"Tank atası"

Şəhid tankçı Nadir Xəlilovun xatirəsinə

Nadir Ağadadaş oğlu Xəlilov 1984-cü il noyabr ayının 3-də Astaranın Səncərədi inzibati dairəsindəki Artupa kəndində anadan olmuşdu. 2008-2019-cu illərdə Artupa kənd tam orta məktəbində təhsil almışdı.

Ailəliydi Nadir. İndi onun Ağadadaş və Nihad adlı iki oğlu böyüyür.

Milli Ordunun giziri Nadir Xəlilovun 2003-cü ildə başlayan həqiqi hərbi xidməti Naxçıvanda sərhəd qoşunlarında keçib. 2004-cü ildə xidmət müddəti başa çatıb. Nadirin hərbçi olmaq qərarı dəyişməyib. 2005-ci ildən MAXe kimi Milli Ordumuzda xidmətə başlayıb. Azərbaycan Respublikası Silahlı Qüvvələrinin "Gizir hazırlığı kursu"nda oxuyub. Müxtəlif təlimlərdə iştirak edib. Z.Tağıyev adına qəsəbədəki 888 saylı hərbi hissədə gizir kimi xidmət edib. Sonra tankçı olmağa qərar verib.

Nadir Xəlilov 15 illik hərbi xidmət müddətində müxtəlif fəxri-fərmanlara, 3-cü dərəcəli "Qüsursuz xidmətə görə" medalına, eləcə də "Azərbaycan Respublikası Silahlı Qüvvələrinin 90 illiyi", "Azərbaycan Silahlı Qüvvələrinin 95 illiyi" və "Azərbaycan Silahlı Qüvvələrinin 100 illiyi" yubiley medalı"na layiq görülüb.

Milli Ordunun giziri onlarla texnikanı sıradan çıxaran tank heyətinin komandiri Nadir Xəlilov Füzuli uğrunda gedən döyüşlərdə şəhid olub. Azərbaycan Respublikasının Prezidenti İlham Əliyevin sərəncamına əsasən ölümündən sonra düşmənin canlı qüvvəsinin və atəş nöqtələrini məhv etdiyinə görə "Vətən uğrunda", "Füzulinin azad olunmasına görə" medalları ilə təltif edilib.

Abşeron rayonunda yerləşən N saylı hərbi hissədə şəhid tankçıların xatirəsi əbədiləşdirilib. "Şəhidlər ölməzdir" xatirə kompleksi açılıb. Açılışda azadlıq savaşında şəhid olan 20 tankçının dəyərli həyat hekayəsi, igidlikləri xatırlanıb. Onlardan biri də qəhrəman tankçı Nadir Xəlilovdur.

1-ci tank bölüyünün tank komandiri kimi öz heyətiylə birlikdə ilk hücuma keçənlərdən olub cəsurumuz.

Onun haqqında deyilənləri eşitdikcə heyranlıq duyurdum.

Nadirin atası Ağadadaş Xəlilovun söhbətlərindən: "Vətən yolunda vuruşmaq hər qeyrətli oğulun, igidin borcudur. Mənim də oğlumun borcuydu. Müharibə ağırdı. Amma o mənfur qonşular əl çəkmədilər. Prezidentimiz neçə ildi sülh yolu ilə torpaqlarımızı azad etmək istəyir. Danışıqlar aparır. Ermənilər başa düşmədilər. Məcbur qaldıq biz. Torpaqlarımızı onların əlində qoya bilməzdik. Ona görə də döyüşməliydik. Müharibə etməliydik. Müharibədə insan ölür. Bizim oğullar torpağımızı azad etdilər, haqq savaşında öldülər. Ona görə oğlumla fəxr edirəm. Sağ olsun. Hamımız, bütün kənd fəxr edir. Azərbaycan fəxr edir. Prezidentimiz fəxr edir. Biz də prezidentimizlə fəxr edirik. Nadir hərbini özü seçdi. Əsgərlikdən gələndən sonra elə "hərbçi olmaq istəyirəm" deyirdi. Dedim "bu qədər istəyirsənsə, get ol". Məktəbdə oxuyanda da hərbi oyunlarda iştirak edərdi, həmişə mükafat alardı. Həvəsi vardı. Kurs oxudu, təlimlərə getdi. Tankçı ixtisasını seçdi. Mən özüm də tankçı olmuşam. Müharibə veteranıyam. Mənim atam da İkinci Dünya müharibəsinin veteranı olub. Nadir də vətənpərvər ruhda böyüyüb. Müharibə başlayanda da döyüşə getməliydi. Sentyabrın 30-da zəng eləmişdi (Kövrəlir bu məğrur ata). Dedim özündən muğayat ol. Amma tankçıydı. Öndə gedirdilər. Vurublar tanklarımızı".

Qədir Nadirin böyük qardaşıdır: "Üç bacı, üç qardaş idik. Eyni ailədə böyüsək də, hər birimizin öz arzuları vardı. Nadir hərbçi olmağı seçdi. Çox razı idi işindən. Xoşbəxt idi. Döyüş yoldaşları onun xidmətindən, peşəkarlığından, cəsurluğundan o qədər xoş sözlər dedilər ki, bir daha elə qardaşım olduğu üçün qürur duydum. 2003-cü ildən əsgər gedib, 15 illik hərbçi ömrü yaşayıb. Şərəfli, ləyaqətli bir ömür yaşayıb. Şəhidlik zirvəsinə çatıb. Hər kəsə belə yaşamaq nəsib olmur".

Həyat yoldaşı Sevda xanımın dedikləri: "2006-cı ildə tanış olduq, həmin ildə də ailə qurduq. Sevmişdik bir-birimizi. 14 il birlikdə yaşadıq. O, sözün əsl mənasında dost idi. Mükəmməl bir insandı. Yaxşı övlad, yaxşı qardaş idi. Təkcə öz ata-anasının yox, mənim anamın da oğlu idi. Qardaşıma qardaşlıq edirdi. Əsgərlərinə qarşı da eləydi. Onlara dost, qardaş, ata kimi qayğı göstərirdi. Övladlarımıza da ən mükəmməl ata idi. Bilmirəm, onun kimi ata varmı? Belə bir insanla ailə həyatı qurduğum üçün özümlə də qürur duyuram. İki gözəl oğlu böyüyür. Heç peşman deyiləm. Zaman geri dönsə, şəhid olacağını bilsəm də, yenə onunla ailə quraram. O, mənim qəhrəmanımdır".

Hərbçi dostlarının sözlərinə görə, Nadir ən peşəkar tankçılardan biri olub. Tankın səsindən onun nasazlığını təyin edə bilirdi. Ona "Tank atası" deyirdilər.

Atası olduğu tankların açdığı yollarla ərənlərimizin işğalda olan torpaqlarımızı azad etdiyini bilir yəqin Nadir Xəlilov.

Şuşada dalğalanan bayrağın məğrurluğuna qoşulub dolanır başımızın üstündə igidimizin ruhu.

Kamalə ABİYEVA

525-ci qəzet .- 2025.- 23 oktyabr (№193).- S.14.