturqları aşkarlayıb üzə çıxarmaqla yanaşı, həm də Cəlil Vəzirov kimi teatrşünas alimi yetişdirib, öz səhifələrində teatr sənətinə, aktyor ömrünə və fəaliyyətinə müntəzəm yer ayırıb.

"Şərq qapısı" qəzeti fotoqraflıq məktəbidir. İnformasiyaların əyani təsəvvürünü verən, onu daha oxunaqlı, daha görünüşlü edən foto sənəti də "Şərq qapısı" səhifələrində inkişaf edib, burada çoxsaylı fotqraflar nəsli formalaşıb. Keçən əsrin əvvəllərində texniki səbəblər üzündən basılması çox çətin olan fotolar belə "Şərq qapısı" səhifələrində özünə yer ala bilib, müasir texnologiyaların inkişafı şəraitində daha keyfiyyətlli əyani təzahürlərlə özünü doğruldub.

"Şərq qapısı" həm də idman məktəbidir. Respublikanın idman həyatından yeniliklər iki əsrdir ki, qəzet səhifələrinin aparıcı mövzusudur. İnsanları sağlam həyat tərzinə uyğunlaşdıran bu qəzet idman həyatının yazılı tarixidir. İdmanın bütün sahələri əhatə olunan qəzetdə yeniliklərlə yanaşı, neçə-neçə idmançı həyatının açılmamış səhifələri əks olunub.

"Şərq qapısı" qəzeti tibb məktəbidir. Faydalı məsləhətləri ilə maraq doğuran "Həkim məsləhəti" guşəsi, bioloqların sağlam həyat tərzi keçirməklə bağlı tövsiyələri, dərman bitkilərinin xarakter xüsusiyyətləri "Şərq qapısı"nın davamlı mövzuları sırasındadır.

Ən nəhayət, akademik İsa Həbibbəylinin təbirincə desək, "Şərq qapısı" sözün böyük mənasında məktəbdir. Ədəbiyyat, jurnalistika, elm bu məktəbin fakültələr və ixtisaslar kimi istiqamətləridir".

Surə SEYİD

Filologiya üzrə fəlsəfə doktoru, dosent

525-ci qəzet .- 2025.- 11 iyun(№ 99).- S.10.