. Tələbəni diqqət mərkəzində saxlayan platforma

İNNOVATİV GƏNCLƏR TƏŞKİLATI UNEC-in AKTİV VƏ STRATEJİ TƏLƏBƏ PLATFORMASINA ÇEVRİLİB

Azərbaycan Dövlət İqtisad Universiteti (UNEC) 95 illik inkişaf yolunda hər zaman tələbəni mərkəzdə tutan bir yanaşma sərgiləyib. Bu gün universitetdə fəaliyyət göstərən tələbə təşkilatları, tələbələrin öz təşəbbüsləri əsasında yaranaraq universitet həyatının ayrılmaz hissəsinə çevrilib. Universitet rəhbərliyi bu təşəbbüslərə daim açıq yanaşır, onların inkişafına dəstək verir və tələbələrin ictimai fəallığını təşviq edir.

İnnovativ Gənclər Təşkilatının sədri, UNEC Dizayn Məktəbinin 4-cü kurs tələbəsi Samir İsmayılzadənin sözlərinə görə, UNEC-də 16 tələbə təşkilatı fəaliyyət göstərir və bu struktur tələbələrin sosial fəallığını, yaradıcı potensialını və liderlik bacarıqlarını ortaya çıxarmağa xidmət edir. Bu tələbə platformaları arasında yeni nəsil düşüncəyə, texnologiyaya və innovasiyaya fokuslanan təşəbbüslər də yer alır. UNEC-in strateji baxışını əks etdirən bu təşəbbüslər gənclərin gələcəkdə rəqabətədavamlı mütəxəssislər kimi yetişməsində əhəmiyyətli rol oynayır. Hər bir təşkilat öz fəaliyyət istiqamətinə uyğun olaraq universitetin ictimai-mədəni həyatında mühüm rol oynayır, tələbələrin maraq və bacarıqlarına uyğun mühit formalaşdırır. Məhz belə təşəbbüslərdən biri də UNEC tələbələrinin texnologiya, rəqəmsal bacarıqlar və innovativ düşüncə sahəsində inkişafını hədəfləyən İnnovativ Gənclər Təşkilatıdır. 2024-cü ildə yaradılmış bu təşkilat UNEC-in aktiv və strateji tələbə platformalarından birinə çevrilib. Təşkilatın əsas məqsədi gəncləri innovasiya və texnologiya sahələrində maarifləndirmək, onların bilik və bacarıqlarını praktiki müstəvidə inkişaf etdirmək, yerli və beynəlxalq əməkdaşlıqlarla tələbələri real sektorla əlaqələndirməkdir: "Qısa müddət ərzində təşkilat tərəfindən bir sıra mühüm layihələr həyata keçirilib. İnnovasiya həftəsi çərçivəsində baş tutan silsilə tədbirlər - təlimlər, seminarlar və panellər UNEC tələbələrini innovasiya və startap ekosistemi kimi aktual mövzularla tanış edib. Həftə boyunca yerli mütəxəssislərin iştirakı ilə keçirilən sessiyalar tələbələrə həm nəzəri, həm də praktik biliklər qazandırıb. Eyni zamanda, təşkilat tərəfindən startap yönümlü hakatonlar və texnoloji yarışmalar təşkil olunaraq tələbələrin real problemlərə innovativ yanaşmalar axtarması təşviq edilib. UNEC-də tələbələrin fərdi inkişafı istiqamətində atılan mühüm addımlardan biri də universitetin 95 illik yubileyinə həsr edilmiş TEDxUNEC tədbiri olub. Bu tədbir İnnovativ Gənclər Təşkilatının təşəbbüsü və universitetin dəstəyi ilə həyata keçirilib. Tədbir çərçivəsində tanınmış ekspertlər öz təcrübələrini tələbələrlə bölüşərək onlara həm motivasiya veriblər, həm də təcrübə qazandırıblar. İnnovativ Gənclər Təşkilatı beynəlxalq əməkdaşlığa da xüsusi önəm verir. Xarici innovativ şirkətlərlə qurulan tərəfdaşlıqlar, birgə təlimlər və layihələr vasitəsilə tələbələr qlobal təcrübələrə çıxış imkanı əldə edirlər. Bu təşəbbüslər UNEC tələbələrinin qlobal əmək bazarına inteqrasiyasına və rəqabətə davamlı mütəxəssislər kimi formalaşmasına xidmət edir. UNEC öz tələbələrinə təkcə bilik deyil, həm də universitetin intellektual və sosial həyatını formalaşdıran əsas qüvvə kimi yüksək dəyər verir. UNEC-in tələbəyönümlü təhsil modeli müasir texnologiyaların və rəqəmsal həllərin tədris prosesinə inteqrasiyası ilə daha da güclənir".

O bildirib ki, universitetdə dərs proseslərinin rəqəmsallaşdırılması istiqamətində mühüm addımlar atılıb. Elektron tədris platformaları vasitəsilə dərslərə onlayn qoşulmaq, dərs materiallarına asan çıxış imkanı əldə etmək və öyrənmə prosesini fərdiləşdirmək mümkündür. Eyni zamanda, imtahanların yazılı elektron formatda təşkili şəffaflığın və obyektivliyin təmin olunmasına xidmət edir. Bu sistem tələbələrin bilik və bacarıqlarını daha effektiv və strukturlaşdırılmış şəkildə qiymətləndirməyə imkan verir: "Tədrisin yalnız akademik biliklərlə məhdudlaşmaması da UNEC-in fərqləndirici xüsusiyyətlərindəndir. Universitet tələbələrinin gələcək peşə fəaliyyətinə daha hazırlıqlı olması üçün onların ünsiyyət, komandada işləmək, liderlik, zamanın idarə olunması və problem həll etmə kimi qabiliyyətlərinin inkişafına xüsusi önəm verir. Bu məqsədlə UNEC-də mütəmadi olaraq "Soft Skills" dərsləri və təlimləri təşkil olunur. Bu dərslər tələbələrin şəxsi və peşəkar inkişafına töhfə verərək onları əmək bazarının dəyişən tələblərinə uyğun şəkildə hazırlayır. Bu yanaşmalar UNEC-də təhsil alan tələbələrin yalnız nəzəri biliklərlə deyil, eyni zamanda, praktiki, texnoloji və sosial bacarıqlarla silahlanmasını təmin edir. Beləliklə, universitet məzunları rəqabətədavamlı, çevik düşüncəli və çevik fəaliyyət göstərən mütəxəssislər kimi formalaşır. UNEC 95 illik fəaliyyəti ərzində formalaşmış təcrübəsi, tələbəyönümlü yanaşması və inkişaf edən akademik mühiti ilə ölkənin ali təhsil sistemində mühüm yer tutur. Universitetin tələbə təşəbbüslərinə verdiyi dəstək, gənclərin sosial və intellektual inkişafına yönəlmiş fəaliyyətləri UNEC-in təhsil strategiyasının ayrılmaz hissəsidir. Bu yanaşma tələbələrin biliklə yanaşı, praktiki bacarıqlara yiyələnməsinə, müasir əmək bazarının tələblərinə uyğun formalaşmasına və gələcək karyeralarına daha inamla hazırlaşmasına şərait yaradır".

UNEC-in tələbə-rektoru, İqtisadiyyat və idarəetmə fakültəsinin IV kurs tələbəsi Nihad İsgəndərovun dediyinə görə, Azərbaycan Dövlət İqtisad Universiteti bu gün yalnız ali təhsil müəssisəsi deyil, həm də gənclərin gələcəyini formalaşdıran, onların liderlik keyfiyyətlərini önə çıxaran, sosial məsuliyyət hissini gücləndirən, müasir dünyada rəqabətədavamlı fərdlər yetişdirən bir inkişaf modelidir. 1930-cu ildən bəri fəaliyyət göstərən UNEC öz şərəfli tarixi boyunca minlərlə iqtisadçı, idarəçi, dövlət xadimi və alim yetişdirib. Bu gün də həmin missiya ilə davam edərək, təkcə bilik deyil, həm də dəyər yaradır: "Müasir dövrdə universitetlərin rolu yalnız akademik bilik verməklə bitmir. Universitet həm də gəncin xarakterinin, dünyagörüşünün və ictimai məsuliyyət hissinin formalaşdığı mühüm bir mərhələdir. UNEC bu funksiyanı uğurla yerinə yetirən universitetlər sırasında qabaqcıl mövqedədir. Burada tələbələr auditoriyalarda öyrəndikləri nəzəri biliklərlə yanaşı, praktiki bacarıqlara yiyələnir, ictimai fəaliyyətlərlə məşğul olur, layihələr yaradır, bir sözlə, şəxsiyyət kimi formalaşırlar".

O qeyd edib ki, UNEC-in ali təhsildə tətbiq etdiyi unikal modellərdən biri də tələbə-rektor institutudur. Ölkədə ilk dəfə UNEC-də yaradılan bu sistem tələbələrə yalnız səs haqqı deyil, eyni zamanda, universitetin real idarəetməsində iştirak etmək imkanı yaradır. Mənim də hazırda bu vəzifəni icra etməyim, sadəcə simvolik bir mövqe deyil - bu, tələbələrin sözünün eşidildiyi, fikir və təşəbbüslərinin reallaşdığı canlı təcrübədir: "Tələbə-rektor kimi fəaliyyətim dövründə qarşıma qoyduğum əsas məqsəd gənclərin universitet həyatına daha çox inteqrasiya olunması, sosial aktivliyin artırılması, tələbə ideyalarının dəstəklənməsi və universitetlə tələbə arasında körpü funksiyasının gücləndirilməsi olub. Bu institut tələbəyə məsuliyyət daşımaq, komanda ilə işləmək, qərar vermək və liderlik etmək kimi vacib həyat bacarıqlarını qazandırır".

Onun sözlərinə görə, UNEC-də könüllülük, sadəcə, bir fəaliyyət sahəsi deyil, tələbələrin daxili dünyasını formalaşdıran, empatiya və sosial məsuliyyət hissini artıran bir dəyərdir. Mənim təşəbbüsümlə həyata keçirilmiş "Könüllülük Həftəsi" - Beynəlxalq Könüllülər Gününə həsr olunmuş xüsusi layihə - bu baxımdan mühüm əhəmiyyət kəsb edir.

Könüllülük Həftəsi çərçivəsində təşkil etdiyimiz seminarlar, təlimlər, sosial aksiyalar UNEC tələbələrinin həm şəxsiyyət kimi inkişafına, həm də ictimai fəaliyyətlərdə fəal iştirakına yol açıb. Uşaq evlərinə getmək, ətraf mühitin qorunması ilə bağlı aksiyalar, qanvermə kampaniyaları tələbələrə həm faydalı olmaq, həm də liderlik bacarığını gerçək şəraitdə sınamaq imkanı verdi: "Könüllülük gənclərdə yalnız yardım etmə hissini deyil, həm də çevik düşüncə, təşəbbüskarlıq və komanda ruhunu formalaşdırır. UNEC bu dəyərləri bir sistem halına salaraq gənclərə yalnız sabahın mütəxəssisi kimi deyil, cəmiyyətin fəal üzvü kimi yanaşır. Ötən həftə təşkil etdiyimiz "BİRİM2025" tələbə forumu UNEC tələbələrinin intellektual və təşəbbüskar potensialını üzə çıxaran uğurlu bir layihə oldu. Bu forumun əsas məqsədi tələbələrə strateji düşünmə bacarığı aşılamaq, onları ölkənin gələcəyi ilə bağlı düşünməyə və fikir bildirməyə təşviq etmək idi. Forum çərçivəsində keçirilən panel müzakirələrdə süni intellekt, rəqəmsal iqtisadiyyat, innovasiya, marketinq və biznes strategiyaları mövzularında fikir mübadiləsi aparıldı. Burada tələbələr öz ideyalarını təqdim etməklə yanaşı, müxtəlif sahələrin peşəkarları ilə birbaşa əlaqə yaratmaq imkanı qazandılar. BİRİM2025 forumunun ən önəmli cəhətlərindən biri də tam şəkildə tələbələrin təşəbbüsü və rəhbərliyi ilə həyata keçirilməsi idi - bu, onların real liderlik bacarıqlarını praktikada tətbiq etməsi üçün mühüm bir platformaya çevrildi".

Nihad İsgəndərov bildirib ki, 2025-ci il UNEC-in 95 illik yubileyi ilə yadda qalır. Bu tarix yalnız bir rəqəm deyil, UNEC-in elm, təhsil və cəmiyyət qarşısındakı xidmətlərinin simvoludur. Bu münasibətlə keçirilən tədbirlər silsiləsi - elmi konfranslar, sərgilər, məzunlarla görüşlər, tələbə forumları universitetin tarixini, bugünkü uğurlarını və gələcək strategiyalarını əks etdirən zəngin proqramlarla müşayiət olunur: "Bu yubiley UNEC tələbələri üçün də xüsusi əhəmiyyət daşıyır. Biz bu mərhələdə sadəcə təhsil alan tələbələr deyil, eyni zamanda, 95 illik tarixin bir parçası olduğumuzu anlayırıq. Bu dəyərlərin davamçısı olmaq bizə həm məsuliyyət, həm də güvən verir. UNEC tələbəsi olmaq yalnız auditoriyada dərsə qulaq asmaq demək deyil. Bu, eyni zamanda, müxtəlif tələbə birliklərində, layihələrdə, könüllülük fəaliyyətlərində, sosial təşəbbüslərdə aktiv iştirak deməkdir. UNEC-də fəaliyyət göstərən Yaradıcılıq mərkəzi, tələbə təşkilatları, beynəlxalq proqramlar və 7/24 kitabxana tələbələrin maraqlarını və inkişafını dəstəkləyən unikal mühit yaradır. Bu mühitdə biz təkcə nəzəri bilik deyil, həm də real həyatda lazım olacaq bacarıqları qazanırıq. UNEC tələbəsi olmaq öz ideyasını reallaşdırmaq, komanda ilə işləmək, müxtəlif mədəniyyətləri anlamaq və qlobal düşünmək deməkdir. Bu təcrübə bizi təkcə iqtisadçı deyil, cəmiyyət üçün dəyərli bir vətəndaş kimi formalaşdırır. Bu gün qürurla deyə bilərəm ki, UNEC yalnız gələcəyin mütəxəssislərini deyil, eyni zamanda cəmiyyətin yolunu müəyyən edən liderləri yetişdirir".

Sevinc QARAYEVA

525-ci qəzet .- 2025.- 30 may(№93).- S.15.