Dünyanın aparıcı caz portalında “Baku Jazz Festival-2025” haqqında məqalə yayımlanıb

Dünya caz xəbərlərinin aparıcı mənbəyi olan allaboutjazz.com portalında nüfuzlu ingilis caz tənqidçisi Yen Pattersonun “XX Baku Jazz Festival” haqqında məqaləsi dərc edilib.

AZƏRTAC xəbər verir ki, “All About Jazz” 1995-ci ildə Maykl Riççi tərəfindən yaradılan və xəbərlər, albom icmalları, məqalələr, videolar, konsert siyahıları və digər cazla bağlı tədbirlərin yer aldığı veb-saytdır. Caz Jurnalistləri Assosiasiyası “All About Jazz”ı cazı işıqlandıran ən yaxşı veb-sayt kimi tanıyıb.

“Baku Jazz Festival-2025”də şəxsən iştirak edən və heç bir tədbiri qaçırmayan caz tənqidçisi Yen Patterson öz məqaləsində festivalın tarixi, yaradıcısı, caz musiqiçisi Rain Sultanov və yubiley tədbiri haqqında ətraflı bəhs edib.

“İstənilən caz festivalı üçün 20-ci ildönümünü qeyd etmək əhəmiyyətli bir nailiyyətdir. Azərbaycanda bu, xüsusilə əhəmiyyətlidir. “Baku Jazz Festival”ın yaranması və inkişafı onun yaradıcısı və bədii direktorunun baxışı, inamı və yorulmaz işi sayəsində mümkün olub. Rain Sultanov festivalı 2005-ci ildə Joe Zawinul Syndicate qrupunun çıxışı ilə başladıb. İyirmi il sonra o, hələ də klaviş ifaçısı Maylz Devisin ilk festivalda əsas iştirakçı olduğunu heyrətlə xatırlayır. Onun ardınca digər Devis tələbələri - Herbi Henkok (2006), Billi Kobem, Mayk Stern və Kenni Garrett davam etdilər. Festival səhnələrində El Cerro, Hiram Bullok, Diana Rivz, Riçard Bona, Çarls Lloyd, Mariy Joao və Branford Marsalis də çıxış ediblər. Son illərdə festival Qonsalo Rubalkaba, Teo Kroker, Gregori Mare və Edmar Kastanyedanı qəbul edib. Rain Sultanov bildirib: “Caz heç bir sərhəd tanımır və həyat haqqında təsəvvürümüzü genişləndirir”. “Baku Jazz Festival” cəsarətlə və mütərəqqi şəkildə inkişaf edib. Gənc istedadların inkişaf proqramları, sərgilər, filmlər, ustad dərsləri və mühazirələr yerli musiqiçilərin inkişafına töhfə verib və festivalı yeni şəhər məkanlarına çıxarıb. “BJF-2025”in səkkiz səhnəsi müasir memarlığın zəngin tarixi keçmişlə qonşuluq etdiyi Bakı şəhərinin çoxqatlı təbiətini vurğulayıb. Burada tarixin kölgəsi həmişə yaxındadır - axı bura Şərq və Qərbin əsrlər boyu yanaşı yaşadığı bir yerdir. Bu, keçmişin və bu günün görüşünün, mədəni qovuşmanın hekayəsi - cazın tarixçəsidir. BJF-2025 bunun bariz nümunəsinə çevrildi. Səkkiz gün ərzində 21 ölkədən musiqiçilər saysız-hesabsız rənglərdə cazı təqdim etdilər. Səhnələrdə akustik, elektrik və hibrid ansambllar bir-birini əvəzləyirdi. “The Great American Songbook” Afro-Karib və Braziliya ritmləri ilə yanaşı səslənirdi. Bibop, svinq və blüz caz-fyujn ilə yanaşı ifa olunurdu. İmprovizasiya edən musiqiçilər kamera orkestrləri ilə birləşirdilər, caz isə Qafqaz, Balkanlar və Aralıq dənizi xalq musiqisinə qarışırdı”, - deyə Y. Patterson qeyd edib.

Qeyd edək ki, "Baku Jazz Festival-2025” oktyabrın 24-dən 31-dək Bakıda keçirilib və həm yerli, həm də beynəlxalq medianın diqqətini cəlb edib. Səkkiz gün ərzində dünyanın ən yaxşı caz musiqiçiləri Azərbaycan paytaxtında çıxış ediblər. Festival məkanlarında konsertlər, sərgilər, cem sessiyaları, film nümayişləri, ustad dərsləri, seminarlar və tanınmış musiqi ekspertləri ilə görüşlər təşkil olunub.

525-ci qəzet .- 2025.- 14 noyabr(№207).-S.9.