Örnək ömür yolu

Bu günlərdə uzun illər müxtəlif məsul vəzifələrdə çalışmış, ömrünü dövlətçiliyin və ictimai sabitliyin qorunmasına və möhkəmlənməsinə, qanunçuluğun və ədalətin təmin olunmasına həsr etmiş dəyərli insan Xanlar Abbasovun 80 illik yubileyi doğmaları və dostları tərəfindən yüksək səviyyədə qeyd edilib.

Xanlar müəllimin zəngin həyat hekayəsi var. Gənc yaşlarında əmək fəaliyyətinə başlayan, sovetlər dönəmində 4 il "Qəhrəman şəhər" adlanan Sevastopolda hərbi xidmət keçəndən sonra Vətəninə qayıdan X.Abbasov bir müddət sovet və partiya orqanlarının dövlət mühafizə xidmətində, sonra Bakı şəhər Baş Milis İdarəsində çalışıb. Belə çətin və məsuliyyətli sahədə fəaliyyət göstərməklə yanaşı, paralel olaraq o, ali təhsil alıb, xidmət illərində intizamı və prinsipiallığı ilə fərqlənib.

Dövlət müstəqilliyimizin bərpasından sonra Xanlar Abbasov Xüsusi Dövlət Mühafizə Xidmətinə işə dəvət alıb və fəaliyyətini burada davam etdirib. Onun bu məsul qurumdakı peşəkar fəaliyyəti, üzərinə düşən vəzifənin öhdəsindən yüksək səviyyədə gəlməsi hər zaman layiqincə qiymətləndirilib.

Xanlar müəllimin yüksək insani keyfiyyətləri özünü təkcə peşəkar fəaliyyətində deyil, onun həyatdakı mövqeyində, dövlətə və dövlətçiliyə sadiqliyində, eyni zamanda ətrafındakılara münasibətində də həmişə özünü aydın və birmənalı şəkildə büruzə verib. Bu illər ərzində uğur və nailiyyətləri nə qədər çox olsa da, o, həmişə sadəliyi və təvazökarlığı ilə seçilib.

Xanlar Abbasovun uzunmüddətli səmərəli fəaliyyəti respublikamızın rəhbərliyi tərəfindən yüksək qiymətləndirilib, dövlətə və dövlətçiliyə vicdan və sədaqətlə xidmət etdiyinə görə Ulu öndər Heydər Əliyevin fərmanı ilə o, 1998-ci ildə "Hərbi xidmətlərə görə" medalı ilə təltif edilib.

Bugünkü həyatımızada dostluğun və etimadın nə qədər dəyərli və məsuliyyətli bir xüsusiyyət olduğu hər kəsə yaxşı bəllidir. Dostları və yaxınları Xanlar müəllimi həm dostluqda, həm işgüzar münasibətlərdə etibarlı və sadiq bir insan kimi tanıyır və sevirlər.

Xanlar müəllimi eyni zamanda ailə dəyərlərinə daim sadiq olan, valideynlik və babalıq borcunu ləyaqətlə yerinə yetirən bir insan kimi tanıyırıq. O, sözün əsl mənasında ailəsinə bağlı nümunəvi ata və nəvələrinin sevimli babasıdır. Onun şərəfli həyat yolu bütövlükdə gənc nəsil üçün əsl örnəkdir.

Uzun ömür və zəngin həyat yolu yalnız yaşın üstünə yaş gətirmir, həm də insana dərin həyat təcrübəsi və müdriklik qazandırır. Bu baxımdan Xanlar müəllimin həyat hekayəsini onun öz dilindən böyük maraqla dinləməyə dəyər, çünki bu həyat hekayəsinin hər sözünün arxasında zəngin həyat təcrübəsi və böyük uğurlar dayanır.

Xanlar müəllim təqaüdə çıxdıqdan sonra da fəal ictimai fəaliyyətini davam etdirməkdədir. Onun həyat təcrübəsi, müdrik məsləhətləri bu gün də yaxın ətrafı üçün dəyərli bir məktəbdir.

Xanlar müəllimin bu yubileyi təkcə yaşın yox, həm də bütöv bir şərəfli ömür yolunun, görülmüş işlərin və qazanılmış hörmət və nüfuzun ifadəsidir. Çoxsaylı dostları adından Xanlar müəllimi bir daha səmimi qəlbdən təbrik edir, ona möhkəm cansağlığı, uzun ömür, ailəsi və doğmaları ilə birlikdə firavan xoş illər arzulayırıq.

Rövşən AĞAYEV

Natiq İSAYEV

525-ci qəzet 2025.- 14 oktyabr (№186).- S.15.