Türk musiqi irsi Astanada keçirilən festivalda ölkələri birləşdirib

Astanada Şəhər Administrasiyası və Beynəlxalq Türk Mədəniyyəti və İrsi Fondu tərəfindən təşkil edilən Beynəlxalq İncəsənət Festivalı başa çatıb.

AZƏRTAC Astana Şəhər Administrasiyasının mətbuat xidmətinə istinadən xəbər verir ki, festivalda dövlət və ictimai xadimlər, elmi-tədqiqat institutlarının rəhbərləri, magistrantlar və doktorantlar, aparıcı mütəxəssislər, tədqiqatçılar və incəsənət ustaları iştirak ediblər.

Qonaqlar arasında Azərbaycan, Qırğızıstan, Türkiyə, Özbəkistan və Macarıstandan nümayəndələr, eləcə də türk dövlətlərindən 60-dan çox sənətçi, tədqiqatçı, musiqişünas və ənənəvi alətlərdə ifaçılıq ustaları var idi.

Festival çərçivəsində “Mənşəyi və səslənməsi: türk alətlərinin hazırlanması ənənələri və müasir həllər” mövzusunda beynəlxalq simpoziumun birinci plenar iclası keçirilib. Milli musiqi alətlərinin tarixi inkişafı, regional xüsusiyyətlər və müasir dövrdə ənənəvi texnologiyaların istifadəsi məsələləri müzakirə olunub.

Aparıcı alimlər və ustalar məruzələrlə çıxış ediblər, türkdilli xalqların milli musiqi alətlərinə həsr olunmuş yeni tədqiqat işi təqdim edilib. Festivalın elmi hissəsi peşəkar fikir mübadiləsi və beynəlxalq əməkdaşlığın genişləndirilməsi üçün platformaya çevrilib.

Festival “Jastar” sarayında qala-konsertlə başa çatıb. Qala-konsertdə Türkiyə, Qırğızıstan, Macarıstan və digər ölkələrdən tanınmış ifaçılar və kollektivlər iştirak ediblər. Festival proqramında türk xalqlarının ortaq musiqi irsi müasir səhnə formatında, eləcə də etnomodernist üslubda yeni əsərlər təqdim olunub.

525-ci qəzet .- 2025.- 27 noyabr (№216).- S.10.